Jol. 3 - BUKO SIPUNENAN

Taikamanua masiukum sangamberi saggak

¹ Kuananan si Tuhan, “Kateteret nenda, Jerusalem samba Jehuda Kutotoiliake minca erut puririmanuanda.

² Sangamberi bangsa kururuake, samba Kuambit le sia ka Peleu Pasiukuman. Lepa Kuukum le sia siripot jodra sigaliara katubut sangamberi bangsaKu, aipoi araparubeian polak Israel, samba raribbaiake bangsaKu ka laggai sirimanua.

³ Galairangan surat pauktungan, bule ioi rateuake, kasei masibakkati sangamberi sitangsiakenen. Rasakiake siokko samba silainge, rabailiuake sia pagugulet sahaya. Bulagatda rapakeinia paelet samba sakit lora anggur.

⁴ Aponia kaumui Aku nene, ale Tirus, Sidon samba sangamberimui ka tobbou Filistin? Aileu nurerepdep masisiliake lagat bagam katubukKu? oto silo le pasisiliatKu ioi simaruei.

⁵ Mas samba perakKu anuraurauan, samba pukaioatKu simakeppu saki anuabbitnan ka umam.

⁶ Sipulalaggai ka Jehuda samba ka Jerusalem anuambitnan tuareu ka laggaira; lepa sakiakenungan sia ka bangsa Junani.

⁷ Kineneiget kuambit le sia rabela ka kudduat anusakiake sia, samba kusisiliake le jom sigalainu katubudda.

⁸ Togam simanteu samba sinanalep Kusakiake geti katubutda tai Jehuda, lepa geti sakiakerangan sia minca katubutda tai Syeba, ka laggai simakope reunan. Aku, Tuhan amasikua.

⁹ Paagaiake nene katubutda tai bangsa; patarek kam tubumui pasaggak samba masisibo tubu! koiniake saladdu samba sipasaggak; ruruake sangamberi tai saladdu samba riuriuake kam!

¹⁰ Paddai kam papakkrumui bailiu lanjau, sasabi' bailiu sosoat. Sirimanua sitaioitubu leuet masikua, ‘Momoi aku pasaggak kele saladdutda.’

¹¹ Kawan konan kam simaruei, ale tai bangsa sibara kasenen kudduat! paruru kam kalembah sedda.” Oi, Tuhan, koiniake saladdum rasaggangi sia!

¹² Kuanangan minca si Tuhan, “Kam tai bangsa patarek kam tubumui, samba kenan kam ka peleu pasiukuman. Sedda te Kuukum tai bangsa pabebeakendra tai bangsaKu.

¹³ Bulat makatai le sia, pasagriji le sia kele gandum simara ka mone. Paperakinungan sia kele anggur kabagat pamerakat, simasun pat mapilinangan.

¹⁴ Sipuriribu sia ka su'sut Pasiukuman. Aipoi sedda te iooi geti gogoi kaoijanan Tuhan.

¹⁵ Matat sulu samba laggo, ibailiu magepgep samba panyanyat taan matoro.

Taikamanua masisukatake paamianNia

¹⁶ Si Tuhan murou barania ka Sion, ka leleuNia barania ka Jerusalem mugok ngangaNia, manua samba polak mungeungeu kalulutNia. Tapoi si Tuhan masipakolou, samba masisakkeri Israel, bangsaNia.

¹⁷ “Ale Israel, kineneiget te nuagainia, Aku te' Tuhan Taikamanuam. KudduatKu ka Sion, ka leleuKu sipunenan, sirimanua siooiake taan momoi ragurukinia minca.

¹⁸ Kateterenia nenda, sangamberi monen anggur, tarimeu mukom parou ka tinambu simagabru, bagat oinan ka Jehuda taan sasapru oinannia. Ai sara bagat oinan muguruk barania ka uman Tuhan, samba masisuaiji su'sut Akasia, pasamba oinan simalina.

¹⁹ Misir ibailiu simatangeu, samba Edom ibailiu simagarak, taan sia sirimanua sikudduijinia, aipoi arasaggangingan tai Jehuda, samba mateiakerangan sirimanua, sipulalaggai sitaanai jo.

²⁰ Tapoi Jehuda maririru le tukudduiji teret buruburu samba Jerusalen teret mupaniikat.

²¹ Kululumunake le geti logaura sitapei akulumnake, Tuhan mukuddu le ka Sion simariuriu.