2Mos. 37 - BUKO SIPUNENAN

Masigalai Peti Pakerekat Baga

¹ Si Bezaleel masigalai Peti Pakerekat Baga sibara ka loina akasia, nantania rua sitengaeto lio samba buaknia sara sitengaeto.

² Rubeiat ka baga samba ka teiteinia tulakkeki pasamba mas simaeru, lepa tugalai laisi mas sigoiliknia.

³ Lepa geti galainangan epat letcu mas pasibulungan loina pasibairatnia samba kaunangannia ka epat reret peti nenda, rua letcu ka senen bebenia.

⁴ Galainangan leu et pasibairatnia sibara ka loina akasia samba lakkekinangannia pasamba mas,

⁵ lepa bulukakenangannia loina babairat nenda kabagat letcunia ka senen bebet peti nenda bule ioi tuakkatnake peti nenda.

⁶ Lepa galainangan sara takke sibara ka mas simaeru, nantania rua sitengaeto samba lionia sara sitengaeto.

⁷ Galainangan leu et rua tularat malaika sibara ka mas sipaddai,

⁸ sara kappo ka senen taiming takket peti nenda. Ruania tularat malaika nenda buita tubailiuake sangarubeiat pasamba tekkenia,

⁹ samba tugalai sipamamatai, pasamba kappo situnganga'nga masitabbo takket peti nenda.

Masigalai kudduat roti simatatarek

¹⁰ Si Bezaleel masigalai kudduat roti nenda sibara ka loina akasia, nantania rua ngaeto, lionia sangaeto samba buaknia sara sitengaeto.

¹¹ Meja nenda lakkekinangannia pasamba mas simaeru samba galainangan sara laisi mas sibokkonia.

¹² Lepa galainangan bebet kudduat roti nenda lionia sangatakep. Bebenia nenda tukau laisi mas sigoiliknia.

¹³ Galainangan epat letcu pasibulungan loina pasibairatnia ka epat taiming ka reret kudduat roti nenda.

¹⁴ Letcu pasibulungan loina babairatnia nenda tuottotnake ka bebet kudduat roti.

¹⁵ Loina babairat nenda tugalai ka loina akasia samba tulakkeki pasamba mas.

¹⁶ Nia leu masigalai papiringpiring, pulokat, lalaisu samba simuko kudduat panguruat suat anggur. Sangamberi bibilet kudduat roti nenda tugalai sibara ka mas simaeru.

Pasigagalai reret alito

¹⁷ Si Bezaleel masigalai reret alito sibara ka mas simaeru. Bongen samba ukkaakenennia tugalai sibara ka mas sipaddai, sangamberi ogo pulaingean, samba bobotsoket samba takkenia buita bailiu sara pasamba bongen samba ukkapetnia.

¹⁸ Ka ukkapet nenda buita tugalai enem ruba, telu ruba ka senen bebenia.

¹⁹ Ka senen rubania buita tugalai pulaingean telu ogo simabonan pasamba bobotcoket samba tekkenia.

²⁰ Ka ukkapet buita tugalai pulaingean epat ogo simabonan pasamba bobotcoket samba tekkenia.

²¹ Ka senen tei ruba nenda buita tugalai sara bobotcoket.

²² Sangaliot reret alito nenda pasamba sangamberi bobotcoket samba sangamberi rubania buita tugalai sibara ka sangate'te mas sipaddai simaeru.

²³ Ka reret alito nenda galainangan pitu alito pasamba pasilina kapet alito samba pasitinot simalolit ka alito.

²⁴ Pasigalai reret alito samba sangamberi bibiletnia tupakei telu pululima ngakilo mas simaeru.

Masigalai kudduat pasibuluat pasilabokat kumanyang

²⁵ Si Bezaleel masigalai sara kudduat pasibuluat pasilabot kumanyang sibara ka loina akasia. Putubuat kudduat pasibuluat nenda epat taiming, nanta samba lionia simakere sangaeto, samba buania rua ngaeto. Ka epat uddut taimingnia tugalai ban sibailiu sangarubeiat ka kudduat pasibuluat nenda.

²⁶ Rubeiat ka patania, ka epat bebenia samba sangamberi bannia tulakkeki pasamba mas simaeru samba tukau laisi mas sigoiliknia.

²⁷ Galainangan leu et rua letcu ka tei laisi ka rua bebenia pasibulungan loina pasibairat kudduat pasibuluat nenda bule ioi tuakkatnake kudduat pasibuluat.

²⁸ Loina pasibairat nenda tugalai sibara ka loina akasia samba tulakkeki pasamba mas.

Masigalai tulat pasisukat samba kumanyang

²⁹ Si Bezaleel leu et masigalai tulat pasisukat samba kumanyang simalina simasingin, kele sigalai siagai masigaluake pusinginan.