متّا 5 - موقدس کتابحقئقی شادلیق (لوقا 6:20-23) 1 عئسا جاماعاتی گؤرن زامان داغا چیخیب، اورادا اوتوردو. شاگئردلری ده یانینا گلدئلر. 2 و اونلارا تعلئم ورمهیه باشلاییب، ددی: 3 «خوش روحدا یوخسول اولانلارین حالینا، چونکی گؤیون پادشاهلیغی اونلاریندیر. 4 خوش یاسلی اولانلارین حالینا، چونکی اونلار تسلّی تاپاجاقلار. 5 خوش حلئملرئن حالینا، چونکی اونلار یری مئراث آلاجاقلار. 6 خوش صالحلئیه آج و سوسوز اولانلارین حالینا، چونکی اونلار دویاجاقلار. 7 خوش رحم ادنلرئن حالینا، چونکی اونلارا رحم اولوناجاق. 8 خوش اورهیی تمئز اولانلارین حالینا، چونکی اونلار تارینی گؤرهجکلر. 9 خوش باریشی ساخلایانلارین حالینا، چونکی اونلارا تارینین اوغوللاری دیئلهجک. 10 خوش او آداملارین حالینا کی، صالحلئک اوچون سئتم چکئرلر، چونکی گؤیون پادشاهلیغی اونلاریندیر. 11 خوش سئزئن حالینیزا او زامان کی، منه گؤره سئزی تحقئر ادئرلر، عذاب ورئرلر، و سئزه هر جور بؤهتان آتیرلار. 12 سوئنئن و شادلیق ادئن، چونکی گؤیدهکی اَجرئنئز بؤیوکدور! دوغرودان دا کی، سئزدن قاباق پیغمبرلره ده بله عذاب ورئبلر. دوز و نور (مرقوس 9:50؛ لوقا 14:34-35) 13 سئز یر اوزونون دوزوسونوز. آمّا اگر دوز دادینی اَلدن ورسه، نجه تکرار دوزلو اولا بئلر؟ آرتیق هچ بئر شیه فایداسی یوخدور، مگر اشئیه آتیلیب، ائنسانلارین آیاقلاری آلتیندا ازئلسئن. 14 سئز دونیانین نوروسونوز. داغ اوستونده قورولان شهر گئزلی قالا بئلمز. 15 آداملار دا چیراق یاندیریب، اونو قابین آلتینا قویمازلار. چیراقدانا قویارلار کی، اِوده اولانلارین هامیسینا ائشیق ورسئن. 16 بلهجه قویون سئزئن نورونوز ائنسانلارین حوضوروندا اله شاخسین کی، یاخشی عمللرئنئزی گؤرسونلر و گؤیدهکی آتانیزا حمد اتسئنلر. شرئعتئن یرئنه یتئشمهسی 17 گومان اتمهیئن کی، من شرئعتی و یا پیغمبرلرئن یازیلارینی پوزماغا گلمئشم؛ پوزماق اوچون یوخ، تاماملاماق اوچون گلمئشم. 18 چونکی دوغروسونو سئزه دیئرم، گؤی و یر آرادان گدهنه کئمی، شرئعتدن لاپ کئچئک بئر حرف و یا نؤقطه بله یوخ اولمایاجاق، اله کی، هامیسی یرئنه یتئشسئن. 19 بونا گؤره، هرکس بو لاپ کئچئک حرفلردن بئرئنی پوزسا و بله اتمهیی ائنسانلارا اؤیرتسه، گؤیون پادشاهلیغیندا او، لاپ کئچئک آدلاناجاق. لاکئن هرکس اونلارا عمل ادئب اؤیرتسه، گؤیون پادشاهلیغیندا بؤیوک آدلاناجاقدیر. 20 چونکی سئزه دیئرم کی، اگر سئزئن صالحلئیئنئز دئن عالئملری و فرئسئلرئن صالحلئیئندن آرتیق اولماسا، گؤیون پادشاهلیغینا اصلا گئرمیهجکسئنئز. آدام اؤلدورمک 21 اشئدئبسئنئز کی، قدئم زامانلارین آداملارینا دیئلمئشدی: ”آدام اؤلدورمه؛ کئم آدام اؤلدورسه، گَرَک موحاکئمه اولونسون!“ 22 آمّا من سئزه دیئرم؛ کئم قارداشینا سببسئز حئرصلَنسه، گَرَک موحاکئمه اولونسون. و کئم قارداشینا آخماق دسه، مئلّت محکمهسئنئن قاباغیندا خاطاکار اولاجاق. و کئم ”سن، ای آخماق“ دسه، جهنّم اودونا موستحق اولاجاقدیر. 