Luk. 2 - BUKO SIPUNENAN

Pututukat matat Jesus

¹ Ka teterenia nenda kaunangan parenta Kaisar Agustus bule itusuratnake sangamberi sirimanua ka sangalio polak.

² Pasisuranan nene ia te pasisuranan siboiki ka teteret si Kirenius mugubernur ka Siria.

³ Eirangan leu sangamberi sirimanua ka laggai taikebbukatda senenda itusuratnake oninda.

⁴ Si Josep leu barania ka Natsaret ka Galilea, ei nia ka laggai Betlehem ka Judea laggai David, kalulut muntogat samba punuteteu David poi nia,

⁵ bule itusuratnake oninia samba si Maria nounogetnia sibara suruket.

⁶ Sege sia sedda, aili aiaili laggonia si Maria.

⁷ Tutuakenangan matat togania simanteu, togania sikebbukat, tabutnangan nia komang, bujukngakenangan nia ka pukoman tarimeu, taan poi anai kudduat ka sia ka lalep pugogoiat.

Sipasijajago tarimeu samba malaika

⁸ Ai leu sedda ka mone sipasijajago tarimeu, ai sia masijajago tarimeura sinoibo.

⁹ Sinulut rio malaikat Tuhan ka bebera, toroijinangan sia pulatsanan Tuhan, loto lepa sia.

¹⁰ Kuanangan ka matada malaika, “Ba maloloto kam! Puangkakat baga sabeu le segeakenenku ka kam siaili sangamberi bangsa.

¹¹ Gogoi nene, amututuan matat Sipaarau kam, ia te Kristus, Tuhan, ka laggai David.

¹² Nene te patuaggaiatnia ka kam: Sesemuian sara sikolik sinabut komang, sipeperep ka pukoman tarimeu.”

¹³ Sinulut oi minca sangabagguak malaika sibara ka sorga masiumun Taikamanua kuarangan,

¹⁴ “Umun ka Taikamanua ka pata, samba aban ka polak, ka sirimanua kilibet bagania.”

¹⁵ Kele aratuitui samalaika ratoili ka sorga, patiborangan sipasijajago tarimeu pasasambada, “Sita kam taei ka Betlehem, masiitco sibabara, sipoiliat Tuhan ka matata.”

¹⁶ Eirangan leu et simaola, seserangan si Maria, si Josep samba sikolik sipeperep ka pukoman tarimeu.

¹⁷ Kele araitco sikolik, nunuakerangan sangamberi siniboi malaika ka matada pagalaiat sikolik.

¹⁸ Kisei le ka bagada sangamberi sipasiaarep sinunuakenenda sipasijajago tarimeu ka matada.

¹⁹ Si Maria geti isiddoni le sangamberi tiboiet, ipaatu nia ka bagania bagei.

²⁰ Ia geti sia sipasijajago tarimeu, ai sia totoili, ai sia muurai masiumun Taikamanua, aipoi sangamberi siarep samba siitcora ta aijulut kele sikuat malaika ka matada.

²¹ Kele aiaili balu ngagogoi ka teteret tusunat sikolik, kaurangan oninia Jesus, ia te oni sikuat malaika enan pei le ta isusuruketnake nia inania.

Jesus raambit ka Uman Taikamanua

²² Kele aiaili teterenia kai Josep samba kai Maria raenungake arat pasilinara siripot Surukat Mose, ambitrangan sikolik ka Jerusalem rasegeake nia kai Tuhan.

²³ Aipoi ka surukat Tuhan atusurat, “Senen toga simanteu sikebbukat buita tupuneni le nia kai Tuhan.”

²⁴ Samba leu masibuluake buluakenen kele siniboi ka Surukat Tuhan, ia te rua ngamuneng ngorut ele rua ngamuneng ngorut simakatoga.

²⁵ Ka teteret nenda ai leu ka Jerusalem sara sirimanua sipuoni si Simeon. Simaroipo baga samba simatopit le nia, ai le ingengenaake sipusuibi tai Israel. Aisopsopman ka tubunia Ketsat Sipunenan,

²⁶ samba aipoiliatnan ka matania Ketsat Sipunenan tapei mamatei nia ke ta iitco boiki Kristus sinibalaakenen Tuhan.

