4Mos. 2 - BUKO SIPUNENAN

Tusau'sau pusapougatda suku-suku Israel

¹ Kuanangan si Tuhan ka tubut Mose samba kai Aron:

² “Senesenen tai Israel buita musapou ka bebet toggaiatda, siripot tularat sukutda. Buita musapou sia masibokko Sapou Paailiat, simakareunan goiso ka bebenia.

³ Sipusasapou ka isit kabelaiat sulu ka bebet sangamberi toggaiatda, iate saladdu Jehuda, siripot mungkuat saladdutda. Siuteake suku Jehuda iate si Nahason togat Aminadab.

⁴ Igitda saladdunia sitususurat iate pitu pulu epat ngaribu enem ngotu sia.

⁵ Sipusasapou ka bebenia iate suku Isakhar. Siuteake suku Isakhar iate Netaneel togat Zuar.

⁶ Igitda saladdunia sitususurat iate lima pulu epat ngaribu epat ngotu sia.

⁷ Iageti suku Zebulon. Siuteake suku Zebulon iate Eliab togat Helon.

⁸ Igitda saladdunia sitususurat iate lima pulu pitu ngaribu epat ngotu sia.

⁹ Igitda sirimanua sitususurat ka bagat saladdut Jehuda siripot mungkuat saladdutda ai sangotu balu pulu enem ngaribu epat ngotu sia. Sia te amutuitui siboiki.

¹⁰ Toggaiat mungkuat saladdut Ruben iate ka saigit ka kaiaman, siripot mungkuat saladdutda. Siuteake suku Ruben iate Elizur togat Syedeur.

¹¹ Igit saladdutda sitususurat epat pulu enem ngaribu lima ngotu sia.

¹² Sipusasapou ka bebera iate suku Simeon. Siuteake suku Simeon iate Selumiel togat Zurisyadai.

¹³ Igit saladdutda sitususurat lima pulu siba ngaribu telu ngotu sia.

¹⁴ Iageti suku Gad. Siuteake suku Gad iate Elyasaf togat Rehuel.

¹⁵ Igit saladdutda sitususurat epat pulu lima ngaribu enen ngotu lima pulu sia.

¹⁶ Igitda sitususurat ka bagat saladdut Ruben siripot saladdutda sangotu lima pulu sara ngaribu epat ngotu lima pulu sia. Sia te situtuitui ka patunan sikarua.

¹⁷ Lepa nenda mungkuatda tai Lewi tuitui sia bairatrangan Sapou Tuhan, ka talagat saladdutda sabagei. Makere kele rapusapou, kisedda leu et ratuitui, senesenenda ka kudduat siripot toggaiatra.

¹⁸ Toggaiat saladdut Efraim, siripot saladdutda, iate ka isit sikaleleu. Siuteake mungkuat Efraim iate Elisama togat Amihud.

¹⁹ Igit saladdutda epat pulu ngaribu lima ngotu sia.

²⁰ Ka bebera iate suku Manasye. Siuteake suku Manasye iate Gamaliel togat Pedazur.

²¹ Igit saladdutda sitususurat telu pulu rua ngaribu rua ngotu sia.

²² Iageti suku Benjamin. Siuteake suku Benjamin iate Abidan togat Gideoni.

²³ Igit saladdutda sitususurat telu pulu lima ngaribu epat ngotu sia.

²⁴ Igitda sitususurat ka bagat mungkuat saladdu Efraim siripot saladdutda sangotu balu ngaribu sangotu sia. Sia te situtuitui ka patunan sikatelu.

²⁵ Toggaiat saladdut Dan iate ka isit bare, siripot mungkuat saladdutda. Siuteake mungkuat Dan iate Ahiezer togat Amisyadai.

²⁶ Igit saladdutda sitususurat enem pulu rua ngaribu pitu ngotu sia.

²⁷ Sipusasapou ka bebera iate suku Asyer. Siuteake muntogat Asyer iate Pagiel togat Okhran.

²⁸ Igit saladdutda sitususurat epat pulu sara ngaribu lima ngotu sia.

²⁹ Iageti suku Naftali. Siuteake mungkuat Naftali iate Ahira togat Enan.

³⁰ Igit saladdutda sitususurat lima pulu telu ngaribu epat ngotu sia.

³¹ Igitda sitususurat ka bagat saladdu Dan sangotu lima pulu pitu ngaribu enem ngotu sia. Siate situtuitui sikateitei, siripot toggaiat parubeiatda.”

³² Nenda te tai Israel sitususurat siripot sukutda. Taddera sitususurat kabagat mungkuat saladdu pasamba sangamberi saladdutda ai enem ngotu telu ngaribu lima ngotu lima pulu sia.

³³ Tapoi tai Lewi ta atusuratnake sia pasamba ka tai Israel, kele sikoiniakenen Tuhan kai Mose.

³⁴ Iageti galaiakerangannia kisedda tai Israel; siripot sikoiniakenen Tuhan katubut Mose, kisedda arapusapou siripot toggaiatda, samba kisedda te aratuitui, senesenenda siripot muntogat samba sukutda.