متّا 9 - موقدس کتاببئر ائفلئجئن شفاسی (مرقوس 2:1-12، لوقا 5:17-26) 1 عئسا بئر قاییغا مئندی و گؤلون بو تایینا کچئب، اؤز شهرئنه گلدی. 2 اونون یانینا یاتاقدا یاتان ائفلئج بئر آدامی گتئردئلر. عئسا اونلارین ائمانینی گؤروب ائفلئجه ددی: «اوغول، اورهیئن اوزولمهسئن! گوناهلارین باغیشلاندی.» 3 دئن عالئملرئندن بعضئلری اؤز-اؤزونه ددئلر: «بو آدام کوفر دیئر!» 4 عئسا اونلارین نه فئکر اتدئکلرئنی بئلئب ددی: «نه اوچون اورهیئنئزده پئس شیلر دوشونورسونوز؟ 5 هانسی آساندیر؛ ”گوناهلارین باغیشلاندی“ دمک، یوخسا؛ ”دور، یری“ دمک؟ 6 لاکئن اونون اوچون کی، بئلهسئنئز ائنسان اوغلونون یر اوزونده گوناهلاری باغیشلاماغا قودرتی وار…» او واخت ائفلئجه ددی: «دور، یاتاغینی گؤتور و اِوئنه گت.» 7 ائفلئج ده دوروب اِوئنه گتدی. 8 خالق بونو گؤرنده قورخویا دوشوب، بله قودرتی آداملارا ورن تارییا حمد اتدی. متّانین چاغیریلماسی (مرقوس 2:13-17، لوقا 5:27-32) 9 عئسا اورادان کچنده، متّا آدلی بئر آدامی گؤردو کی، باج ییغیلان یرده اوتورموشدو و اونا ددی: «دالیمجا گل.» او دا قالخیب اونون دالینجا گتدی. 10 متّانین اِوئنده سوفره باشیندا اوتوران واخت، بئر چوخ باج ییغانلار و گوناهکارلار گلدئلر و عئسا و شاگئردلری ائله سوفره باشیندا اوتوردولار. 11 فرئسئلر بونو گؤرنده، اونون شاگئردلرئنه ددئلر: «نه اوچون اوستادینیز باج ییغانلار و گوناهکارلارلا یمک ییئر؟» 12 آمّا عئسا بونو اشئدن واخت ددی: «صاغ آداملار یوخ، ناخوش آداملار طبئبه مؤحتاجدیرلار. 13 گدئن بو سؤزون معناسینی اؤیرهنئن کی، دیئر: ”من قوربان یوخ، رحمت ائستهیئرم.“ من صالح آداملاری یوخ، گوناهکار آداملاری دعوت اتمهیه من گلمئشم.» اوروج حاقّیندا بئر سوآل (مرقوس 2:18-22، لوقا 5:33-39) 14 بو آرادا یحیانین شاگئردلری عئسانین یانینا گلئب ددئلر: «نه اوچون بئز و فرئسئلر اوروج توتوروق، آمّا سنئن شاگئردلرئن اوروج توتمورلار؟» 15 عئسا اونلارا ددی: «مگر اولار کی، بَیئن دوستلاری، بَی حله اونلارلا اولان واخت یاس توتسونلار؟ لاکئن او گونلر گلهجک کی، بَی اونلارین الئندن آلینسین. اونلار او زامان اوروج توتاجاقلار. 16 هچ کئم کؤهنه پالتارا تزه قوماشدان یاماق وورماز؛ سالینان یاماق کؤهنه پالتاردان قوپار و ییرتیق داها پئس اولار. 17 اِلهجه ده، تزه شرابی کؤهنه تولوقلارا تؤکمزلر. بله اِتسهلر، تولوقلار پارتلار، شراب تؤکولر، تولوقلار دا آرادان گدر. یوخ، تزه شرابی تزه تولوقلارا تؤکرلر؛ او زامان هر ائکئسی ده حئفظ اولونار.» دئرئلن قیز و صاغالان بئر آرواد (مرقوس 5:21-43، لوقا 8:40-56) 18 عئسا بو شیلری دیئردی کی، رَیئسلردن بئری گلدی و اونون قاباغیندا یره دوشوب ددی: «قیزیم اله ائندی اؤلدو. آمّا گلئب اونا الئنی قویاسان، یاشایاجاقدیر.» 