²⁷ Kalulut patubbuiat Ketsat Sipunenan, oi nia ka Uman Taikamanua. Kele araambit Jesus saeppunia ka Uman Taikamanua masigalaiake ka tubunia siripot Surukat,

²⁸ alanangan nia si Simeon, beilanangan nia, umunakenangan Taikamanua pele ngangania,

²⁹ “Kineneiget Tuhan, obaakean itoili paguguletnu ka erut baga siripot siniboinu.

³⁰ Aiitcoan poi mataku Sipaarau sibara kekeu,

³¹ sitarekngakenennu ka sangamberi bangsa,

³² ia te pato sitoroiji tai bangsa, samba katuumunan bangsam Israel.”

³³ Kisei le ka bagat ukkui samba inania masiarep tiboiet Simeon pagalaiat sikolik.

³⁴ Sukatnakenangan sia si Simeon, kuanangan ka matat Maria inania, “Toga nene aikauan nia Taikamanua sibailiu katubelekat samba katusuruatda simigi ka tai Israel. Bailiu nia patuaggaiat sibara ka Taikamanua, pajoggoloakenenda sirimanua simigi,

³⁵ sedda te imatoila bagat paatuatda. Kean le te lanjau ipunu ketsatnu reureu bagam.”

³⁶ Ai leu et sara nabi sinanalep sipuoni si Hanna, togat Panuel muntogat Aser. Bulat amabajaan nia. Pitu ngarura le ujunia arapulalep simanteunia barania ka siokkonia.

³⁷ Sipululumangan le nia kineneiget, balu pulu epat ngarurangan bajania. Beri kaddiuakena Uman Taikamanua, sinago sinoibo mupuasao samba manindou masisuru Taikamanua.

³⁸ Nia leu moi ka teteret nenda; umunakenangan Taikamanua, samba itiboi pagalaiat sikolik ka matada sangamberi singenaake kabelaiat Jerusalem.

Toili ka Natsaret

³⁹ Kele ailepa ragalaiake sangamberi siripot surukat Tuhan, toili sia ka laggaira ka Natsaret ka Galilea.

⁴⁰ Puuraunangan sikolik, samba maron tubunia, sun pusopppinan, samba ipaalei nia katet bagat Taikamanua.

Jesus ka Uman Taikamanua ka teteret pulu rua ngarura beunannia

⁴¹ Senen rura mei le epput Jesus ka Jerusalem mupunen Paska.

⁴² Kele aiaili pulu rua ngarura beunannia Jesus, ei sia ka Jerusalem kele simareirei ka punen.

⁴³ Kappulu punen, toili sia, tapoi Jesus geti amukuddu pei le nia ka Jerusalem taiaagaietda saeppunia.

⁴⁴ Ka bagada le te aian nia paeenung sambada saaleinia sitotoili. Gabarangan nia sanganantat gogoi ka saeppuda samba ka siagaira tubu.

⁴⁵ Taiseseseda nia, soksokrangan minca ka Jerusalem ragaba nia.

⁴⁶ Telu ngagogoi arapasigaba, seserangan nia ka Uman Taikamanua, ai nia ka talagada tai guru masiarepmake tiboietda samba masiise sia.

⁴⁷ Kisei lepa ka bagada sangamberi sipasiaarep againa masialegi.

⁴⁸ Kele araitco nia saeppunia tugegerangan. Kuanangan ka matania inania, “Sirou, angoi kise nugalai ka kai? Amakaratnan bagamai ukkuinu masigaba ekeu!”

⁴⁹ Kuanangan ka matada, “Nugagaba kodda kam aku? Ta pa nuagai kam mateu le kukuddu ka uman Ukkuiku?”

⁵⁰ Tapoi ta makolou ka bagada sikuania ka matada.

⁵¹ Lepa toili nia sambada ka Natsaret, reddetnangan nganganda. Tapoi isiddoni le ka bagania inania sangamberi tiboiet nene.

⁵² Puuraunangan Jesus, muurau tubu, muurau leu topitnia, samba manuntu bagat Taikamanua samba sirimanua ka tubunia.