سایلار 8 - موقدس کتابچیراقدان 1 سونرا رب موسا ائله دانیشیب اونا ددی: 2 «هارونلا دانیشیب اونا بله دِه: ”چیراقلاری یِرلَشدئردئیئن زامان، یدّی چیراق، چیراقدانین قاباغینی ائشیقلاندیراجاق.“» 3 هارون بله اتدی؛ ربّئن موسایا امر اتدئیی کئمی چیراقلاری چیراقدانین قاباغیندا یِرلَشدئردی. 4 چیراقدان قیزیلدان بله دوزَلدئلمئشدی: آلتلیغیندان گول تصوئرلرئنه قدر یاستیلانمیش قیزیلدان حاضیرلانمیشدی. او، چیراقدانی ربّئن موسایا گؤرستدئیی نومونهیه گؤره دوزَلتدی. لاوئلیلرئن تعیئن ادئلمهسی 5 گئنه رب موسا ائله دانیشیب اونا ددی: 6 «ائسرایئل اؤولادلارینین آراسیندان لاوئلیلری گؤتور و اونلاری تطهئر ات. 7 اونلاری تطهئر اتمک اوچون بله ات: تمئزلهمه سویونو اوستلرئنه سَپ. قوی بدنلرئندهکی بوتون توکلری قیرخیب پالتارلارینی یوسونلار. بلهجه، تمئز اولارلار. 8 او زامان بئر گامیش گؤتورسونلر هم ده اونون تاخیل تقدئمی ائله بئرلئکده کی، یاغلا قاتیلمیش نارین اوندور. سن ده گوناه قوربانی اولاراق داها بئر گامیش گؤتور. 9 لاوئلیلری حوضور چادیرینین قاباغینا گتئر. ائسرایئل اؤولادلارینین بوتون جاماعاتینی دا بئر یره ییغ. 10 لاوئلیلری ربّئن حوضورونا گتئر؛ و ائسرایئل اؤولادلاری اللرئنی اونلارین اوستونه قویسونلار. 11 هارون یِللَتمه تقدئمی اولاراق ائسرایئل اؤولادلارینین آراسیندان لاوئلیلری ربّئن قاباغینا گتئرهجک کی، ربّه خئدمت اتسئنلر. 12 لاوئلیلر اللرئنی گامیشلارین باشلارینا قویسونلار؛ سونرا بئرئنی گوناه قوربانی و او بئرئنی ده یاندیرما قوربانی اولاراق ربّه تقدئم ات کی، لاوئلیلر اوچون کفّاره اتسئنلر. 13 لاوئلیلری هارونلا اوغوللارینین قاباغیندا دایاندیر، اله کی، اونلاری ربّه یِللَتمه تقدئمی اولاراق وقف ادهسن. 14 لاوئلیلری او بئری ائسرایئل اؤولادلاری آراسیندان بلهجه آییر کی، لاوئلیلر منئم اولسون. 15 بوندان سونرا لاوئلیلر حوضور چادیرینین خئدمتی اوچون گده بئلرلر. آنجاق سن اونلاری تمئز ادئب یِللَتمه تقدئمی اولاراق وقف اتمهلیسن. 16 چونکی ائسرایئل اؤولادلاری آراسیندان اونلار کامئل منه ورئلئب؛ بطنئن ائلک دوغدوغو عوضئنه، یعنی ائسرایئللی آروادلارین دوغدوغو بوتون ائلک اوغلانلارین عوضئنه اونلاری اؤزومه گؤتورموشم. 17 چونکی ائسرایئل اؤولادلاری آراسیندا ائلک دوغولان بوتون اوغلانلار و بوتون حیوان بالالاری منئمدئر؛ مئصئر دئیاریندا بوتون ائلک اوغلانلاری محو اتدئیئم گون، اونلاری اؤزومه تقدئس اتدئم. 18 آمّا ائسرایئل اؤولادلاری آراسیندا بوتون ائلک اوغلانلارین یرئنه لاوئلیلری گؤتورموشم. 19 ائسرایئل اؤولادلاری آراسیندان لاوئلیلری هارونا و اوغوللارینا هدئیّه ورمئشم کی، حوضور چادیریندا ائسرایئل اؤولادلاری اوچون خئدمتی یرئنه یتئرئب، اونلار اوچون کفّاره اتسئنلر و بلهجه موقدّس مکانا یاخینلاشان ائسرایئللیلری بلایا دوشمکدن حئفظ اتسئنلر.» 20 موسا ائله هارون و بوتون ائسرایئل جاماعاتی لاوئلیلره بله اتدئلر؛ ائسرایئل اؤولادلاری ربّئن لاوئلیلر حاقّیندا موسایا امر اتدئیی هر شیی یرئنه یتئردئلر. 21 لاوئلیلر ده اؤزلرئنی گوناهدان تمئز ادئب پالتارلارینی یودولار. هارون اونلاری ربّئن حوضوروندا یِللَتمه تقدئمی اولاراق وقف اتدی. اونلار اوچون کفّاره ده اتدی کی، تمئز اولسونلار. 22 اوندان سونرا لاوئلیلر گتدئلر کی، حوضور چادیریندا هارونلا اوغوللارینین نظارتی آلتیندا خئدمتلرئنی یرئنه یتئرسئنلر؛ رب موسایا لاوئلیلر حاقّیندا نه امر اتمئشدی، اله ده اتدئلر. 23 رب موسا ائله دانیشیب اونا ددی: 24 «بو قانون لاوئلیلره عاییددیر. ائیئرمی بش یاش و اوندان یوخاری اولانلار حوضور چادیرینین ائشئنی گؤرمک اوچون خئدمته گئرسئنلر. 25 لاکئن اَلّی یاشا چاتاندا گؤردوکلری خئدمتلرئنی دایاندیریب داها ائشلَمهسئنلر. 26 حوضور چادیریندا اؤز وظئفهلرئنی یرئنه یتئرن قارداشلارینا کؤمک اده بئلرلر، لاکئن اؤزلری خئدمت اتمهسئنلر. لاوئلیلرئن وظئفهلرئنی بله قایدایا سال» |
© Elam Ministries 2013. All rights reserved.
Elam Ministries