لاوئلیلر 6 - موقدس کتاب1 رب موسایا ددی: 2 «او زامان کی، بئر آدام ربّئن ضئدّئنه گوناه ادئب وفاسیزلیق ادئر و آیری آدامدان آلدیغی گئروو و یا امانتده حئیله ائشلهدئر، یا دا اوغورلاییر، یا دا اونو سویور، 3 و یا ائتمئش بئر شیی تاپیب او بارهده یالان دیئب آند ائچئر، اله آدام گوناه ائشلهدئب اتدئیی هر هانسی بئر شیدن اؤتری گوناهکار چیخیر، 4 گوناه اتدئیئنی و تقصئرئنی بئلَنده، قوی سویاراق و یا ناحاقلیقلا گؤتوردویو اشیانی، و یا یانیندا اولان امانت و گئرووو، و یا تاپدیغی ائتمئش شیی، 5 و یا اونا گؤره یالاندان آند ائچدئیی هر شیی تامام-کامال قایتارسین؛ اشیانین اساس دَیَرئنئن اوستونه بِشده بئرئنی ده علاوه ادئب تقصئر قوربانینی تقدئم ادن گون، صاحئبئنه ورسئن. 6 سونرا سوروسوندن عیبسئز و سنئن قئیمت قویدوغونا موطابئق بئر قوچ، تقصئر قوربانی اولاراق، ربّه تقدئم اوچون کاهئنئن یانینا گتئرسئن. 7 بونونلا کاهئن ربّئن حوضوروندا او آدام اوچون کفّاره اتسئن و گوناه ادن آدام تقصئرئنه سبب اولدوغو هر شیدن باغیشلانار.» کاهئنلر اوچون تقدئملر و قوربانلار بارهده تعلئمات 8 رب موسایا ددی: 9 «هارونلا اوغوللارینا امر ادئب دِه: ”یاندیرما قوربانی بارهده قانون بودور: یاندیرما قوربانی بوتون گجه سحره قدر قوربانگاهداکی اود اوستونده قالسین، قوربانگاهین اودو گرک سؤنمهدن یانسین. 10 کاهئن کتان پالتارینی، کتان آلت پالتارینی اَینئنه گیئب، یاندیرما قوربانینین کولونو کی، قوربانگاهدا اود اوستونده یانیب کول اولوب، گؤتورسون و او کولو قوربانگاهین یانینا قویسون. 11 سونرا کاهئن پالتارینی چیخاردیب، آیری پالتار گیئنسئن و کولو دوشَرگهدن قیراغا داشیییب پاک بئر یره تؤکسون. 12 قوربانگاهدا یانان اود گرک یانار ساخلانسین و سؤنمهسئن. لاکئن کاهئن هر سحر اونون اوستونده اودون یاندیرسین، اوستونه یاندیرما قوربانینی دوزسون و باریش قوربانلارینین پئیئنی اونون اوستونده توستولهدئب یاندیرسین. 13 قوربانگاهدا یانان اود گرک همئشه یانار ساخلانسین و سؤنمهسئن. 14 تاخیل تقدئمی بارهده قانون بودور: هارون اؤولادلاری بونو ربّئن حوضوروندا قوربانگاهین قاباغیندا تقدئم اتسئنلر. 15 سونرا اونلاردان بئری بئر اوووج تاخیل تقدئمئنئن نارین اونونو، یاغی و اوستوندهکی بوتون کوندورله گؤتورسون و قوربانگاهین اوستونده توستولهدئب یاندیرسین؛ بو ربّه خوش عطئر اوچون، خاطئره تقدئمیدئر. 16 تقدئمئن قالان حئصّهسئنی هارونلا اؤولادلاری یسئنلر؛ اونو موقدّس بئر یرده-حوضور چادیرینین حیطئنده مایاسیز چؤرک کئمی یسئنلر. 17 بو، مایا ائله گرک پئشئرئلمهسئن. من اونو، منه یاندیریلان تقدئملرئمدن کاهئنلره دوشَن پای کئمی ورمئشم. او، گوناه قوربانی و تقصئر قوربانی کئمی لاپ موقدّسدئر. 18 هارون اؤولادلاریندان هر اِرکَک، اوندان یسئن. بو، ربّه اودلا تقدئم اولانلاردان سئزئن نسئللرئنئزه ابدی بئر قایدادیر. اونلارا توخونان هر کس موقدّس ساییلیر.“» 19 سونرا رب موسایا ددی: 20 «هارونون مسح اولاناجاغی گون، هارونلا اوغوللارینین ربّه ادهجکلری تقدئم بودور: دائمی تاخیل تقدئمی اولاراق نارین اوندان اِفانین اوندا بئری، یاریسی سحر، یاریسی دا آخشام، 21 یاغلا ساجدا حاضیرلانسین. یاخشی قاریشیلدیغی زامان اونو گتئرئن. بو تاخیل تقدئمئنی تئکه-تئکه قیزارمیش، ربّه خوش عطئر اولاراق گتئرئن. 22 اونو او کاهئن تقدئم اتسئن کی، هارون اوغوللاریندان مسح اولونوب و اونون یرئنه کچئب؛ ابدی بئر قایدایا گؤره، بو گرک تامامن توستولهدئلئب یاندیریلسین. 23 بلهجه کاهئنئن گتئردئیی هر تاخیل تقدئمی تامامن یاندیریلسین؛ او یِیئلمَزدئر.» 24 سونرا رب موسایا ددی: 25 «هارونلا اوغوللارینا بله دِه: ”گوناه قوربانی بارهده اولان قانون بودور: گوناه قوربانی، یاندیرما قوربان کَسئلَن یرده ربّئن حوضوروندا کَسئلسئن. بو قوربان لاپ موقدّسدئر. 26 گوناه قوربانینی تقدئم ادن کاهئن اونو یسئن. او گرک موقدّس بئر یرده، حوضور چادیرینین حیطئنده یِیئلسئن. 27 اونون اَتئنه توخونان هر بئر شی موقدّس ساییلار؛ او قوربانین قانیندان هر پالتارا سیچراسا، او پالتار گرک موقدّس بئر یرده یویولسون. 28 اَتئن پئشئرئلدئیی ساخسی قاب دا سیندیریلسین؛ اگر او بورونج قابدا پئشئرئلئب، اوندا بو قاب اووولوب، سو ائله یاخالانسین. 29 کاهئن نسلئندن هر اِرکَک اونو یسئن؛ او لاپ موقدّسدئر. 30 لاکئن گوناه قوربانیندان کی، اونون قانی کفّاره اوچون حوضور چادیرینا گتئرئلئب، یِیئلمهسئن. او قوربان اوددا یاندیریلمالیدیر. |
© Elam Ministries 2013. All rights reserved.
Elam Ministries