اِرِمیا 6 - موقدس کتاباورشلئمئن موحاصئرهسی 1 ای بِنیامئن اؤولادلاری، اورشلئمئن ائچئندن قاچیب قورتارین. تِقوعهده کَرهنای چالین، بِیتهَکّرِمده بئر ائشاره قویون، چونکی شئمالدان فلاکت، و بؤیوک بئر قیرغین ظاهئر اولور. 2 من گؤزل و ظرئف قیزی، صحیون قیزینی کَسئب آتاجاغام. 3 چوبانلار اؤز سورولری ائله اونون یانینا گلهجکلر، اونون اطرافیندا هر طرفدن چادیر قوراجاقلار. هر کس اؤز یِرئنده سوروسونو اوتاراجاق. 4 صحیون قیزینین ضئدّئنه دؤیوش اوچون حاضیرلاشین! قالخین، گلئن، گون اورتا چاغی هوجوم اِدَک! وای حالیمیزا، چونکی گون توتقونلاشیر، آخشام کؤلگهلری اوزانیر. 5 قالخین، گلئن، گجه واختی هوجوم اِدَک! اونون سارایلارینی داغیداق! 6 چونکی قوشونلار ربّی بله دیئر: «آغاج کَسئن، اورشلئمئن قاباغیندا سنگر قورون. بو شهر جزالانمالیدیر، چونکی ظولمله دولوب-داشیر. 7 بئر بولاقدان سو نجه آخیر، بو شهردن ده پئسلئک اِله فیشقیریر. ائچئنده قدّارلیق و سویغونچولوق سَسی اِشئدئلئر. گؤزومون قاباغیندا دائم درد و یارا وار. 8 ای اورشلئم، عئبرت آل، یوخسا جانیم سندن آیریلار، سنی خارابایا، اَهالئسئز تورپاغا چِوئرهرم.» 9 قوشونلار ربّی بله دیئر: «تَنَکدن آخیر اوزوملر ییغیلان کئمی، ائسرایئلئن قالان اهالئسی ده ییغیلیب قورتاراجاق. اوزومییغان کئمی گئنه مِینه بوداقلارینا اَلئنی اوزات.» 10 کئمئنله دانیشیم، کئمه ائخطار ورئم کی، قولاق آسسین؟ باخ، قولاقلاری باغلیدیر، اِشئده بئلمئرلر. باخ، ربّئن سؤزوندن عار ادئرلر، اوندان خوشلاری گلمئر. 11 آمّا من ربّئن قضبی ائله دولموشام، اؤزومون قاباغینی توتماقدان یورولموشام. «قضبئنی کوچهده اولان اوشاقلارین، ییغیلان جاوانلارین اوستونه تؤک. بلی، اَر ده، آرواد دا، قوجا دا، یاشا دولموش آدام دا بئرلئکده اسئر اولاجاق. 12 اِولری، زَمئلری، و آروادلاری دا باشقالارینا ورئلهجک. چونکی اَلئمی اؤلکهده یاشایانلارین ضئدّئنه اوزاداجاغام.» رب بویورور. 13 «اونا گؤره کی بؤیوکدن کئچئیه قدر، هر کس حارام قازانج دالینجا قاچیر. پیغمبردن کاهئنه قدر هر کس حئیله قورور. 14 خالقیمین یاراسینی سؤزده یاخشیلاشدیریرلار، ”صولح، صولح“ دیئرلر، آمّا صولح یوخدور. 15 اتدئکلری ائیرنج ائشلر اوچون مگر اوتانیردیلار؟ یوخ، اصلا اوتانمیردیلار، اوتانیب قیزارماق دا بئلمئردئلر. بونا گؤره ده ییخیلانلار آراسیندا اونلار دا اولاجاقلار. من اونلاری جزالاندیردیغیم واخت یِره سَرئلهجکلر.» رب بویورور. 16 رب بله دیئر: «یوللار قیراغیندا دایانیب باخین، ازلدن اولان طرئقلری سوروشون. یاخشی یولون هارادا اولدوغونو اؤیرهنئن، او یوللا گدئن. او واخت جانینیز دئنجلئک تاپار. لاکئن اونلار ددئلر: ”او یوللا گتمیهجیئک.“ 17 من سئزئن اوستونوزه کشئکچئلر قویوب ددئم: ”کَرهنای سَسئنه قولاق آسین!“ آمّا اونلار ددئلر: ”قولاق آسمایاجاغیق.“ 18 بونا گؤره ده، ای مئلّتلر، قولاق آسین، ای جاماعات، باشلارینا نه گلهجیئنی بئلئن. 19 اشئت، ای یِر اوزو، باخ، من بو خالقین باشینا فلاکت گتئرئرم. بو اونلارین نئیّتلرئنئن نتئجهسی اولاجاق. چونکی منئم سؤزلرئمه قولاق آسماییبلار، قانونومو دا ردّ ادئبلر. 20 شِبادان گتئرئلَن کوندور، اوزاق اؤلکهدن گلمئش عطئرلی قامیش نهیئمه لازیمدیر؟ یاندیرما قوربانلارینیز منه مقبول دیئل، قوربانلارینیز منه خوش دیئل.» 21 بونا گؤره ده رب بله دیئر: «باخ، من بو خالقین قاباغینا مانعلر قویاجاغام. آتالار و اوغوللار بئرلئکده اونلارا ائلئشئب ییخیلاجاقلار. قونشو دوستو ائله بئرلئکده هلاک اولاجاق.» 22 رب بله دیئر: «باخ، شئمال اؤلکهسئندن بئر خالق گلئر، دونیانین اوزاق یِرلرئندن بؤیوک بئر مئلّت قالخاجاق. 23 اوخ-کامان و نئزه ائله سئلاحلانمیش، قدّار و رحمسئزدئرلر. آتلارین اوستونده گلرکَن، سَسلری دهنز کئمی گورلاییر. دؤیوشه حاضیر دؤیوشچولر کئمی، قاباغیندا دوزولهجکلر کی، سنه هوجوم اتسئنلر، ای صحیون قیزی!» 24 اونلارین خبرئنی اشئتمئشئک، اَللرئمئز یانیمیزا دوشوب. دوغان آرواد کئمی اونو آغری و سانجی توتوب. 25 چؤله چیخما، یولا دوشمه، چونکی دوشمنده قیلینج وار، هر طرفده دهشت وار. 26 ای منئم خالقیمین قیزی، چول گِیئن، کولده یووارلان. یگانه اوغلونا یاس توتان کئمی یاس توت و آجی-آجی آغلا. چونکی محو ادن، قَفلَتَن باشیمیزین اوستونو آلاجاق. 27 «ای اِرِمیا، من سنی قویموشام کی، خالقیمی یوخلاییب ائمتاحان ادهسن، اونلارا نظر قویوب عمللرئنی ائمتاحان ادهسن. 28 هامیسی عئنادکار عوصیانچیدیر، نَمّاملیق اوچون گَزئرلر. بورونج و دمئر کئمی بَرکدئرلر، هامیسی فاسئد اولوب. 29 کؤروک شئدّتله اوفورور، قورغوشون اود ائچئنده اَرئیئر. دمئرچی عبث یِره اَرئدئر، چونکی پئسلر آیریلمیرلار. 30 اونلارا ”آتیلمیش گوموش“ دئیهجکلر، چونکی رب اونلاری آتیب.» |
© Elam Ministries 2013. All rights reserved.
Elam Ministries