3Mos. 3 - BUKO SIPUNENAN

Buluakenen puaraugat

¹ “Ke panguruatakenenmui kele buluakenen puaraugat, oto ke panguruatakenenmui nenda iate jaui, sangamuneng simanteu ele sinanalep, buita iambit simaeru tubu ka matat Tuhan.

² Lepa buita igalakake kabeinia ka utet panguruat nenda, samba jajanangannia ka matat matatbaliu Sapou Paailiat, lepa geti tatogat Aron, tai imam nenda buita rasubuiake logau panguruat nenda ka sangaliot kudduat pasibuluat.

³ Iageti sibara ka buluakenen puaraugat nenda buita ipanguruatake tabe si imam silakkup tinanai, samba sangamberi tabe situeetet ka tinanai nenda sibailiu buluakenen sirarak katubut Tuhan,

⁴ kisedda leu et ka ruania gagla samba tabe situettet ka gagla nenda, sibabara ka tenga samba tabe sipulalakke ka atei bulat saraakenennia pasamba gagla nenda.

⁵ Buita ralabo sangamberinia nenda tatogat Aron ka uddut kudduat pasibuluat, iate ka uddut buluakenen silabo aitulalabo ka uddut obengan, sibailiu buluakenen sirarak, singinnia masiangkaake bagat Tuhan.

⁶ Ke panguruatakenennia nenda sibailiu buluakenen paabanan katubut Tuhan iate kambing ele biribiri, sangamuneng simanteu ele sangamuneng sinanalep, buita ipanguruatake simaeru tubu.

⁷ Ke ipanguruatnake sangamuneng biribiri sibailiu panguruatnia, buita iambit nenda ka matat Tuhan.

⁸ Lepa buita igalakake kabeinia ka utet panguruat nenda, samba jajanangannia ka matat matatbaliu Sapou Paailiat, lepa geti tatogat Aron, tai imam nenda buita rasubuiake logaunia nenda ka sangaliot kudduat pasibuluat.

⁹ Iageti sibara ka buluakenen pasiaraugat buita ipanguruatake tabenia si imam sibailiu buluakenen sirarak katubut Tuhan, iate sangamberi leileinia sibara tabe bulat tippuket ka bebet tolat teiteinia, samba tabe silakkup tinanai, samba sangamberi tabe situettet ka tinanai nenda,

¹⁰ samba leu ka rua gagla samba tabenia situettet katubunia, sibabara ka tenga samba tabe situeetet ka atei bulat saraakenennia pasamba gagla nenda.

¹¹ Buita ilabo nenda si imam ka uddut kudduat pasibuluat sibailiu komen iate buluakenen sirarak katubut Tuhan.

¹² Ke panguruatakenennnia sangamuneng kambing, buita iambit ka matat Tuhan.

¹³ Lepa buita igalakake kabeinia ka utet kambing nenda, samba jajanangannia ka matat matatbaliu Sapou Paailiat, lepa geti tatogat Aron, tai imam nenda buita rasubuiake logaunia nenda ka sangaliot kudduat pasibuluat.

¹⁴ Iageti sibara ka kambing nenda buita ipanguruatake tabe silakkup tinanai, samba sangamberi tabe situettet ka tinanai nenda sibailiu panguruatnia kele buluakenen sirarak katubut Tuhan,

¹⁵ samba ka rua gagla samba tabenia situettet katubunia, sibabara ka tenga samba tabe situeetet ka atei bulat saraakenen pasamba gagla nenda.

¹⁶ Buita ilabo sangamberinia ka uddut kudduat pasibuluat nenda si Imam sibailliu komen iate buluakenen sirarak ibailiu singinnia siangkaake bagat Tuhan. Sangamberi tabe iate bakkat Tuhan.

¹⁷ Nene te sara siteuakenen teret buruburu ka kam ka sangamberi reddenan ka sangamberi kudduatmui: bui nukom kam tabe samba logau.”