مثل‌لر کئتابی 31 - موقدس کتاب

لِمواِل پادشاهین سؤزلری

¹ لِمواِل پادشاهین سؤزلری، آناسینین اونا اؤیرتدئیی کلام:

² نه دیئم، اوغلوم؟ نه دیئم، بطنئمئن اوغلو؟ نه دیئم، نذر اتدئیئم اوغلوم؟

³ قووّتئنی آروادلارا؛ یوللارینی بو پادشاهلاری یوخ ادنلره ورمه.

⁴ پادشاهلارا یاراشماز، ای لِمواِل؛ پادشاهلارا شراب ائچمک یاراشماز، حؤکمدارلارا دا کفلندئرن ائچکئلری سومک یاراشماز؛

⁵ مبادا شراب ائچئب شرئعتی یاددان چیخارتسینلار، بوتون ذلئلرئن حاقلارینی ترسه اتسئنلر.

⁶ کفلندئرن ائچکئنی هلاکا گِده‌نه، شرابی دا آجی اورَکلئیه ور.

⁷ قوی ائچئب یوخسوللوغونو یاددان چیخارتسین، و مشقّتئنی آرتیق خاطیرلاماسین.

⁸ آغزینی دئلسئز اوچون، بوتون مؤحتاجلارین حاقلاری اوچون آچ.

⁹ آغزینی آچ و ائنصافلا حؤکم ات، فاغیرلارلا مؤحتاجلارین حاقلارینی ور.

فضئلتلی آرواد

¹⁰ فضئلتلی آروادی کئم تاپا بئلر؟ چونکی اونون دَیَری یاقوتلاردان چوخ آرتیقدیر.

¹¹ اَرئنئن اوره‌یی اوندان آرخاییندیر؛ اونا گؤره ده قازانجی اسکئک اولماز.

¹² بوتون عؤمور بویو ارئنه پئسلئک یوخ، یاخشیلیق ادر.

¹³ یون آختارار، کتان آختارار، اللری ائله چالیشقانلیقلا ائشله‌یر.

¹⁴ تئجارت گمئلری کئمی‌دئر؛ ارزاغینی اوزاق یرلردن گتئرر.

¹⁵ حله گجه ائکن یوخودان قالخار، اؤز عایئله‌سی اوچون یمک حاضیرلایار. کنئزلرئنه ده بئر پای وِرَر.

¹⁶ زمی نظردن کچئردئب ساتین آلار، الئنئن باریندان اوزوم باغی اکر.

¹⁷ بلئنی قووّتله باغلار، قوللارینین قودرتئنی آرتیرار.

¹⁸ تئجارتئنئن یاخشی اولدوغونو دادار، گجه واختیندا اونون چیراغی سؤنمز.

¹⁹ اللرئنی جهره‌یه قویار، جهره‌نئن ائیئنی اللری ائله برک توتار.

²⁰ مظلوملارا الی‌آچیقدیر، بلی، الئنی مؤحتاج آداملارین کؤمه‌یئنه اوزادار.

²¹ اِوئنئن خالقی اوچون قارین یاغماغیندان قورخماز، چونکی هامیلاری ائکی‌قات گیئنئبدئر.

²² یاتاغینا بزکلی پارچالار دوزَ‌لدر؛ پالتاری خالئص کتان و ارغواندیر.

²³ اَری، شهرئن دروازالاری یانیندا تانینمیشدیر، مملکتئن آغساقّاللاری ائله اوتورار.

²⁴ کتان پالتار دوزَ‌لدئب ساتار، تاجئرلره قاییشلار وِرَر.

²⁵ اونون پالتاری قووّت و عئزّتدئر؛ گله‌جک اوچون سوئنر.

²⁶ آغزینی حئکمتله آچار، دئلی اوستونده صالحلئک تعلئمی وار.

²⁷ اِوی خالقینین گدئشئنه موواظئبدئر، تنبل‌لئک چؤره‌یئنی یمز.

²⁸ اؤولادلاری قالخیب اونا بختور دئیرلر؛ اری ده اونو تعرئفله‌یر:

²⁹ «باجاریقلی قیزلار چوخدور، لاکئن سن اونلارین هامیسیندان اعلاسان.»

³⁰ لطافت آلداتان، گؤیچکلئک باطئلدئر، لاکئن ربدن قورخان آرواد تعرئفه لایئقدئر.

³¹ اللرئنئن ثمره‌سئنی اونا ور، قوی شهر داروازالاریندا ائشلری اونا تعرئف گتئرسئن.