لاوئلیلر 8 - موقدس کتابهارونلا اوغوللارینین کاهئنلئیه تقدئس اولونماسی (چیخیش ۲۹:۱-۳۷) 1 رب موسایا ددی: 2 «هارونلا اوغوللارینی، کاهئن پالتارلارینی، مسح یاغینی و گوناه قوربانی کسمک اوچون گامیشی، ائکی قوچو و مایاسیز چؤرک سبدئنی گؤتور. 3 و بوتون جاماعاتی حوضور چادیرینین گئرئشئنه ییغ.» 4 موسا ربّئن امرئنه عمل اتدی. جاماعات حوضور چادیرینین گئرئشئنه ییغیلاندا 5 موسا اونلارا ددی: «یرئنه یتئرهجَیئمئز ربّئن امر اتدئیی بودور.» 6 سونرا موسا هارونلا اوغوللارینی ائرهلی گتئرئب، اونلاری سودا غوصل وردی. 7 هارونون اَینئنه خئرقهنی گیئندئرئب، بلئنه قورشاغینی باغلادی و اوستوندن جوبّهنی گیئندئردی. سونرا اِفودو اوستونه قویدو و اِفودون کمرئنی بلئنه باغلاییب بَرکئتدی. 8 اِفودون اوستونه دؤشلویونو، دؤشلویونه ده اورئم و تومّئمی یرلشدئردی. 9 اونون باشینا عمّامهنی، عمّامهنئن قاباق حئصّهسئنه قیزیل لؤوحهجئیی، موقدّس تاجی قویدو. نجه کی، رب موسایا امر اتمئشدی. 10 سونرا موسا مسح یاغینی گؤتوروب، خیمهنی و ائچئندهکی هر شیی مسح ادئب، تقدئس اتدی. 11 مسح یاغینی قوربانگاها یدّی دفه سَپدی، قوربانگاه و اونونلا بوتون اسبابلارینی، بؤیوک لَیَنله آلتلیغینی تقدئس اتمک اوچون مسح اتدی. 12 سونرا مسح یاغیندان بئر آز هارونون باشینا تؤکوب، اونو تقدئس اتمک اوچون، مسح اتدی. 13 سونرا موسا هارونون اوغوللارینی ائرهلی گتئردی، اونلارا خئرقه گیئندئردی، بِللرئنه قورشاق باغلادی و باشلارینا پاپاق قویدو. نجه کی، رب موسایا امر اتمئشدی. 14 بوندان سونرا موسا گوناه قوربانی اوچون نظرده توتولموش گامیشی گتئردی. هارون و اوغوللاری بو گامیشین باشینا اللرئنی قویدولار. 15 موسا گامیشی کسدی، قانینی گؤتوروب بارماغی ائله قوربانگاهین بوینوزلارینین هر طرفئنه چکدی و قوربانگاهی تطهئر اتدی. سونرا قانین قالان حئصّهسئنی قوربانگاهین آلتلیغینا تؤکدو و اونا کفّاره اتمک اوچون تقدئس اتدی. 16 موسا حیوانین ائچآلاتینین اوستوندهکی بوتون پئیی، قارا جئیهرئن قویروغا بَنزهر حئصّهسئنی، هر ائکی بؤیرهیی پئیی ائله گؤتوردو و قوربانگاهدا توستولهدئب یاندیردی. 17 لاکئن گامیش و دَرئسئنی، اَتئنی و باغیرساغینی دوشَرگهنئن اِشئیئنده اوددا یاندیردی. نجه کی، رب موسایا امر اتمئشدی. 18 سونرا یاندیرما قوربانی اوچون نظرده توتولموش قوچو گتئردی. هارون و اوغوللاری اللرئنی قوچون باشینا قویدولار. 19 موسا قوچو کسدی و قانینی قوربانگاهین هر طرفئنه سَپدی. 20 قوچو تئکه-تئکه دوغرادی؛ باشینی، تئکهلرئنی و پئیئنی توستولهدئب یاندیردی. 21 ائچ آلات و آیاقلارینی سو ائله یویاندان سونرا، موسا بوتون قوچو قوربانگاهدا توستولهدئب یاندیردی. بو، خوش عطئر اوچون یاندیرما قوربانی ائدی؛ بو ربّه خوش عطئر اوچون، اودلا تقدئم اولونان قوربان ائدی. نجه کی، رب موسایا امر اتمئشدی. 