Ibr. 2 - BUKO SIPUNENAN

Puaragat sabeu

¹ Ia te lulunia buita tapasikeli simakope sangamberi siarepta, bui tamaraggai.

² Aipoi ke bai tiboiet sinegeakenenda samalaika amaronan, samba senen pasisasabau Surukat samba taimareddet isisilo silinia siripokatnia,

³ kipa te iooi tabela ke tapasibbu puaragat sabeu nene? Si Tuhan le amasisegeake nia siboiki, ia geti ronakerangan nia ka sita sia sipasiaarep,

⁴ ronakenangan pei nia Taikamanua ka bagat kerek samba kiseiet samba sene ngamata gege samba kalulut Ketsat Sipunenan sirubeiakenennia siripot teu bagania.

Jesus Kristus sipalulu sita ka puaragat

⁵ Aipoi ta ka samalaika aikau gege Taikamanua masipaneinei polak sibau sibabara, ia te polak siniboita nene.

⁶ Tapoi ai sipasimumunengake ka sara ruang Surat Sipunenan masikua, “Aponia te sirimanua nurerepdep nia, ele togat sirimanua nupuleletsei nia?

⁷ Tapoi anuparepe nia goiso ka samalaika, samba nukirini nia pulatsanan samba pubeunanan;

⁸ sangamberinia anukauan ka tei rerenia.” Aipoi ka bagat masisumake sangamberinia ka tubunia, ta anai beri sara sitaipususum ka tubunia. Tapoi kineneiget tapei taiitco susumakena sangamberinia ka tubunia.

⁹ Tapoi sita masiitco Jesus pinaepe goiso ka samalaika, sikirini pulatsanan samba pubeunanan le lulut pasioorik kamamatei, bule lulut kiliu bagat Taikamanua inanam kamateiat punu tubut sangamberi sirimanua.

¹⁰ Mateu poi ka Taikamanua – siteuake samba sibaraake sangamberinia –, sipasiaambit maigi sirimanua ka pulatsanan, masiabeuake leu Jesus, sipalulu sita ka puaragat, kalulut pangoringan.

¹¹ Aipoi nia sipasipupuneni samba sia sipuneni sibara ka sara Ukkui le; ia te lulunia ta imamaila masioniake sia saraina,

¹² aikua, “Kupaarep onim ka matada sasarainangku, samba kuumunake ekeu ka talagat paamian,”

¹³ samba minca, “Kukakatonemi nia,” samba minca, “Koi aku samba tatoga siaket Taikamanua kaku.”

¹⁴ Oto kalulut tatoga sipulologau samba sipuaakkula le, nia leu makere kele sia, bule ka kamateiatnia itataake siukkaake bajou kamateiat, ia te si Sanitu;

¹⁵ samba ibelaake sia ka pupagugulenan sanganantat purimanuaiatda lulut puloloto ka kamateiat.

¹⁶ Aipoi bulatnia ta samalaika airomake, sapunuteteu Abraham le airomake.

¹⁷ Ia te lulunia ka bagat sangamberinia buita ibailiu nia makere ka sasarainania, bule ibailiu nia Imam Sabeu simanuntu baga samba simatopit ka pasikelat ka matat Taikamanua, masitebui jot sangamberi bangsa.

¹⁸ Kalulut aiorikngan poi ka sia pasisiboat, oto momoian iromake sia siorik pasisiboat.