Job 1 - BUKO SIPUNENAN

Sanitu masisibo si Job

¹ Ai sara simanteu ka laggai Us sipuoni Job, sirimanua nenda matopit samba maroiponia, malotonia ka Taikamanua samba iareuake tubunia ka pukakatai.

² Ai pitu tatogania taimanteu samba telu tatogania tainanalep.

³ Samba leu ai paguguletnia simigi, pitu ngaribu ngamuneng biribiri, telu ngotu ngamuneng unta, sangaribu ngamuneng jaui, samba lima ngotu ngamuneng kalidei. Oto nia le bulat simakayo katalagat sipulalaggai ka saigit kabelaiat sulu.

⁴ Sipitu tatogat Job taimanteu, ai katukelatda masibaraake punen pasaili-saili ka senen lalepda. Ka bagat punen nenda rasogai leu si telu tatogat Job tainanalep, lepa pukomrangan samba mulo sambatda.

⁵ Senen ka lepat punen, si Job tusurunia senen simancep samba panguruatnakenangan buluakenen kele igitda tatogania bule iappeake sia si Tuhan. Kalulut ipaatu poi si Job, amajongan tatogania samba arapaloloian Taikamanua ta sipalit bagatda.

⁶ Ka sara gogoi oi tatogat Taikamanua ka matat Tuhan samba leu ka talagatda ai leu Sanitu.

⁷ Iageti parerenangan si Tuhan ka Sanitu, “Kaipa anubara?” Aleginangannia sanitu, “Barakku ka puenunganan masigejengi polak.”

⁸ Lepa parerenangan si Tuhan katubut Sanitu, “Taleu anulelekngake paguguletKu si Job? Kalulut ta anai berisara sirimanua ka polak kele nia, simakope topit samba simaroipo, simaloto ka Taikamanua samba siareuake tubunia ka pukakatai.”

⁹ Lepa aleginangannia sanitu, “Tatat siloketnia pa imaloloto si Job ka Taikamanua?

¹⁰ Ta pa Ekeu amasigalai kekre sibokkonia samba lalepnia samba leu sangamberi sibabara katubunia? Panukaninungan senen sigalainia samba tuppainungan pukayoatnia ka kupkumen laggai nenda.

¹¹ Tapoi ke Nuala sangamberi pukayoatnia nenda, pateleijinangan leu Ekeu.”

¹² Iageti kuanangan si Tuhan ka Sanitu, “Sangamberi pukayoatnia ai ka kabeinu, sarat bui nubesikinia.” Iageti tuitui Sanitu ka matat Tuhan.

Katusubuat pukayoat samba tatogat Job

¹³ Ka sara gogoi, kateteret ai sia mupupunen tatogat Job ka lalep kebbura sikebbukat,

¹⁴ sinulut oi sara pakoinien ka lalep Job samba segeakenangannia, “Tuan, amoi tai Syeba masisaggangi kai kateteret aikukuiluk mone jaui samba aimukokom kalidei se'se ka bebenia.

¹⁵ Parauraugirangan tarimeu nenda, samba mateiakerangan sangamberi pagugulet Tuan sibabara sedda. Sarat aku le amoi abela bailiu oinangan kusegeakenia katubut Tuan.”

¹⁶ Kateteret aipeilenia maninibo, oi pagugulet sikarua masikua, “Biribirit Tuan samba sipasijago tarimeu sangamberitda amateian sia aitunung sia leleggu. Sarat aku le amoi abela bailiu oinangan kusegeakenia katubut Tuan.”

¹⁷ Ta'pei alepa aipanibo, oi pagugulet sikatelu masisegeake, “Telu ngamungkuat sipararaurau sibara ka Kasdim masiparauraugi sangamberi untat Tuan samba mateiakerangan sapagugulet Tuan. Sarat aku le amoi abela bailiu oinangan kusegeakenia katubut Tuan.”

¹⁸ Kateteret aipeilenia maninibo, oi pagugulet bagei sipasikua, “Aimupupunen tatogat Tuan ka lalep togat Tuan sikebbukat,

¹⁹ sinulut puboroinangan rusa sibara ka saigit ka kudduat simatangeu samba boroinangan lalep nenda pat mabukkatnangan samba sangamberi tatogat Tuan matei sia. Sarat aku le amoi abela bailiu oinangan kusegeakenia katubut Tuan.”

²⁰ Lepa purionangan si Job samba biritakenangan leppeinia toggaiat sou bagania. Sapunangan alainia, lepa purapponangan ipanindou,

²¹ samba kuanangan, “Aiputu'tu matakku ta anai aponia pa, samba matei aku ta leu et anai apapa. Tuhan masiake, si Tuhan leu masiala. Tuumunake le onin Tuhan!”

²² Oto, kenanen aisilo pugejaat baga nenda si Job, ta aigalaiake jo samba ta aiseleake Taikamanua.