22 سونرا موسا او بئری قوچو یعنی تقدئس قوچونو گتئردی؛ هارون و اوغوللاری اللرئنی قوچون باشینا قویدولار. 23 موسا اونو کسدی؛ قانیندان بئر آز گؤتوروب، هارونون صاغ قولاغینین مَرجهیئنه، صاغ الئنئن و صاغ آیاغینین باش بارماغینا چکدی. 24 هارونون اوغوللارینی دا گتئرئب، اونلارین صاغ قولاق مَرجکلرئنه، صاغ اللرئنئن باش بارماقلارینا و صاغ آیاقلارینین باش بارماقلارینا قان چکدی. سونرا قانین قالانینی قوربانگاهین هر طرفئنه سَپدی. 25 موسا پئیئنی، قویروغونو، ائچآلاتینین اوستوندهکی بوتون پئیی، قارا جئیهرئنئن قویروغا بَنزهر حئصّهسئنی، هر ائکی بؤیرهکله پئیئنی و صاغ بودونو گؤتوردو. 26 ربّئن قاباغیندا اولان مایاسیز چؤرکلر سبدئندن، بئر مایاسیز چؤرهیی، یاغلا قاتیلمیش چؤرک کؤکهسی، و بئر کولچه گؤتوردو و پئی ائله صاغ بودون اوستونه قویدو. 27 سونرا بونلارین هامیسینی هارون و اونون اوغوللارینین اللرئنه وردی کی، ربّئن حوضوروندا یِللَتمه تقدئمی اولاراق تقدئم اتسئن. 28 سونرا موسا بو شیلری اونلارین اللرئندن آلدی و قوربانگاهدا یاندیرما قوربانی ائله توستولهدئب یاندیردی. بونلار، خوش عطئر اوچون تقدئس قوربانی ائدی؛ اودلا ربّه تقدئم اولان بئر قوربان ائدی. 29 موسا دؤش اَتئنی گؤتوردو و اونو ربّئن حوضوروندا یِللَتمه تقدئمی اولاراق تقدئم اتدی. بو، تقدئس قوربانی اولان قوچدان موسانین پایی ائدی، نجه کی، رب موسایا امر اتمئشدی. 30 موسا مسح یاغیندان و قوربانگاهداکی قاندان بئر آز گؤتوروب، هارونا، اونون پالتارلارینا، اوغوللارینا و اونلارین پالتارلارینا سَپدی. بلهجه، هارونو و اونون پالتارلارینی، اوغوللارینی و اونلارین پالتارلارینی تقدئس اتدی. 31 سونرا موسا هارونلا اوغوللارینا ددی: «اَتی حوضور چادیرینین گئرئشئنده قاینادین و و اورادا اونو تقدئس تقدئمئنئن سبدئنده اولان چؤرکله ییئن. نجه کی، امر ادئب ددئم: ”هارون و اوغوللاری اونو یئیهجکلر.“ 32 چؤرهیئن و اَتئن قالان حئصّهلری اوددا یاندیریلسین. 33 تقدئس گونلرئنئز باشا چاتانا قدر، یدّی گون حوضور چادیرینین گئرئشئندن قیراغا چیخمایین؛ او گونه کئمی کی، سئزئن وظئفهیه کچمه واختینیز حله باشا چاتماییب. چونکی او سئزی یدّی گون ائچئنده وظئفهیه قویاجاق. 34 رب اونون اوچون بو گون ادئلَن هر شیئن اولماسینی امر اتدی کی، سئزی کفّاره اتسئن. 35 یدّی گون، گجه-گوندوز حوضور چادیرینین گئرئشئنده قالین و ربّئن امرئنی رئعایت ادئن کی، اؤلمهیهسئنئز. چونکی منه بله امر ورئلئب.» 36 بلهجه هارونلا اوغوللاری، ربّئن موسا واسئطهسیائله امر اتدئیی هر شیه عمل اتدئلر. |
© Elam Ministries 2013. All rights reserved.
Elam Ministries