روملولارا 3 - موقدس کتابتارییا اعتئماد اتمک اولار 1 بو حالدا یهودی اولماغین نه افضللئیی وار، و یا ختنهنئن نه فایداسی؟ 2 هر طرفدن باخاسان، چوخدور. هر شیدن اوّل بو کی، تارینین سؤزلری اونلارا امانت ورئلئب. 3 اگر اونلاردان بعضئسی ائمان گتئرمهدئلر، او زامان نه اولور؟ مگر اونلارین ائمانسیزلیغی تارینین وفادارلیغینی لغو اده بئلر؟ 4 اصلا! بوتون ائنسانلار یالانچی اولسالار دا، تاری اؤز سؤزونه وفالی قالاجاق. نجه کی، یازیلیب دا: «اله کی، سؤزلرئنده دوغرو چیخاسان، و موحاکئمه اتدئیئن زامان داعوانی قازاناسان.» 5 آمّا اگر بئزئم حاقسیزلیغیمیز تارینین صالح اولدوغونو داها چوخ آشکارا چیخاردیر، بونا نه دئیه بئلهرئک؟ قضبله جزالاندیران تاری صالح دیئل؟ (ائنسانلارین دوشوندویو کئمی دانیشیرام). 6 یقئن کی، یوخ! اگر بله اولسا، او زامان تاری دونیانی نجه موحاکئمه اده بئلر؟ 7 چونکی اگر منئم یالانیم تارینین حقئقتئنی و اونون جلالینی داها چوخ آشکارا چیخاردیر، بس نه اوچون من حله ده بئر گوناهکار کئمی موحاکئمه گرک اولونام؟ 8 و نه اوچون بعضئلرئنئن بئزه ائفتئرا آتدیغی کئمی اتمهیک؟ نجه کی، ائدّئعا ادئرلر کی، بئز بله اؤیرَدئرئک: گلئن پئسلئک ادک کی، یاخشیلیق گلسئن. بله آداملارین محکوم اولماسی داها دا عدالتدئر. هچ کئم صالح دیئل 9 بس نه دئیک؟ آیا هچ افضللئیئمئز وار؟ اصلا. چونکی آرتیق ثابئت اتدئک کی، هم یهودئلر، هم ده قیرییهودئلر هامیسی گوناه آلتیندادیرلار. 10 نجه کی، یازیلیب دا: «صالح اولان هچ کس یوخ، بئر نفر بله؛ 11 آنلایان بئری یوخ، تارینی آختاران بئری یوخ. 12 هامیسی آزیبلار، بئرلئکده فایداسیز اولوبلار. یاخشیلیق ادن هچ کس یوخ، بئر نفر بله. 13 بوغازلاری آچیق قبئردئر؛ دئللری حئیله ائشلهدئر، دوداقلاریندا افعی زهری وار. 14 آغیزلاری لعنت و آجی سؤزلرله دولودور. 15 آیاقلاری قان تؤکمک اوچون تلهسئر. 16 یوللاریندا وئرانلیق و فلاکت وار 17 و باریش یولونو تانیماییبلار. 18 گؤزلری قاباغیندا تارینین قورخوسو یوخدور.» 19 بئز بئلئرئک کی، شرئعتده دیئلن هر شی، شرئعتئن حاکئمئیّتی آلتیندا اولانلارا دیئلئر کی، هر آغیز باغلانسین و بوتون دونیا تارییا حساب ورمهلی اولسون. 20 بلهجه شرئعتئن طلب اتدئکلرئنی یرئنه یتئرمکله هچ بئر ائنسان تارینین نظرئنده تبرعه اولا بئلمز؛ چونکی گوناهین نه اولدوغو شرئعتئن سایهسئنده درک اولونور. ائمان و صالحلئک 21 آمّا ائندی تارینین صالحلئیی ظاهئر اولوب کی، شرئعته باغلی دیئل. و بونا هم شرئعت، هم ده پیغمبرلر شهادت ورئرلر. 22 تاریدان گلن بو صالحلئک عئسا مسئحه اولان ائمان واسئطهسیائله بوتون اونا ائمان گتئرنلره ورئلئر. ائنسانلار آراسیندا هچ فرق یوخدور. 23 چونکی هامی گوناه ادئب و تارینین عئزّتئندن محروم قالیب. 24 و اونون فیضیائله مسئح عئسانین طرفئندن گلن نئجات واسئطهسیائله بو صالحلئیی بئر هدئیّه کئمی آلیرلار. 25 تاری اونون قانیندا اولان ائمان واسئطهسیائله اونو قاباقجادان کفّاره قوربانی تعیئن اتدی. بونو اونون اوچون اتدی کی، صالحلئیئنی گؤرسَدسئن. چونکی تاری اؤز صبرئنده قاباقجا انجام تاپان گوناهلاری جزاسیز بوراخمیشدی. 26 بونو اونون اوچون اتدی کی، ائندئکی زاماندا صالحلئیئنی ظاهئر اتسئن، اله کی، اؤزو صالح قالسین و عئسایا ائمان گتئرهنی تبرعه اتسئن. 27 بلهجه نه ائله فخر اده بئلهرئک؟ هچ بئر شیله. هانسی اوصولا گؤره؟ شرئعتی یرئنه یتئرمک اوصولا؟ خیر! آنجاق ائمان اوصولونا گؤره. 28 چونکی ائناندیغیمیز بودور کی، ائنسان شرئعتی یرئنه یتئرمکله یوخ، ائمان واسئطهسیائله تبرعه اولونور. 29 مگر تاری آنجاق یهودئلرئن تاریسیدیر؟ مگر قیرییهودئلرئن ده تاریسی دیئل؟ البتّه، قیرییهودئلرئن ده تاریسیدیر. 30 چونکی آنجاق بئر تاری وار و او هم ختنه اولونانلاری، هم ده ختنه اولونمایانلاری ائمان واسئطهسیائله صالح سایاجاق. 31 بلهجه آیا بئز ائمانلا شرئعتی لغو ادئرئک؟ اصلا! عکسئنه، اونو مؤحکملهدئرئک. |
© Elam Ministries 2013. All rights reserved.
Elam Ministries