اِفِسوسلولارا 6 - موقدس کتاب

عایئله ائچنده

¹ اؤولادلار، ربده والئدینلرئنئزدن ائطاعت ادئن، چونکی بو دوزدور.

² آتا و آنانا حؤرمت ات (کی، وعده‌لی اولان بئرئنجی حؤکمدور)

³ کی، سعادت سنه یار اولسون و یر اوزونده عؤمرون اوزون اولسون.

⁴ ای آتالار، سئز ده اؤولادلارینیزی قضبلَندئرمه‌یئن. لاکئن اونلاری ربّئن تربئیه و تعلئمی ائله بؤیودون.

⁵ ای قوللار، جئسمه گؤره آغالارینیز اولانلارا اوره‌یئنئزئن صافلیغیندا قورخو و لرزه ائله موطئع اولون، نجه کی، مسئحه.

⁶ ائنسانلاری راضی اتمک ائسته‌ینلر کئمی گؤزه خوش گؤرونن خئدمتلر‌له یوخ، مسئحئن قوللاری کئمی کی، اورَکدن تارینین ائراده‌سئنی یرئنه یتئرئرلر.

⁷ خوش نئیّتله ائنسانلارا یوخ، ربّه قوللوق ادن کئمی خئدمت ادئن.

⁸ بئلئن ده کی، یاخشی ائش گؤرن هر کس ربدن عوضئنی آلاجاق، ائستر قول اولسون، ائستر آزاد.

⁹ ای آغالار، سئز ده قوللارینیزلا همن جور رفتار ادئن. قورخوتماقدان اَل گؤتورون و بئلئن کی، هم اونلارین آغاسی هم ده سئزئن آغانیز گؤیده‌دئر و او، هچ کسدن طرفدارلیق اتمز.

ربّئن سئلاحلاری

¹⁰ نهایت، ربده قودرتلی، اونون دا قووّتئنده گوجلو اولون.

¹¹ تارینین بوتون سئلاحلارینی گیئنئن کی، ائبلئسئن حئیله‌لری قاباغیندا مؤحکم دایانا بئله‌سئنئز.

¹² چونکی بئزئم موبارئزه‌مئز جئسم و قانین ضئدّئنه یوخ، ریاستلرئن، قودرتلرئن، بو قارانلیق دونیانین حؤکمدارلارینین و سماوی یرلرده اولان شرئر روحانی قووّه‌لرئنئن ضئدّئنه‌دئر.

¹³ بونا گؤره تارینین بوتون سئلاحلارینی گؤتورون کی، شرئر گونده موقاوئمت اتمه‌یه قادئر اولاسینیز و هر شیی اِدَندن سونرا مؤحکم دایاناسینیز.

¹⁴ بوندان اؤتری ده مؤحکم دایانین. بلئنئزه حقئقت قورشاغینی باغلایین. صالحلئک زئرهئنی ده سئنه‌‌نئزه تاخین.

¹⁵ باریش ائنجئلئنئن حاضیرلیغینی آیاغینیزا گیئن.

¹⁶ و بونلارین هامیسیندان علاوه، ائمان قالخانینی اَله آلین کی، اونونلا او شرئر اولانین بوتون آلوولو اوخلارینی سؤندورمه‌یه قادئر اولارسینیز.

¹⁷ نئجات دَبئلقه‌سئنی، و موقدّس روحون قیلینجینی دا کی، تارینین سؤزو اولسون، گؤتورون.

¹⁸ بوتون دوعا و یالواریشدا، همئشه موقدّس روحدا دوعا ادئن. و بونو گؤز قاباغیندا ساخلاییب، بوتون موقدّسلر اوچون بوتون ائستئقامت و یالواریشلا آییق اولون.

¹⁹ منئم اوچون ده دوعا ادئن کی، آغزیمی آچاندا آچیق دئل‌له دانیشماق عطا اولونسون. اِله کی، ائنجئلئن سئرّئنی جسارتله بئلدئرئم کی،

²⁰ بونون اوچون ده زنجئلرده باغلی اولان بئر اِلچی‌یَم؛ یعنی، من اعلان اتدئکده اله جسارتله دانیشیم کی، اله دانیشماق منه گرکدئر.

²¹ آمّا منئم وضعئیّتئم باره‌ده و بورادا نجه کچئرتدئیئم حاقدا، سوگئلی قارداش و ربّئن وفالی خئدمتچئسی تئخئکوسدان خبر آلا بئلرسئنئز. او هر شیی سئزه بئلدئره‌جک.

²² و اونو محض بو نئیّت اوچون سئزئن یانینیزا گؤندَ‌رمئشم کی، سئز بئزئم احوالاتیمیزدان خبردار اولاسینیز و او، سئزئن اورَکلرئنئزه تسلّی ورسئن.

²³ آتا تاری و رب عئسا مسئحدن قارداشلارا ائمانلا بئرلئکده باریش و محبّت اولسون.

²⁴ فیض بوتون او آداملارلا اولسون کی، ربّئمئز عئسا مسئحی اؤلمز محبّتله سوئرلر.