لاوئلیلر 21 - موقدس کتابکاهئنلره عایید قانونلار 1 سونرا رب موسایا ددی: «هارون نسلئندن اولان کاهئنلرله دانیش و اونلارا بله دِه: ”هچ کاهئن اؤز خالقی آراسیندان اولان هر هانسی بئر مِیئته گؤره اؤزونو نجئس اتمهسئن؛ 2 مگر کاهئنئن اؤز یاخین قوحومو اولسون؛ آناسی، آتاسی، اوغلو، قیزی، قارداشی، 3 یانیندا یاشایان باکئره سوبای باجیسی دا. کاهئن بو باجیسینا گؤره ده اؤزونو نجئس اده بئلر. 4 کاهئن، اِولئلئک سببی ائله اونا قوحوم اولانین مِیئتی ائله ده اؤزونو نجئس ادئب لَکَلَمهسئن. 5 کاهئنلر باشلارینین هچ بئر حئصّهسئنی قیرخماسینلار، ساقّاللارینین کنارینی کسمهسئنلر، بدنلرئنه ده یارا وورماسینلار. 6 اونلار تاریلاری اوچون موقدّس اولسونلار و اونون آدینی لَکَلَمهسئنلر، چونکی اونلار اودلا ربّه تقدئم گتئرئرلر، یعنی تاریلارینا پای گتئرئرلر؛ بونا گؤره ده موقدّس اولمالیدیرلار. 7 کاهئنلر فاحئشهلئکله لکهلنمئش، و یا اَرئندن بوشانمیش آروادی دا آرواد آلماسینلار، چونکی کاهئن تاریسی اوچون موقدّسدئر. 8 اونو موقدّس سای، چونکی تارینیزا گتئرئلن پایی، او تقدئم ادئر؛ او سنئن اوچون موقدّس اولسون، چونکی من، سئزی تقدئس ادن رب، موقدّسم. 9 فاحئشهلئکله لَکَلهنن کاهئن قیزی، آتاسینی دا لَکَلهیئب؛ بو قیز اوددا یاندیریلمالیدیر. 10 قارداشلاری آراسیندا اوستون اولان، باشیندا مسح یاغی ائله مسح اولونان، و کاهئنلئک پالتارلاری گئین باش کاهئن نه ساچینی داغیتسین، نه ده اَینئندهکی پالتارینی جیرسین. 11 بو کاهئن هچ بئر مِیئته، حتّا اؤلن آتا-آناسینا یاخینلاشیب اؤزونو نجئس اتمهسئن. 12 او، موقدّس مکانی نه ترک اتسئن، نه ده تاریسینین موقدّس مکانینی لَکَلهسئن، چونکی تاریسینین نئشانهسی اولان مسح یاغی اوستوندهدئر. رب منم. 13 بو کاهئن اؤزونه باکئره بئر قیز آرواد آلسین؛ 14 دول، بوشانمیش و یا فاحئشهلئکله لکهلَنمئش آرواد یوخ، آنجاق اؤز خالقیندان اولان باکئره قیز آلسین کی، 15 اؤولادلارینی، خالقی آراسیندا لکهلی اتمهسئن. اونو تقدئس ادن رب، منم.“» 16 سونرا رب موسایا ددی: 17 «هارونا دانیشیب اونا ده: ”نسئلدن-نسئله اؤولادلاریندان معیوب اولان آدام، تاریسینا پای تقدئم اتمک اوچون یاخینلاشماسین. 18 معیوب اولان هچ کس بو خئدمته یاخینلاشماسین؛ نه کور، نه آخساق، نه عِیبهجَر، نه علئل، 19 نه اَل-آیاغیندان شئکست، 20 نه قوزبِل، نه جیرتدانبوی، نه گؤزو معیوب، نه خورالی، و یا دَمروولو، نه آختا - 21 کاهئن هارونون نسلئندن اولان هر کسئن کی، بدنئنده بئر عیبی وار، ربّئن یاندیرما تقدئملرئنی تقدئم اتمک اوچون یاخینلاشماسین. او، تاریسینا پای تقدئم اتمک اوچون یاخینلاشمامالیدیر. 22 بله آدام تاریسینا گتئرئلن پایدان، هم لاپ موقدّس یمکدن، هم ده موقدّس یمکدن یئیه بئلر. 23 لاکئن او، بدنئنده معیوب اولدوغونا گؤره نه موقدّس پردهیه یاخینلاشسین، نه ده قوربانگاها. اله کی، موقدّس مکانلاریمی لَکَلَمهسئن. چونکی اونلاری تقدئس ادن رب، منم.“» 24 موسا هارونلا اوغوللارینا و بوتون ائسرایئل اؤولادلارینا بله ددی. |
© Elam Ministries 2013. All rights reserved.
Elam Ministries