3Mos. 2 - BUKO SIPUNENAN

Buluakenen sinantatakenen

¹ “Ke ai sara sirimanua sioba masipanguruatnake panguruat kele buluakenen sinantatakenen katubut Tuhan, buita panguruatnia nenda iate tapung bulat simaeru samba buita iuruake tula samba leu igaraiake pumanyang ka uddutnia.

² Lepa buluakenen nenda buita iambit ka tatogat Aron, tai imam nenda. Lepat aiala sibara ka buluakenen sangarakkut tapung pasamba tula samba leu sangamberi pumanyang, oto si imam buita olabo sangamberinia nenda ka uddut kudduat pasibuluat sibailiu rubeiat pasirepdeman buluakenen nenda, sibailiu buluakenen sirarak singinnia masiangkaake bagat Tuhan.

³ Legei buluakenen iate rubeiat imam Aron samba tatogania, iate rubeiat bulat sipunenan sibara ka sangamberi buluakenen sirarak sipanguruatnakenen kai Tuhan.

⁴ Ke nupanguruatake panguruat kele buluakenen panguruat sibara ka aponia pa sirarak kabagat pasirarangan roti, buita sibara ka tapung bulat simaeru, iate roti simamuine sitasioman, sigalai pasamba tula, ele roti simanimpi sitasioman, silokotakenen tula.

⁵ Ke panguruatnakenenmui buluakenen panguruat tattatakenen sirarak ka uddut pasirarangan, buita sibara ka tapung bulat simaeru, tugalai pasamba tula, kele roti sitasioman.

⁶ Buluakenen nenda buita tupatippu, lepa uruakenungan tula ka uddutnia; nenda te buluakenen sinantatakenen.

⁷ Ke panguruatakenenmui kele buluakenen sinantatakenen si seu kabagat koali, buita tugalai sibara ka tapung bulat simaeru pasamba tula.

⁸ Oto buluakenen sinantatakenen sigalai siripot sara enungan galaiakenen nenda, buita nupanguruatake katubut Tuhan, iate buita tusegeake katubut imam, iambitnia ka kudduat pasibuluat.

⁹ Iageti si imam buita ikokoiake sibara ka buluakenen panguruat nenda rubeiat repdemennia, lepa labonangannia ka uddut kudduat pasibuluat sibailiu buluakenen sirarak, singinnia masiangkaake bagat Tuhan.

¹⁰ Legei buluakenen sinantatakenen iate rubeiat imam Aron samba tatogania, iate rubeiat bulat sipunenan sibara ka sangamberi buluakenen sirarak katubut Tuhan!

¹¹ Sara buluakenan sinantatakenen sipanguruatakenenmui katubut Tuhan bui sigalai sibara sioman, kalulut sibara ka sioman ele ka suat mani tamomoi nulabo kam berisara sibailiu buluakenen sirarak katubut Tuhan.

¹² Tapoi sibailiu panguruat sibara ka sisilomui siboiki momoi nupanguruatake kam katubut Tuhan, sarat bui ituambit ka uddut kudduat pasibuluat sibailiu singinnia siangkaake baga.

¹³ Senesenen panguruatmui kele buluakenen sinatatakenen buita nukau kam garam, bui' nupuarak kam garam palelengan Taikamanuamui sibara ka buluakenen sinantatakenenmui; samba leu sangamberi panguruatmui buita nupanguruatake kam garam.

¹⁴ Ke nupanguruatake kam buluakenen sinantatakenen sibara ka tirik sisilomui siboiki katubut Tuhan, buita nupanguruatake kam luikut gandum sirarak ka uddut obengan, gandum situddu sibau, sibailiu buluakenen sinantatakenen sibara ka tirik sisilomui gandummui.

¹⁵ Buita nugaraiake kam tula samba kaumuian pumanyang ka uddutnia; iate buluakenen sinantatakenen.

¹⁶ Buita ilabo si imam sibailiu pasirepdemannia, sangarubeiat sibara ka gandumnia situddu samba tulania kisedda leu sangamberi pumanyangnia sibailiu buluakenen sirarak katubut Tuhan.”