Jes. 66 - BUKO SIPUNENAN

Puaraugat kalepat ukuman

¹ Kise te tiboiet Tuhan: Manua iate kudduat purimataatKu samba polak kalak rerekKu; lalep kipangan le nuririoake kam kaku, samba kudduat kipangan le sibailiu puariatKu?

² Ta pa kabeiKu le amasigalai sangamberinia nene bailiu puailinangan sangamberinian nene? kise te tiboiet Tuhan. Tapoi ka sirimanua nene te kumataiake matakKu: ka sirimanua situoorei, ka simabele baga samba simaloto ka tiboietKu.

³ Sirimanua masija'ja jaui simanteu, tapoi ramateiake leu et sirimanua, sirimanua masibuluake biribiri, tapoi rabakbakake leu et lolokkat jojo, sirimanua masipanguruatake buluakenen komen, tapoi rapanguruatake leu et logau sakkoilo, sirimanua masipanguruatake kumanyang, tapoi rabuluiji leu et tularat bulungan. Kalulut nenda: makere le sia, raoba peile raenungi enunganda, samba ketsatda ioba bulungan kasitsitakenenda.

⁴ Kisedda te kopenia obaKu masigalai siobat bagakKu katubutda samba masibaraake katubutda kalotoakenenda; kalulut ke musoga Aku, taanai sipasialegi, ke manibo Aku, ta raarepi, tapoi ragalaiake le sikatai ka matakKu samba makope peile obara ka sitaiobaket bagakKu.

⁵ Arepmake tiboiet Tuhan, ale kam simaloto ka tiboietNia! Sasarainamui, simalaga baga katubumui, sikekle kam kalulut pususurumui ka oningKu, arakuangan: “Kauan ipatoila pulatsananNia si Tuhan, bule kuitco kai angkat bagam!” Tapoi sia le masisilo puailaat.

⁶ Arep, nau pugaugaupat sibara ka laggai arep, kabaraiatnia sibara ka Uma Sipunenan! Arep, Tuhan masigalaiake pasilumunan ka sangamberi saggakNia!

⁷ Kepei mukatci kalulut besi', amusuleannia, kepei iorik besit masitu'tuake matat toga, aitu'tuakean matat toga simanteu.

⁸ Kasei amasiarep pagalaiat kele nenda, kasei amasiitco pagalaiat kele kisedda? Kipangan le ioi sara laggai tutu'tuakenia kabagat sangagogoi, ele sara bangsa tubaraake kabagat sangagogoi? tapoi simaruei le aiorik besi' aitu'tuakean Sion matatda tatogania.

⁹ Kipangan le Kunganga'ngaake kudduat pusulekat sirimanua, samba ta Kugalainia itu'tuake matat toga? Tiboiet Tuhan. Ele kipangan le Kugalai sirimanua itu'tuake matat toga, samba masipetpet kudduat pusulekat? Tiboiet Taikamanuam.

¹⁰ Puangka kam baga pasamba Jerusalem, samba pugora kam baga kalulutnia, ale sangamberi sirimanua sipununtukinia baga! Puangka kam baga simakope pasambania, ale sangamberi sirimanua sipurereureu baga kalulutnia!

¹¹ bule nupotpot samba numengtek kam, ka susu siarauake tubumui, bule nuengai samba nunanam sibara ka udduknia sibara baga simasun.

¹² Kalulut kise te tiboiet Tuhan: Bulatnia te, Kugurukake le katubunia puaraugat kele bagat oinan, samba pukayoatda sangamberi bangsa kele bagat oinan sabeu simaeba; mutottot le geti kam, tubeila, samba tuposai ka kupkup.

¹³ Kele sara sirimanua ipusuibinia inania kisedda te Kupusuibi kam; Kupusuibi le kam ka Jerusalem.

¹⁴ Ke nuitco kamnia, maangkanangan bagamui, samba bailiunangan geti kam kele turuturu sibau sipututu'tu simalibbut' oto matoilanangan kabei Tuhan ka sapaguguletNia, samba leu goluNia ka sangamberi saggakNia.

¹⁵ Bulatnia te, moi le geti si Tuhan pasamba obengan, samba sangamberi keretaNia kele kasoubaliok, igalaiake goluNia simaoloi samba paasekatNia pasamba julu obengan.

¹⁶ Kalulut iukumake te si Tuhan sangamberi sipuririmanua pasamba obengan samba lanjauNia, samba sangamberi sirimanua simateiakenen Tuhan ituppai le geti iginia.

¹⁷ Sia sipuneni tubu samnba masialeake tubunia addet sangamberi saalei bulungan, pasamba masitut sara sirimanua sikuddu katalagania, sipasikokom akkulat sakkoilo samba sangamberi tarimeu kaksitsitakenen samba leu birut, sangatatakat le sia geti sangamberitda, kise te tiboiet Tuhan.

¹⁸ Kuagai sangamberi sigalai samba siisiakenenda, samba moi le Aku Kururuake sangamberi bangsa sibara ka sangamberi nganga, samba moi le sia geti samba itcorangan pulatsananKu.

¹⁹ Kukau le geti toggaiat ka talagatda samba koiniakekungan sirimanua katalagatda sibebela ka sangamberi bangsa, iate Tarsis, Pul samba Lud, ka Mesekh, samba Rosh, Ka Tubal samba Jawan, ka sangamberi tobbou laggai simareunan sitapei amasiarep pagalaiat Aku samba sitapei amasiitco pulatsananKu, bule rapakakra pulatsananKu, ka sangamberi bangsa.

²⁰ Raambit le geti sangamberi sasarainamui sibara ka bangsa sibailiu buluakenen kai Tuhan ka uddut kuro samba kereta samba ka uddut pasibairat, ka uddut kalidei samba unta sinanalep simanangka muenung, ka uddut leleuKu sipunenan, ka Jerusalem, tiboiet Tuhan, kele raambit buluakenen tai Israel kabagat kudduat simapunen ka Uman Tuhan.

²¹ Kisedda katalagatda Kuala le geti tai imam samba tai Lewi, Tiboiet Tuhan.

²² Kalulut kele manua sibau samba polak sibau baraakenenKu nenda, mariuriu le ka matakKu, kise te tiboiet Tuhan, kisedda muntogatmui samba onimui mariuriu le ikuddu.

²³ Laggo saili laggo samba Sabat saili Sabat, oto sangamberi sirimanua moi le geti murekkuk manindou ka matakKu, Tiboiet Tuhan.

²⁴ Bela le sia geti samba itcorangan tubutda simamatei sipukela patuat katubukKu. Ta mamatei leitinia sedda, samba obengannia ta pepe, oto sangamberinia ibailiu le geti kalotoakenen ka sangamberi sipuririmanua.