Est. 2 - BUKO SIPUNENAN

Si Ester ibailiu rimata

¹ Pasat piga ngagogoi pa, kenanen poi ta'an amugolu minca rimata, ai peile ipaatu sigalaiakenen Ratu Wasti samba sigalaiakenennia ka tubunia.

² Kalulut nenda sangamberi sipangantoman simalegre ka rimata masikua pinatudra, kele kise “Simaerunia tugagaba le taiokko bagei simalainge tubu addeat Tuan.

³ Bui' ta rimata masiuddetnake sangamberi sipugagalai ka sangamberi provinsi purimatat nene bule ragaba taiokko simalainge tubu lepa abbitrangan sia sangamberidra ka uman purimataat ka kudduatdra tainanalep ka Susan nene. Hegai, sipugagalai sikokoiakenen sibailiu ute' sipasikeli uman purimatat kudduatdra tainanalep, masipasikeli sia samba masikau ka sia pupasikelanan pulaingean.

⁴ Ke alepaan nenda, bui' ta rimata masipili siokko simakope obaket bagam Tuan, samba masibailiuakenia rimata sibailiu sailit Ratu Wasti.” Rimata ioba' bagania nganturat nenda samba galaiakenangannia.

⁵ Ka laggai Susan nenda ai sara tai Jehudi sipuoni Mordekhai togat Jair. Nia muntogat Kis samba Simei sibara ka suku Benjamin.

⁶ Atutangsiakean si Mordekhai ka teteret aikalaake Jerusalem si Nebukadnezar, rimata Babilonia. Si Mordekhai aturibbaiakenia ka Babilonia sambadra si Joyakin, rimata Jehuda, samba maigi peile sitangsiakenen sabagei.

⁷ Ai sarainania ka patogat ama, sara siokko simakope lainge pumataat samba putubuatnia, sipuoni Ester, oninia ka ngangan Heber iate Hadasa. Ukkui samba inania si Ester atata'an sia samba bailiuakenangannia si Mordekhai toga siuraunia samba ipasikelinia kele bakkat togania.

⁸ Lepa aitupaagai parentat rimata, maigi taiokko tururu'ake ka Susan samba si Ester ai ka talagatdra. Tuabbit leu et nia ka uman purimataat rimata samba sege'akerangannia ka tubut Hegai ute' sipasikeli uma purimatat kudduatdra tainanalep ipasikelinia.

⁹ Kisei le ka bagat Hegai masiitco si Ester samba iobania. Oto kaunangan simaola masipasikeli pulaingean samba pusinginan ka tubut siokko nenda samba leu komen sikokoiakenen. Abbitrangan si Ester ka rubeiat simakope eru ka uman purimataat ka kudduatdra tainanalep nenda samba pitu sia taiokko simakope ola samba agai mugalai ka uma purimataat rimata tukoiniake masipasikelinia.

¹⁰ Kalulut nganturat Mordekhai, ta aipaagai si Ester nia tai Jehudi.

¹¹ Senen gogoi si Mordekhai mugejek ka gerat ka matat uma purimataat kudduatdra tainanalep nenda iparereake pagalaiat si Ester samba aponia sipuaaili ka tubunia.

¹² Siripot aturan, sia tainanalep tukau masipasikeli pulaingean burunia sangarura: enem ngalaggo pasamba tula sigalu' kemenyan, samba enem ngalaggo minca pasamba tula galu pusinginan bagei. Lepa nenda, senen siokko ioorak sia rubeiat murio ka matat Rimata Ahasyweros.

¹³ Ka teteret sara siokko murio ka matat rimata, momoi ipakei apa le siripot siobania.

¹⁴ Abbitrangannia ka uma purimataat rimata ka teteret sinoibo, samba mancepnia abbitdrangannia ka lalep purimataat bagei samba pasikelinangannia si Saasgas, sara siabeu tiboi tubu sikokoi sipasikeli sia selir rimata. Siokko nenda ta'an muririo ka matat rimata minca, ke' geti rimata ioba siokko nenda samba kuanangan oninia isogainia.

¹⁵ Iageti ailinangan rubeiat Ester murio ka matat rimata. Ester iate togat Abihail samba sasarainan Mordekhai sipasibabailiuakenia toga siuraunia kele bulat bakkat togania; si Ester raabeauakenia senen sirimanua sipaiitconia. Ka teteret aiei murio ka matat rimata, pubibilenan Ester siripot sikolouakenen samba nganturat Hegai, ute' sipasikeli uman purimataat kudduatdra tainanalep.

¹⁶ Kisedda te, ka rura sika pitu ka puparentaat Ahasyweros ka laggo sika pulu, iate ka laggo Tebet, tuabbit si Ester murio ka matat Rimata Ahasyweros ka uma purimataat rimata.

¹⁷ Iangkaake baga samba isanangake rimata bele pei ka sangamberi taiokko sabagei. Kalulut nenda bulat makope nuntut bagat rimata. Iageti kaunangan rimata kirit purimataat ka utet Ester samba masibailiuakenia rimata masisaili Ratu Wasti.

¹⁸ Kele ailepa nenda, baraakenangan punen sabeu rimata addeat masiabeuake si Ester, samba masisogai sangamberi sipugagalainia samba leu siabeu tiboi tubu ka purimataatnia. Paagainangan gogoi puariat ka sangaliot purimataat samba masiparubei panguruat simakope igi.

Si Mordekhai masiarauake engan rimata

¹⁹ Ta' pei amaburu' nenda aiuddetnake si Mordekhai rimata ibailiunia sipugagalai ka purimataat.

²⁰ Ta' pei leu aipaagai si Ester nia sara tai Jehudi, kalulut aile ikekeraakenia si Mordehkai. Si Ester masireddet ngangan Mordekhai kele ka teteret magoiso peilenia samba ipasikelinia patogat amania nenda.

²¹ Ka sara gogoi, ka teteret aimugagalai si Mordekhai ka uman purimataat, ai rua sia siabeu tiboi tubu sikokoi rimata, iate si Bigtan samba Teres, amukere baga masimateiake Rimata Ahasyweros, kalulut sia nenda bulat makope le lagat bagadra ka tubunia.

²² Pinaatu nenda aiagai si Mordekhai samba sege'akenangannia simaola ka tubut Ester. Ta' aiala burunia, tiboinangan si Ester ka tubut rimata siagai Mordekhai nenda.

²³ Pagalaiat nenda tugaba pulelengannia, iageti matoilanangan sibulatnia te pangasegekat nenda. Ruadra nenda tuukum sitiggotnakenen. Siripot parentat rimata, sipuaaili nenda tusuratnake ka bagat buko pumumuan purimataat.