حوارئلر 3 - موقدس کتابچولاق آدامین شفاسی 1 گونون دوقّوزونجو ساعاتیندا کی، دوعا واختی ائدی، پطروسلا یوحنّا بئرلئکده معبده گدئردئلر. 2 بئر آنادان دوغما چولاق معبدئن گؤزل قاپی دیئلن قاپیسینا گتئرئلئردی. اونو هر گون اورایا قویوردولار کی، معبده گئرنلردن صدقه ییغسین. 3 او زامان کی، بو آدام پطروس و یوحنّانی معبده گئرمک حالیندا گؤردو، اونلاردان صدقه ائستهدی. 4 پطروسلا یوحنّا اونا دئقّتله باخدیلار و پطروس ددی: «بئزه باخ!» 5 آدام اونلاردان بئر شی آلماق اومئدئنده اونلارا دئقّتله باخدی. 6 لاکئن پطروس اونا ددی: «منئم گوموش و یا قیزیلیم یوخدور، آمّا منده اولانی سنه ورئرم: ناصئرهلی عئسا مسئحئن آدیندا، یری!» 7 و اونون صاغ الئندن توتوب اونو قالدیردی. او آندا اونون آیاقلاری و توپوقلاری قووّتلندی. 8 و یردن سیچراییب آیاغا دوردو و یرئمهیه باشلادی؛ و گَزئب، آتیلیب-دوشوب تارییا حمد اده-اده اونلارلا معبده گئردی. 9 بوتون خالق اونو گؤردو کی، یرئیئب آتیلیر و تارییا حمد ادئر. 10 و تانیدیلار کی، معبدئن گؤزل قاپیسیندا اوتوروب صدقه ییغان آدام بودور و اونا نه باش وردئیئنی گؤرنده، حیرت و تعجّوبدن دونوب قالدیلار. پطروسون معبددهکی وعظی 11 او آدام پطروس و یوحنّادان اَل چکمئردی. بوتون خالق حیرت ائچئنده سولیمانین ایوانی دیئلن یره قاچیب، اونلارین اطرافینا ییغیلدیلار. 12 پطروس بونو گؤرن واخت، خالقا خئطاب اتدی: «ای ائسرایئللیلر، نه اوچون بونا تعجّوب ادئرسئنئز؟ و یا بئزه اله باخیرسینیز کی، گویا بئز اؤز قووّت و یا دئندارلیغیمیزلا اونون یرئمهسئنه سبب اولموشوق؟ 13 ائبراهئمئن، ائسحاقین، و یعقوبون تاریسی، آتالاریمیزین تاریسی، اؤز قولو عئسایا جلال وردی؛ اونو کی، سئز اونو تسلئم اتدئنئز و پئلاط اونون آزاد اتمهسئنه قرار وردئیی حالدا، سئز اونون حوضوروندا اونو داندینیز. 14 سئز او موقدّس و صالح اولانی دانیب، ائستهدئنئز کی، بئر قاتئل سئزه باغیشلانسین. 15 و حیات ریئسئنی اؤلدوردونوز؛ اونو کی، تاری اونو اؤلولردن دئرئلتدی و بونون شاهئدلری بئزئک. 16 اونون آدینا اولان ائمان سایهسئنده، گؤردویونوز و تانیدیغینیز بو آدامی اونون آدی قووّتلندئردی؛ و اونون واسئطهسیائله گلن ائمان هامینیزین حوضوروندا او آداما بو کامئل صاغلیغی وردی. 17 ائندی ای قارداشلار، بئلئرم کی، سئز ده ریئسلرئنئز کئمی، نادانلیقدان بونو اتدئنئز. 18 لاکئن تاری کی، مسئحئن عذاب چکهجهیئنی بوتون پیغمبرلرئن آغزی ائله قاباقجادان خبر ورمئشدی، سؤزونو بو جور یرئنه یتئردی. 19 اونا گؤره تؤوبه ادئن و دؤنون کی، گوناهلارینیز سئلئنسئن، اله کی، ربّئن حوضوروندان تزهلنمه زامانلاری گلسئن 20 و سئزه تعیئن اولونان مسئحی، یعنی عئسانی گؤندَرسئن. 21 تارینین قدئمدن بری موقدّس پیغمبرلرئنئن آغزی ائله ددئیی کئمی، هر شیئن تزلنهجهیی واختا قدر، عئسا گرک گؤیده قالسین. 22 موسا دمئشدی؛ ”رب تارینیز، قارداشلارینیزین آراسیندان سئزه منئم کئمی بئر پیغمبر قالدیراجاق. هر ائشده سئزه نه دسه، اونا قولاق آسارسینیز. 23 و اله اولاجاق کی، او پیغمبره قولاق آسمایان هر کس تارینین خالقی آراسیندان محو اولاجاق.“ 24 و اِلهجه ده بوتون پیغمبرلر، سمویئل و اوندان سونرا گلنلر، بو گونلری خبر وردئلر. 25 سئز پیغمبرلرئن و او عهدئن اوغوللاریسینیز کی، تاری آتالاریمیزلا باغلاییب، ائبراهئمه ددی؛ ”یرئن بوتون اِللری سنئن نسلئنده برکت تاپاجاقلار.“ 26 تاری اوّل سئزئن اوچون اؤز اوغلونو قالدیریب گؤندَردی کی، سئزئن هر بئرئنئزی شر یوللارینیزدان دؤندَرمکله سئزه برکت ورسئن.» |
© Elam Ministries 2013. All rights reserved.
Elam Ministries