4Mos. 5 - BUKO SIPUNENAN

Enung galaiakenen pagalaiat sirimanua kasitsitakenen

¹ Kuanangan si Tuhan kai Mose,

² “Segeake katubutda tai Israel: bule sangamberi sirimanua sibara besit kulit simasappo, ele besit pusisirimanua, samba sangamberi kasitsitakenen kalulut tubut sirimanua simamatei tukoiniake rakaddiuake kudduat pusapougat;

³ taimanteu samba tainanalep buita nukoiniake sia ratuitui; rabela ka kudduat pusapougat buita nukoiniake sia ratuitui, bule bui rapalolit kudduat pusapougat kudduatKu katalagatda.”

⁴ Iageti galaiakerangan tai Israel kisedda, koiniakeranghan sangamberi sirimanua nenda rakaddiuake kudduat pusapougat; kele sikuat Tuhan kai Mose, kisedda te aragalaiakenia tai Israel.

Enung galaiakenen pasitebui sele

⁵ Kuanangan si Tuhan kai Mose

⁶ “Panibo le' ka tai Israel: Ke' sara sirimanua, taimanteu ele tainanalep, masigalaiake sara jo ka pasasambania, samba kalulut nenda silinangan putotopitnia katubut Tuhan, bailiu maselenangan sirimanua nenda,

⁷ oto buita ipoiliat jo sigalaiakenennia nenda; iageti luluinangan panebui sangamberinia samba tuppainangan seperlima, lepa kaunangannia katubut sirimanua sipajonia.

⁸ Tapoi ke taanai muntogatnia sirimanua nenda, katubut kasei ilului panebui sele nenda, oto panebui sele bulat luluiet nenda ibailiu bakkat Tuhan, samba rubeiat imam, tapei tuaddeake biribiri simanteu paabanan pakeiet itubaraake paabanan ka sirimanua nenda.

⁹ Sibara ka sangamberi panguruat sipunenan sikaura tai Israel katubut imam, panguruat sikokoiakenen iate rubeiat imam.

¹⁰ Oto sangamberi panguruat sipunenan siambit sara sirimanua iate rubeiatnia sarania; sarat aponia sikaunia katubut sara imam iate rubeiat imam nenda.”

Surukat pagalaiat pasuksungan

¹¹ Kuanangan si Tuhan kai Mose:

¹² “Panibo katubutda tai Israel samba kua katubutda: Ke' sara sikalalep masigalai paelenan samba ta matopitnia ka simanteunia,

¹³ samba paperepakenangan taimanteu sabagei sinanalep nenda, sitaiagaiet simanteunia, kalulut ibailiu pakeleat sinanalep nenda masipalolit tubunia, taanai sipusimuneng, taanai sipasiitco,

¹⁴ samba ke aisopsopan ketsat pasuksukngan simanteunia nenda, bailiu masuksuknangan ka sinanalepnia, samba sinanalep nenda kirenangan aipalolitan tubunia, ele ke aisopsopan simanteunia nenda ketsat pasuksukngan, bailiu masuksuknangan ka sinanalepnia, kenanen ta aipalolit tubunia sinanalep nenda,

¹⁵ oto simanteu nenda buita iambit sinanalepnia nenda katubut imam. Samba simanteu nenda buita iambit panguruat kalulut sinanalep nenda iginia sepersepuluh efa tapung jelai. Tapung nenda tamomoi tusubuinia tulat zaitun ele tugaluake pumanyang, kalulut buluakenen nenda iate buluakenen panguruatakenen pasuksukngan, sara buluakenen sibailiu pasirepdeman ka pukakatai.

¹⁶ Oto buita ikoiniake sinanalep nenda si Imam imalegre samba iambitnia ka matat Tuhan.

¹⁷ Lepa buita iambit oinan sipunenan si imam kabagat sara kudduat sigalai ka polak, iageti buita iabbut abu sibabara ka bagat lalep Sapou Sipunenan samba garaiakenangannia kabagat oinan nenda.

¹⁸ Ke' aiambitan sinanalep nenda si imam katubut Tuhan, panguruat pasuksukngan, ka uddut takep sinanalep nenda. Ka kabei imam buita ai oinan simapongit sibaraake pateleiat.

¹⁹ Lepa nenda si imam buita isupaake sinanalep nenda pasamba masikua katubunia: Ke' sibulatnia taanai taimanteu sipaperepake ekeu, samba ke ta anugalai jo, ai ekeu kakupkumen simanteunu, oto bela ekeu ka oinan simapongit sibaraake pateleiat nene;

²⁰ tapoi ke amujongan ekeu, ai ekeu kakupkumen simanteunu, masigalaiake paelenan samba masipalolit tubum, kalulut sirimanua sabagei le' simanteunu nugalaiake paelenan –

²¹ kabagat nene imam buita isuppaake sinanalep nenda suppa pateleiat, samba buita ikua si imam ka sinanalep nenda – bule si Tuhan masigalai ekeu ibailiu suppa pateleiat ka talagat bangsam ikurutake bakkapatnu samba ibukluake balugunu.

²² Kalulut oinan sibaraake telei nene tuguru le geti ka tubum sibukkluake balugunu samba sikurutake bakkapatnu. Oto buita ikua sinanale nenda: Amen, amen.

²³ Lepa buita isuratake si imam supppa nenda ka sangababa karate samba posanangannia pasamba oinan simapongit,

²⁴ samba buita ikau ka sinanalep nenda ilo oinan simapongit sibaraake pateleiat, samba oinan nenda tugurunangan geti katubunia samba sibaraake besi' simaraka.

²⁵ Oto buita iala si imam buluakenen panguruat pasuksungan ka kabei sinanalep nenda, lepa totoiakenangannia ka matat Tuhan, samba ambitnangannia ka kudduat buluakenen.

²⁶ Lepa nenda buita iala si imam sangarakkut sibara ka buluakenen panguruat nenda sibailiu pasirepdepnia samba labonangannia ka uddut kudduat buluakenen, iageti kaunangan oinan nenda ka sinanalep itu.

²⁷ Lepa ipuaili nenda, Ke' bai amujongan sinanalep nenda, aipalolitnan tubunia oriknangan besi simakope kalulut oinan nenda, pugonangan balugunia samba kurutnangan bakkat bakkapatnia. Bailiunangan leu oinia telei ka talagat bangsania.

²⁸ Tapoi ke ta ipalolit tubunia sinanalep nenda, malina le nia, oto tubelaake le geti nia samba baranangan geti togania.”

²⁹ Kise te surukat pagalaiat pasuksungan, ke sara sinanalep masigalai paelenen samba masipalolit tubunia, ai nia ka kupkumen simanteunia,

³⁰ ele ke aisopsopan sara simanteu ketsat pasuksungan, bailiu masuksuknangan ka sinanalepnia; buita tuambit sinanalep nenda ka matat Tuhan samba buita igalaiake si imam sangamberi surukat nene katubut sinanalep nenda.

³¹ Simanteu nenda belania ka puseleat, tapoi sinanalepnia nenda, buita isilo siripot puseleatnia.