مثللر کئتابی 5 - موقدس کتابعئفّتسئز آرواددان اوزاق دورماق 1 اوغلوم، حئکمتئمه دئقّت ات. فراستئمه قولاق آس، 2 اوندا دوشونجهنی حئفظ ادرسن، دوداقلارین معرئفتی ساخلار. 3 چونکی عئفّتسئز آروادین دوداقلاری بال دامیزدیریر، دئلی شئرئن، یاغدان یومشاقدیر؛ 4 آمّا عاقئبتی یووشان اوتو کئمی آجیدیر، ائکی آغیزلی قیلینج کئمی ائتئدئر. 5 اونون آیاقلاری اؤلومه اِنئر، قدملری اؤلولر دئیارینا آپاریر. 6 حیات طرئقئنی آراشدیرمیر، یوللاری دولاشیقدیر، اوزو ده بئلمئر. 7 ائندی، ای اوغوللار، منه قولاق آسین، آغیزیمدان چیخان سؤزلردن دؤنمهیئن. 8 بله آرواددان اوزاق اول. اونون اِوئنئن قاپیسینا یاخینلاشما. 9 یوخسا شرفئنی اؤزگهلره، عؤمور ائللرئنی قدّار آداما وِرَرسن. 10 یادلار سنئن مالیندان وارلی اولارلار، قازانجین اؤزگهنئن اِوئنه گدر. 11 عؤمرونون آخیری چاتاندا، جانیندا طاقت قالمایاندا، 12 ناله ادئب دئیرسن: نجه تربئیهدن نئفرت اتدئم! نجه اورهیئم تأدئبی اله سالدی! 13 نه موعلّئملرئمئن سسئنی اشئتدئم، نه ده منی اؤیرَدنلرئن سؤزلرئنه قولاق آسدیم. 14 خالق آراسیندا، جاماعات گؤزونده آز قالدی کی، کامئل موصئبته دوچار اولوم. 15 اؤز سو آنباریندان، ائچمهلی اولان سویو، اؤز قویوندان ائچ. 16 نئیه سنئن بولاقلارین کوچهلره، سو آرخلارین میدانلارا آخسین؟ 17 قوی اونلار آنجاق سنئن اولسون، یادلارا پایلاما! 18 قوی سنئن چشمهن برکتلی اولسون، جاوانلیغینین آروادی ائله خوشبخت یاشا. 19 او سوئملی مارالیندیر، گؤزل جیرانیندیر، قوی همئشه اونون دؤشلری سنی دویورسون، همئشه اونون سوگئسی ائله مست اول. 20 اوغلوم، نئیه عئفّتسئز آروادین مستی اولاسان؟ نئیه یاد بئر آروادی قوینونا آلاسان؟ 21 چونکی ائنسانین یوللاری ربّئن گؤزونون قاباغیندادیر، رب اونون بوتون طرئقلرئنی محک وورور. 22 پئس آدامی اله اؤز پئسلئیی توتار، گوناهینین کمندئنه توتولار. 23 تربئیهسئزلئیی اوزوندن اؤلر، سفهلئیئنئن چوخلوغوندان آزار. |
© Elam Ministries 2013. All rights reserved.
Elam Ministries