23 بونا گؤره، اگر قوربانینی قوربانگاهین یانینا گتئردئیئن واخت، اورادا یادینا دوشسه کی، قارداشینین سندن بئر شئکایتی وار، 24 قوربانینی اورادا، قوربانگاهین یانیندا قوی. گت، اوّلجه قارداشینلا باریش و اوندان سونرا گل، قوربانینی تقدئم ات. 25 سندن شئکایتی اولان آداملا، یولدا ائکن تز صولح ات، یوخسا سنی حاکئمه وِرَر، حاکئم ده سنی مأمورا وِرَر و زئندانا آتیلارسان. 26 دوغروسونو سنه دیئرم، آخیر قارا پولونو ورمهدن، اورادان اصلا چیخمایاجاقسان. زئنا و بوشانما 27 اشئدئبسئنئز کی، قدئم زامانلارین آداملارینا دیئلئب: ”زئنا اتمه!“ 28 آمّا من سئزه دیئرم: بئر آروادا شهوتله باخان هر آدام، اورهیئنده اونونلا زئنا اتمئش اولور. 29 اگر صاغ گؤزون سنی پئس یولا چکسه، اونو چیخارت و اؤزوندن آتگتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان داها یاخشیدیر. 30 اگر صاغ الئن سنی پئس یولا چکسه، اونو کس و اؤزوندن آتگتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان داها یاخشیدیر. 31 اشئدئبسئنئز کی، دیئلئب: ”کئم آروادینی بوشاسا، اونا بوشانما کاغیذی ورسئن!“ 32 آمّا من سئزه دیئرم، هرکس کی، آروادینی زئنادان باشقا، اؤزگه بئر سببه گؤره بوشاسا، اونو زئنایا سالیر. هر کس ده کی، بوشانمیش آروادلا اِولهنئر، اونونلا زئنا ادئر. آند ائچمک 33 گئنه، اشئدئبسئنئز کی، قدئم زامانلارین آداملارینا دیئلئب: ”یالان یره آند ائچمه و ربّه اتدئیئن نذئرلری یرئنه یتئر!“ 34 آمّا من سئزه دیئرم: هچ واخت آند ائچمهیئن؛ نه گؤیه، چونکی او، تارینین تختیدئر، 35 نه یره، چونکی اونون آیاقلاری اوچون آیاقآلتیدیر، نه ده اورشلئمه، چونکی او، بؤیوک پادشاهین شهریدئر. 36 باشینیزا دا آند ائچمهیئن، چونکی بئر دنه ده اولسا، ساچی آغ و یا قارا اده بئلمزسئنئز. 37 آنجاق ”بَلئنئز، بلی“ اولسون و ”خِیرئنئز، خیر“؛ بوندان آرتیغی شرئردندئر. گؤزه گؤز، دئشه دئش (لوقا 6:29-30) 38 اشئدئبسئنئز کی، دیئلئب: ”گؤزه گؤز، دئشه دئش.“ 39 آمّا من سئزه دیئرم: پئسلئیئن قاباغیندا موقاوئمت اِتمهیئن. کئم اوزونوزون صاغ طرفئنه وورسا، اونا سول طرفئنی ده چوئرئن. 40 و اگر بئری محکمهیه گدئب، کؤینهیئنئزی آلماق ائستهسه، اونا اوست پالتارینی دا ورئن. 41 کئم سنی مئن مئل یول گِتمَیه زور اتسه، اونونلا ائکی مئن مئل گت. 42 سندن بئر شی ائستهینه ور و سندن بورج ائستهینه اوز چوئرمه. 43 اشئدئبسئنئز کی، دیئلئب: ”اؤز قونشونو سِو و دوشمنئندن نئفرت ات.“ 44 آمّا من سئزه دیئرم: دوشمنلرئنئزی سوئن و سئزی ائنجئدئب، اذئیّت ورنلر اوچون دوعا ادئن کی، 45 گؤیده اولان آتانیزین اوغوللاری اولاسینیز. چونکی او، اؤز گون ائشیغینی هم یامان آداملارین، هم ده یاخشی آداملارین اوستونه سالیر. یاغیشنی دا هم صالح اولانلارین، هم ده صالح اولمایانلارین اوستونه یاغدیریر. 46 اگر آنجاق سئزی سِوَنلری سِوهسئنئز، سئزئن نه اجرئنئز اولاجاق؟! مگر باج ییغانلار دا بله اتمئرلر؟! 47 و اگر آنجاق اؤز قارداشلارینیزی سالاملایاسینیز، نه آرتیق بئر شی ادئرسئنئز؟! مگر بوتپرستلر ده اله اتمئرلر؟! 48 بونون اوچون، گؤیدهکی آتانیز کئمی، سئز ده کامئل اولون. |
© Elam Ministries 2013. All rights reserved.
Elam Ministries