Jehz. 1 - BUKO SIPUNENAN

Nabi masiitco pulatsanan Tuhan

¹ Ka rura sikatelupulu, ka laggo sikaepat, ka gogoi sikalima laggo nenda, kateteret aikai kabebet oinan Kebar sambamai sirimanua siribbaiakenen, tubukanangan manua samba itcokungan pamoilinanan pagalaiat Taikamanua.

² Ka gogoi sikalima laggo nenda, iate rura sikalima kalepat katuribbaiat Rimata Joyakhin,

³ panibonangan Tuhan katubut imam Jehezkiel, togat Busi, ka laggaira tai Kasdim kabebet oinan Kebar, samba sedda salokinangannia geget Tuhan.

⁴ Lepa geti itcokungannia, bulatnia, muboroi le rusa talabari sibara ka bare, samba masiambit sangarurukat tanai rusa sabeu pasamba obengan sipukikinam samba tanai rusa nenda aigogoiliknia toro; kabaga, katalagat obengan nenda matoila kele perunggu simakirisau.

⁵ Samba katalagat nenda leu ai kele epat sipuririmanua samba kise te ituitco sia: makere le sia ka sirimanua,

⁶ tapoi senenda ai epat pumataat samba ka senenda ai leuet epat kappora.

⁷ Reretda maroipo samba bukkut reretda kele sulet togat jaui; sangamberi rere makirisau kele tembaga simaruei tusasai.

⁸ Ka epat bebe'ra ka tei sangamberi kappora ai kabei sirimanua. Pagalaiat pumataat samba ka epat kappora, kise galainia:

⁹ sangamberi kappora aipabebekbek; ke muenung sia ta tubebeliu, senenda muenung simaroipo kamata.

¹⁰ Pumataatda kise galainia: Ka epatda ai pumataatda kamata kele pumaatda sirimanua, pumataat singa ka isit kai kattoet, pumataat jaui isit kai katciu samba pumataat manyang isit ka teitei.

¹¹ Sangamberi kappora tunga'nga ka pata; pabekbek le sia pasamba ka rua kappora samba ka rua kappora bagei masitabbo tubutda.

¹² Senenda muenung simaroipo kamata; ka ipot eijanan ketcat nenda, sedda te raei, ke muneng sia ta tubebeliu sia.

¹³ Katalagat sangamberi sipuririmanua nenda ai kele bot obengan sipujujulu, kele tutungan, sipuenung ka senen kudduat katalagat sipungongoingoi nenda, samba obengan nenda aimutotoro, oto ka obengan nenda ai bila' sipatutuppai.

¹⁴ Sangamberi sipuririmanua nenda tuburut ka senen kudduat kele bila'.

¹⁵ Itcokungannia, bulatnia, ka uddut polak ka bebet senen ka epat sipungongingoi nenda ai sara roda.

¹⁶ Putubuat sangamberi roda nenda kele kirisau permata pirus samba ka epatnia makere; galai tubunia kele sisara ai katalagat roda bagei.

¹⁷ Ke muenung sia momoi raailiake ka epat matat rusa; ke muenung sia ta tubebeliu sia.

¹⁸ Ai leuet ngaloura samba itcokungan, ka sangaliot ngalou si epat nenda masun mata.

¹⁹ Ke muenung sangamberi sipungongoi nenda, pueungnangan leu sangamberi roda nenda kabebera; samba ke tuakkat sangamberi sipungongoingoi nenda kapata barania ka polak, tuakkatnangan leu sangamberi roda nenda.

²⁰ Kaipa iei ketcat nenda, sedda te raei, samba tuakkatrangan leu simakere pasamba sangamberi roda, kalulut sangamberi ketcat sipungongoingoi nenda ai kabagat sangamberi roda.

²¹ Ke muenung sangamberi sipungongoi nenda, puenungnangan leu sangamberi roda nenda. Ke muari sia, puarinangan leu sangamberi roda nenda. Ke tuakkat sia barania ka polak, tuakkatrangan leu simakere pasamba sangamberi roda. Kalulut sangamberi ketcat sipungongoingoi nenda ai kabagat sangamberi rodania.

²² Ka uddut sangamberi utet sipungongoingoi nenda ai kele manua, ituitco kele rurukat es kalotoakenen, tunganang ka utera.

²³ Samba ka tei tanai rusa nenda kappora tunga'nga simaroipo, sisara masibekbek bagei; samba senenda ai rua kappora sitabbo tubutda.

²⁴ Ke muneung sia, arepkungan nau kappora kele nau oinan purupugat sipugogok, kele nau Sipulugege, kele gaugaura saladdu simigi; ke muari sia, obaakerangan ituulei malaikara.

²⁵ Iageti maarepnangan nganga sibara ka uddut manua sikuddu ka uddut utera; ke muari sia, obaakerangan ituulei kappora.

²⁶ Ka uddut manua sikuddu ka utera ai kele uddenan purimataat kele permata lazurit; samba ka uddut siputubu kele uddenan purimataat ituitco kele putubuat sirimanua.

²⁷ Barania ka simakere tengania pat aili kapata akuitco kele perunggu simakirisau samba kele obengan sitabbo sangalionia; samba barania ka simakere tengania pat aili ka repe akuitco kele obengan sibokko toro.

²⁸ Kele linu, simatotoila kateteret tetere simaurat ka tanai rusa, kisedda te imatoila toro sibokkonia. Kisedda te imatoila tularat pulatsanan Tuhan. Kele akuitconia purekkukungan, lepa maarepnangan ngangaNia ipanibo.