لاوئلی‌لر 2 - موقدس کتاب

تاخیل تقدئمی

¹ کئمسه ربّه تاخیل تقدئمی گتئرسه، تقدئمی نارین اون اولسون، اوستونه ده یاغ تؤکوب، کوندور قویسون.

² اونو هارون نسلئندن گلن کاهئنلره گتئرسئن. کاهئن بئر اوووج نارین اونلا یاغ و کوندورون هامیسینی گؤتوروب، قوربانگاهدا خاطئره تقدئمی اولاراق توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.

³ تاخیل تقدئمئنئن قالان حئصّه‌سی هارونلا اؤولادلارینا عایید اولسون. بو حئصّه رب اوچون اودلا اولونان تقدئملردن لاپ موقدّسی‌دئر.

⁴ تندئرده پئشئرئلمئش تاخیل تقدئمی گتئرنده، یاغلا قاتیشمیش نارین اوندان دوزَ‌لمئش مایاسیز فطئرلر، یا دا اوستونه یاغ سورتولموش مایاسیز کولچه‌لر تقدئم ات.

⁵ اگر تقدئمئن ساجدا پئشمئش تاخیل تقدئمی‌دئر، گرک نارین اوندان، مایاسیز و یاغلا قاتیشمیش اولسون.

⁶ اونو تئکه-تئکه اده‌جکسن و اوستونه یاغ تؤکه‌جکسن. بو، تاخیل تقدئمی‌دئر.

⁷ اگر تقدئمئن تاوادا پئشَن تاخیل تقدئمی‌دئر، او گرک نارین اون و یاغلا حاضیرلانسین.

⁸ بو شیلرله حاضیرلانان تاخیل تقدئمئنی ربّئن یانینا گتئرنده، او گرک کاهئنه ورئلسئن و کاهئن تقدئمی قوربانگاها آپارسین.

⁹ کاهئن بو تاخیل تقدئمئندن، خاطئره تقدئمی اولان اون پایی گؤتوروب، اونو قوربانگاهدا توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.

¹⁰ تاخیل تقدئمئنئن قالان حئصّه‌سی هارونلا اؤولادلارینا عایید اولسون. بو حئصّه اودلا ربّه اولونان تقدئملردن لاپ موقدّسی‌دئر.

¹¹ ربّه گتئردئیئن هچ بئر تاخیل تقدئمی، مایالی خمئردن حاضیرلانماسین. ترکئبئنده مایا و یا بال اولان تقدئم رب اوچون گتئرئلسئن. توستوله‌دئلئب یاندیریلماسین.

¹² محصولون ائلک ثمرئنی ائلک محصول تقدئملری اولاراق ربّه گتئرئن. آمّا خوشا گلن عطئر کئمی قوربانگاهدا تقدئم اولونماسین.

¹³ تاخیل تقدئملرئنئن هر بئرئنی دوزلا؛ بله‌جه تارینین عهدئنئن دوزونو تاخیل تقدئمئندن قییما؛ بوتون تقدئملرئنی دوزلا.

¹⁴ اگر سن ربّه نوباریندان تاخیل تقدئمئنی گتئرئرسن، اوندا تزه تاخیل باشلارینی اوددا قوووروب، یارماسینی نوبار تاخیل تقدئمی اوچون تقدئم ات.

¹⁵ اونون اوستونه یاغ تؤک، کوندور قوی. بو، تاخیل تقدئمی‌دئر.

¹⁶ کاهئن بئر آز یارمانی یاغی ائله گؤتوروب، بوتون کوندورو ائله اونون خاطئره تقدئمئنی توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.