یعقوب 5 - موقدس کتاب

¹ باخین ائندی، ای وارلی‌لار! باشینیزا گله‌جک موصئبتلردن اؤتری آغلایین و شئون ادئن.

² مال-دؤولتئنئز چورویوب، پالتارینیزی دا گووه ییئب.

³ قیزیل و گوموشونوز پاسلانیب و اونلارین پاسی ضئدّئنئزه بئر شاهئد اولاجاق و اود کئمی جئسمئنئزی یئیه‌جک. سئز آخیر گونلرئنئزده ثروت ییغیبسینیز!

⁴ باخین، زمئلرئنئزی بئچن ائشچئلردن ساخلادیغینیز موزد، سئزئن ضئدّئنئزه قیشقیریر. بئچئنچئلرئن قیشقیرتیسی فوجلار ربّئنئن قولاقلارینا چاتیب.

⁵ سئز یر اوزونده کفله یاشاییبسینیز و لذّت دولو بئر حیات کچئردئبسئنئز. قحطی گونده اورَکلرئنئزی کؤکَلدئبسئنئز!

⁶ صالح آدامی محکوم ادئب، اؤلومه ورئبسئنئز؛ او سئزئن قاباغینیزدا موقاوئمت اتمئر.

⁷ بونا گؤره، قارداشلار، ربّئن گلئشئنه کئمی صبئرلی اولون. اکئنچی تورپاغین دیرلی حاصئلی اوچون ائنتئظار چکئر و ائلک و آخیر یاغیشی آلاناجاق صبئرلی اولور.

⁸ سئز ده صبئرلی اولون. اورَکلرئنئزی قووّتلندئرئن. چونکی ربّئن گلئشی یاخیندیر.

⁹ بئربئرئنئزئن ضئدّئنه شئکایت اتمه‌یئن، قارداشلار! اِله کی، سئز اؤزونوز ده موحاکئمه اولونمایاسینیز. باخین، موحاکئمه ادن، قاپی آغزیندا دایانیب.

¹⁰ قارداشلار، عذاب چکمکده و صبئرلی اولماقدا ربّئن آدیندا دانیشان نَبئلردن نومونه آلین.

¹¹ بئز تحمّول ادنلری بختور ساییریق. سئز اَیّوبون تحمّولونو اشئدئبسئنئز و ربّئن اتدئیئنئن نتئجه‌سئنی ده گؤروبسونوز کی، رب چوخ شفقتلی و مرحمتلی‌دئر.

¹² لاکئن، قارداشلاریم، هامیدان اوّل، نه گؤیه، نه یره، نه ده باشقا بئر شیه آند ائچئن؛ لاکئن سئزده قوی «بلی»، بلی اولسون و «خیر»، خیر اولسون اِله کی، موحاکئمه‌یه چکئلمه‌یه‌سئنئز.

¹³ آیا آرانیزدا عذاب آلتیندا اولان بئری وار؟ او، گرک دوعا اتسئن. آیا شاد اولان بئری وار؟ او، حمدلر اوخومالی‌دیر.

¹⁴ آیا آرانیزدا ناخوش بئری وار؟ او گرک کئلئسانین آغساقّاللارینی چاغیرسین. اونلار دا گرک اونون اوچون دوعا ادئب، ربّئن آدیندا اونو یاغلا مسح اتسئنلر.

¹⁵ و ائماندا ادئلن دوعا ناخوش آدامی صاغالدار و رب اونو قالدیرار. گوناهلار اتمئش اولسا دا، اونا باغیشلانار.

¹⁶ بونون اوچون، گوناهلارینیزی بئربئرئنئزه اعتئراف ادئن و بئربئرئنئز اوچون دوعا ادئن، اِله کی، شفا تاپاسینیز. صالح بئر آدامین تأثئرلی دوعاسی چوخ شی اتمه‌یه قادئردئر.

¹⁷ ائلیا دا همن بئزئم کئمی بئر آدام ائدی و صداقتله دوعا اتدی کی، یاغیش یاغماسین و اوچ ائل آلتی آی یر اوزونه یاغیش یاغمادی.

¹⁸ سونرا گئنه دوعا اتدی و گؤی یاغیش یاغدیریب، یر اوزو میوه‌لرئنی گتئردی.

¹⁹ قارداشلاریم، اگر سئزلردن بئرئنئز حقئقتدن آزسا، و اؤزگه بئری اونو قایتارسا،

²⁰ قوی او آدام بئلسئن کی، گوناهکاری سهو یولوندان دؤندَ‌رَن، اونون جانینی اؤلومدن قورتارار و چوخ گوناهلارین اوستونو اؤرتر.