Hab. 1 - BUKO SIPUNENAN

¹ Nene te patonekat Tuhan sipoiliatnia ka tubut Nabi Habakuk.

Ngunyut Habakuk pagalaiat puroipoat

² Ale Tuhan, kipangan le ujunia kupusoga masitidou paroman? pigamoian le te nuaarepi samba nuaareuake kai kapaoreat?

³ Angoi koi nuobaake aku masiitco maigi ngamataat jo? Sarapei ekeu momoi nuomake masiitco maigi puseleat? Kaipa-kaipa le ai paoreat samba pugegeat, palabakat samba paukkelat.

⁴ Surukat ta'an atupuletsei samba puroipoat ta'an atuparon. Sirimanua sijongan le amuundutat ka tubut sirimanua simatopit, iageti pabailokrangan leuet puroipoat.

Alegiat Tuhan

⁵ Lepa geti panibonangan si Tuhan ka tubuddra paamianNia, “Lelekngake peite kam bangsa-bangsa sigoilik kam, makiseinangan bagamui samba tugege bagei. Aipoi kateteremui Kugagalai te sara sitaioi nukatonemi kam ke'sarat masipumumuanake.

⁶ Bangsa Babilonia simagolu samba simategle tubu nenda kubailiu ake sia bangsa simagege. Bela sia sipatutut kalaggaira masigejengi sangaliot polak masikalaake bangsa-bangsa bagei.

⁷ Kaipa le aisia bara pulotokat samba kaoddoi tubura raputata' sangamberi aturan sarat sipasese kasia le ratututnake.

⁸ Kuro'ra simaola sisaliu peile' nangkat singa, samba sisaliu geget jojot leleu simalaje. Saladudra sipukukuro' baradra ka laggai simareunan, raoi kele manyang ilalau ibania.

⁹ Rapasaggak saladdudra ragalaiake pugegeat, sangamberi sirimanua mugeret tubu, masiitco kaoijananda. Sitangsiakenenda ta' momoi tuadde igitra.

¹⁰ Paloloirangan tai rimata samba ga'gatidrangan siabeu tiboi tubu. Rapulabbei le ka bagadra senen kekre, bule ioi raoppu senen kekret polak nenda, lepa tabbuirangannia polak.

¹¹ Iageti tuitui sia sirimanua siputaikamanua ronnia nenda kele nangkat ipuboroi rusa.

Mungunyu' minca si Habakuk kai Tuhan

¹² Oi Tuhan, baranangan kasiburu, Ekeu iate Taikamanua. Ekeu Taikamanuangku sipunenan samba sitaitatata'. Tuhan, Taikamanuangku samba sipasijago aku, anupilingan bangsa Babilonia nenda samba anukau gege masiukum kai.

¹³ Tapoi kipanganle' Anuomake masiitco sirimanua sijo simaodoi nenda? Ta' pa bulat sipunenan le ekeu nupasikinere pukakatai? Ta'pa mamit bagam masiitco tata'nia katuroipoat? Oto angoian le' Nupumemengmeng ka teteret ragalai sikatai ka sirimanua simatopit sia sirimanua sikatai?

¹⁴ Kipa nuaddeake sirimanua kele iba ka koat, samba kele paleiti-leiti sitaanai siuteake sia?

¹⁵ Bangsa Babilonia ralaba sirimanua sikabli, kele ibangan le sirimanua. Kaurangan sia ka bagat jalo giritrangan sia. Bulat mangka samba magora le bagadra bangsa Babilonia masiitco sigalaira.

¹⁶ Lepa geti panindogirangan jalo nenda samba kaurangan pusurakat buluakenen, aipoi kalulut jalo nenda le arasese puuktungan simalilimai samba sibaraake uktuk.

¹⁷ Lulut nenda ta'an ararepdep nuntut baga bailiu sarat masigolok lanjaura rapamatei bangsa-bangsa bagei.