یعقوب 2 - موقدس کتابفرق قویمایین 1 قارداشلاریم، شؤوکتلی ربّئمئز عئسا مسئحه ائمان گتئرنلر اولاراق، ائنسانلار آراسیندا فرق قویمایین. 2 چونکی اگر سئزئن کنئسهیه قیزیل اوزوک تاخمیش، فاخئر پالتار گیئنمئش بئر آدام گئرسه و یوخسول بئر آدام دا چئرکلی پالتار گیئنمئش گئرسه، 3 سئز فاخئر پالتاری اولانین قیدئنه قالیب دیئرسئنئز: «بویورون، سئز بورادا اَیلهشئن.» و یوخسول آداما دیئرسئنئز: «سن اورادا دور.» و یا «کتئلئمئن یانیندا اوتور.» 4 آیا بئربئرئنئزئن آراسیندا فرق قویماییبسینیز، پئس نئیّتلی قاضیلارا دؤنمهیئبسئنئز؟ 5 قولاق آسین، سوگئلی قارداشلاریم، مگر تاری بو دونیانین یوخسوللارینی سچمهدی کی، ائماندا دؤولتلی اولوب، اونو سونلره وعده وردئیی پادشاهلیغین وارئثلری اولسونلار؟! 6 آمّا سئز یوخسول آدامی حؤرمتسئز اِدئبسئنئز. مگر دؤولتلی دیئل کی، سئزه ظولم ادئب سئزی محکمهیه چکئر؟! 7 مگر اونلار دیئللر کی، سئزه ورئلن موکرّم آدا کوفر دیئرلر؟! 8 آمّا اگر سئز موقدّس یازییا موطابئق او شاهانه شرئعتی یرئنه یتئرئرسئنئز کی، «قونشونو گرک اؤزون کئمی سِوهسن»، یاخشی ائش گؤرورسونوز. 9 لاکئن اگر ائنسانلار آراسیندا فرق قویورسونوز، گوناه ادئرسئنئز و تقصئرکارلار کئمی شرئعت طرفئندن محکوم اولورسونوز. 10 چونکی هر کس بوتون شرئعتی رئعایت اِدئب لاکئن بئرئنده قوصور اتسه، اونلارین هامیسی اوچون خاطاکار اولوب. 11 چونکی «زئنا اتمه» دئین، «آدام اؤلدورمه» ده ددی. ائندی سن اگر زئنا اتمئرسن، آمّا آدام اؤلدورورسن، شرئعتی آیاق آلتینا قویان اولوبسان. 12 بونا گؤره، او آداملار کئمی دانیشیب رفتار ادئن کی، اِله بئل، آزادلیق شرئعتی ائله موحاکئمه اولوناجاقلار. 13 چونکی رحم اتمهینه رحمسئزلئکله حؤکم اولوناجاق. رحم حؤکمه قالئب گلئر. 14 قارداشلاریم، اگر بئر آدام عملی یوخ ائکن، ائمانی اولدوغونو دِسه، بونون اونا نه فایداسی وار؟ مگر او ائمان اونو نئجات وِره بئلر؟! 15 اگر بئر قارداش یا دا باجی لوتدور و گوندهلئک یمهیئنه مؤحتاج. 16 و سئزلردن بئرئنئز اونلارا دسه کی: «سالامات گدئن، قیزیشین و دویون»، لاکئن اونلارین بدنی اوچون ضروری اولان شیلری ورمهیهسئنئز، نه فایداسی وار؟! 17 ائمان دا بوجوردور: اگر عمللری اولماسا، اؤزو-اؤزونده اؤلودور. 18 لاکئن کئمسه دئیه بئلر کی، «سنئن ائمانین وار، منئم ده عمللرئم. سن ائمانینی منه عملسئز گؤرسد و من ائمانیمی عمللرئمله سنه گؤرسدهرم.» 19 سن ائنانیرسان کی، تاری بئردئر؛ یاخشی ادئرسن. ائبلئسلر ده بونا ائنانیب تئترهیئرلر. 20 آمّا سن عاغیلسیز آدام، آیا ائستهیئرسن درک ادهسن کی، عملسئز ائمانین فایداسی یوخدور؟ 21 مگر آتامیز ائبراهئم، اوغلو ائسحاقی قوربانگاهین اوستونده قوربان تقدئم اِدَنده، عمللری ائله صالح ساییلمادی؟ 22 گؤرورسن کی، ائمان اونون عمللری ائله ائشلهیئردی و عمللری نتئجهسئنده ائمان کامئللَشدی. 23 موقدّس یازی دا یرئنه یتشدی کی، دیئر: «و ائبراهئم تارییا ائناندی و بو اونا صالحلئک ساییلدی.» و او، تارینین دوستو چاغیریلدی. 24 گؤرورسونوز کی، ائنسان آنجاق ائمانلا یوخ، عمللری ائله صالح ساییلیر. 25 مگر فاحئشه راحاب دا همن جور اؤز عمللرئنه گؤره صالح ساییلمادی، او زامان کی، جاسوسلاری قبول ادئب آیری بئر یوللا یولا سالدی؟! 26 چونکی نجه کی، روحسوز بدن اؤلودور، عملسئز ده ائمان اؤلودور. |
© Elam Ministries 2013. All rights reserved.
Elam Ministries