۲تئموتاعوسا 3 - موقدس کتاب

¹ لاکئن بونو بئل کی، آخیر گونلرده چتئن زامانلار گله‌جک.

² چونکی ائنسانلار اؤزلرئنی‌سِوَن، پول‌پرست، لافچی، کئبئرلی، سؤیَن، والئدینلره ناموطئع، ناسئپاس، ناپاک،

³ سِومه‌ین، باریشمایان، قیبتچی، پرهئزسئز، مورووّتسئز، یاخشیلیقدان نئفرت ادن،

⁴ حؤقّه‌باز، مولاحئظه اتمه‌ین، تکبّورلو، عیّاشلیغی تاریدان داها چوخ سِوَن،

⁵ دئندارلیغین ظاهئرئنی ساخلایان آمّا اونون قووّتئنی دانان اولاجاقلار؛ بله آداملاردان اؤزونو اوزاق ساخلا.

⁶ چونکی بونلارین آراسیندا او آداملار دا وار کی، اِولره گئرئب، جوربه‌جور هوسلرئن دالینجا قاچان و گوناه یوکونون آلتیندا اولان ضعئف آروادلاری اسئر ادئرلر.

⁷ اونلاری کی، دائم اؤیره‌نئرلر، لاکئن هچ واخت حقئقتی آنلایا بئلمئرلر.

⁸ یانّئس و یَمبه‌رئس نجه موسایا ضئدّ دوردولار، بو آداملار دا حقئقته ضئدّ دورورلار کی، عاغیلدا فاسئد، ائماندا دا مردوددورلار.

⁹ آمّا بوندان آرتیق ترقّی اتمه‌یه‌جکلر؛ چونکی اونلارین آخماقلیغی هامییا آیدین اولاجاق، نجه کی، یانّئس و یَمبه‌رئسئن آخماقلیغی اولدو.

¹⁰ آمّا سن منئم تعلئمئمی، رفتاریمی، مقصدئمی، ائمانیمی، صبرئمی، محبّتئمی، تحمّولومو،

¹¹ ائشکنجه‌لرئمی و عذابلاریمی یاخیندان گؤروبسن؛ انطاکئیه‌ده، ائقونئیه‌ده و لئستره‌ده باشیما گلنلر کئمئدن. نه ائشکنجه‌لر باشیما گلدی و نجه رب اونلارین هامیسیندان منی قورتاردی!

¹² دوغرودان دا مسئح عئسادا دئندارلیقلا یاشاماق ائسته‌ین بوتون آداملار عذاب چکه‌جکلر.

¹³ لاکئن پئس و حؤقّه‌باز آداملار آلدادیب، آلدانماقلا پئسلئکده ترقّی اده‌جکلر.

¹⁴ آمّا سن، اؤیر‌ندئیئن و یقئن تاپدیغین شیلرده داوام ات، چونکی بئلئرسن کی، کئمدن اؤیرندئن.

¹⁵ و اوشاقلیغیندان دا موقدّس یازیلاری بئلئبسن کی، قادئردئلر سنه حئکمت ورسئنلر و سنی ائمان واسئطه‌سی‌ائله مسئح عئسادا اولان نئجاتا چاتدیرسینلار.

¹⁶ بوتون موقدّس یازیلار تارینین ائلهاملاماسی‌دیر و تعلئم، توبئخ، یولا گتئرمک، و صالحلئکده تربئیه تاپماق اوچون فایدالی‌دیر،

¹⁷ اِله کی، تارینین آدامی کامئل و هر یاخشی ائش اوچون تجهئز اولسون.