19 عئسا دوروب شاگئردلریائله اونون دالینجا گتدی. 20 اله او واخت، بئر آرواد کی، اونائکی ائل قان آخینماسینا دوچار ائدی، آرخاسیندان گلئب، عئسانین پالتارینین اَتهیئنه ال سورتدو. 21 چونکی اؤز-اؤزونه دیئردی: «آنجاق پالتارینا دَیسم بله، صاغالاجاغام.» 22 عئسا دؤندو و اونو گؤروب ددی: «اورهیئن اوزولمهسئن، قیزیم. ائمانین سنی صاغالتدی.» و آرواد او ساعات صاغالدی. 23 عئسا ریئسئن اِوئنه گلدئیی واخت، نوحهچئلر و شئون ادن جاماعاتی گؤردو. 24 و اونلارا ددی: «چکئلئن بورادان، چونکی قیز اؤلمهیئب، آنجاق یاتیب.» اونلار عئسایا گولدولر. 25 لاکئن جاماعات اشئیه چیخاردیلاندان سونرا، عئسا ائچهری گئردی و قیزین الئندن توتدو. قیز آیاغا قالخدی. 26 بونون خبری بوتون او دئیارا یاییلدی. ائکی کورلا بئر دئلسئزئن شفاسی 27 عئسا اورادان قاییدان واخت، دالینجا گدن ائکی کور قیشقیردیلار: «ای داوود اوغلو، بئزه یازیغین گلسئن!» 28 اِوه گئرندن سونرا کورلار اونون یانینا گلدئلر. عئسا اونلارا ددی: «آیا ائنانیرسینیز کی، بونو اتمهیه قودرتئم وار؟» کورلار ددئلر: «بلی آغا!» 29 او زامان عئسا اونلارین گؤزلرئنه ال قویوب ددی: «سئزه ائمانینیزا گؤره اولسون.» 30 کورلارین گؤزلری آچیلدی. عئسا اونلارا جئدّی تاپشیریب ددی: «باخین، هچ کئم بو بارهده بئر شی بئلمهسئن.» 31 آمّا اونلار چیخیب، اونون حاقّینداکی خبری او دئیارین هر یرئنه یایدیلار. 32 اونلار چیخاندان سونرا، ائبلئس الئنه توتولموش لال بئر آدامی عئسانین یانینا گتئردئلر. 33 ائبلئس قووولاندان سونرا، لال دانیشماغا باشلادی. خالق مات قالیب ددی: «ائسرایئلده بله بئر شی هچ واخت گؤرونمهیئب.» 34 آمّا فرئسئلر دیئردئلر: «او، ائبلئسلر ریئسئنئن گوجو ائله ائبلئسلری قووور.» محصول چوخ، ائشچی آز 35 عئسا بوتون شَهَرلر و کندلری گزئب اونلارین کنئسهلرئنده تعلئم ورئردی و پادشاهلیغین خوش خبرئنی وعظ ادئب، هر جور ناخوشلوغا و هر جور مرئضلئیه شفا ورئردی. 36 جاماعاتی گؤرن واخت، اونلارا اورهیی یانیردی، چونکی چوبانسیز قویونلار کئمی پرئشان و چارهسئز ائدئلر. 37 او واخت عئسا شاگئردلرئنه ددی: «محصول چوخ، آمّا ائشچی آزدیر. 38 اونا گؤره ده محصولون صاحئبی ربّه یالوارین کی، محصولونو ییغماق اوچون ائشچئلر گؤندَرسئن.» |
© Elam Ministries 2013. All rights reserved.
Elam Ministries