1Sam. 3 - BUKO SIPUNENAN

Si Tuhan masipatoila tubuNia katubut Samuel

¹ Si Samuel, silainge nenda ibailiu pagugulet Tuhan ka bagat pasikeliat Eli. Kateteret nenda ta mareirei ibara patonekat samba pamoilianan sibara kai Tuhan.

² Ka sara soibo, si Eli simakope baja' nenda aitaddangan imaramun matania, ainia memerep ka biliknia,

³ samba si Samuel ainia memerep ka bebet Peti Pakerekat Baga, ka bagat Sapou Sipunenan. Kateteret ta'pei abela sulu samba aipeile mutotoro alito,

⁴ si Tuhan masisogai si Samuel, lepa aleginangannia si Samuel, “Oi, Ukkui!”

⁵ Iageti pubalaunangan iei masiailiake si Eli samba kuanangan, “Aponia ukkui? Angoi nusogai aku?” Tapoi aleginangan si Eli, “Ta' akusogai ekeu, perepmake ekeu minca.” Lepa ei minca merep si Samuel.

⁶ Iageti sogainangan si Samuel minca si Tuhan. Tusurunangan si Samuel, lepa ei nia masiailiake si Eli samba kuanangan, “Oi, ukkui, angoi nusogai aku?” Tapoi kuanangan si Eli, “Ta' aku sogai ekeu, perepmake ekeu minca.”

⁷ Si Samuel ta iagai sipasisosogainia nenda iate si Tuhan, kalulut ta'pei amanibo si Tuhan katubunia.

⁸ Addeat sikatelu ngamincania si Tuhan masisogai si Samuel, iageti tusurunangan si Samuel samba ailiakenangan si Eli samba kuanangannia, “Aponia ukkui? Angoi nusogai aku?” Kateteret nenda te aiagai kolou si Eli, si Tuhan le sipasisosogai toga nenda.

⁹ Kalulut nenda kuanangan katubut Samuel, “Perepmakean ekeu minca, samba ke rasogai ekeu minca kuangan le: Panibongan le, Tuhan, aikuaarepi.” Iageti ei minca si Samuel ka peremannia.

¹⁰ Lepa geti oi si Tuhan, samba murio ka kudduat nenda samba leu pasoganangan minca, “Samuel, Samuel!” Samba aleginangannia si Samuel, “Panibongan Tuhan, aikuaarepi.”

¹¹ Iageti kuanangan si Tuhan katubunia, “Kugagalaiake te sara kiseiet ka tai Israel, bailiu senen sirimanua siarepinia paingonangan sia.

¹² Ka gogoi nenda galaiakekungan te geti sangamberi sikuakKu ka sangalalepnia barania ka panandaat teret ka pangampulat.

¹³ Alepaan akupaagai katubunia, Kuukum te sangalalepnia teret buru-buru kalulut arapaloloi Aku tatogania. Iagai si Eli sangamberi jotdra nenda, tapoi ta aigolu sia.

¹⁴ Kalulut nenda pusuppakungan pagalaiat sangalalepnia si Eli, aipoi jotdra simakope beunan nenda ta momoi iposania buluakenen ele panguruat apapa teret buru-buru.”

¹⁵ Kele ailepa nenda perep minca si Samuel, samba ka mansepnia surunia samba bukaakenangan sangamberi matatbaliu Uman Tuhan. Malotonia masipaagai pamoilianan nenda katubut Eli.

¹⁶ Tapoi sogainangannia si Eli, kuanangan, “Samuel togakku.” Aleginangannia si Samuel, “Oi, ukkui.”

¹⁷ Parerenangan si Eli, “Aponia aisegeake si Tuhan katubum? Tiboi pei sangamberinia nenda katubukku. Ke ai apapa sipakelem bulatnia Taikamanua te masiukum ekeu.”

¹⁸ Lepa paagainangan sangamberinia nenda si Samuel katubut Eli. Ta' anai berisara aipakele. Lepa geti kuanangan si Eli, “Tuhan le Nia, eddangan igalaiake apa addeakenenNia simaeru.”

¹⁹ Puuraunangan si Samuel, samba si Tuhan masipaaleinia, samba ipuaili sangamberi aponia sikuat Samuel.

²⁰ Nenda te lulunia sangamberi paamian Israel sibara ka sangaliot tobbou laggai nene masisilo si Samuel iate nabit Tuhan.

²¹ Senen ipanibo si Samuel, sangamberi bangsa Israel masiarepi. Aipeile maririuriu ipatoila tubunia si Tuhan ka Silo, ka kudduat aipatoila tubuNia siboiki samba aipanibo katubut Samuel.