۲قورئنتلی‌لره 4 - موقدس کتاب

پولوسون حوارئلئک خئدمتی

¹ بونون اوچون ائندی کی، آلدیغیمیز مرحمته گؤره، بو خئدمتئمئز وار، یورولموروق.

² آمّا عاییب اولان گئزلی شیلری ردّ اتمئشئک. حئیله‌گرلئکله رفتار اتمئرئک. تارینین کلامینی تحرئف اتمئرئک. آنجاق حقئقتی گؤرسه‌دئب، تارینین حوضوروندا اؤزوموزو هر کسئن وئجدانینا تؤوصئیه ادئرئک.

³ و اگر خوش خبرئمئز اؤرتولودور، هلاک اولانلارا اؤرتولودور.

⁴ یعنی او ائمانسیزلارا کی، بو عصرئن آللاهی اونلارین ذهئنلرئنی کور ادئب. اِله کی، تارینین صورتی اولان مسئحئن شؤوکتئنئن خوش خبرئنئن نورو اونلاری آیدینلاتماسین.

⁵ چونکی بئز اؤزوموزو یوخ، مسئح عئسانی رب وعظ ادئرئک، اؤزوموزو ده عئسانین خاطئرئنه سئزئن قوللارینیز!

⁶ چونکی «قارانلیقدان ائشیق پارلاسین» دئین تاری، اله اودور کی، اورَکلرئمئزده ائشیقلانیب. اِله کی، مسئحئن جامالیندا تارینین شؤوکتئنئن معرئفتئنئن نورونو عطا اتسئن.

⁷ آمّا بو ثروتی ساخسی قابلاردا ساخلاییریق کی، بو لاپ اوستون قودرت بئزه یوخ، تارییا عایید اولسون.

⁸ هر طرفدن موصئبت آلتینداییق، آمّا ازئلمه‌مئشئک. حیرانیق، آمّا چاره‌سئز دیئلئک.

⁹ عذاب چکئرئک، آمّا ترک اولونموش دیئلئک. ییخیلیریق، آمّا هلاک اولمامیشیق.

¹⁰ همئشه هر یرده عئسانین اؤلومونو بدنئمئزده گزدئرئرئک کی، عئسانین حیاتی دا بدنئمئزده ظاهئر اولسون.

¹¹ چونکی بئز دئرئلری، عئسانین خاطئرئنه دائم اؤلومه تسلئم ادئرلر کی، عئسانین حیاتی دا فانی اولان بدنئمئزده ظاهئر اولسون.

¹² بله‌جه اؤلوم بئزده ائشله‌یئر، آمّا حیات سئزده!

¹³ یازیلیب کی، «ائناندیم، اونا گؤره ده دانیشدیم.» بئز ده اِله همن او ائمانین روحو ائله ائنانیب، اونا گؤره ده دانیشیریق.

¹⁴ و بئلئرئک ده کی، رب عئسانی دئرئلدن، بئزی ده عئسا ائله دئرئلده‌جک و سئز‌ئنله بئر یرده اؤز حوضورونا چیخارداجاق.

¹⁵ چونکی بوتون بونلار سئزئن اوچوندور کی، چوخ ائنسانلارین اوستونه چوخالان فیض، تارینین شؤوکتی اوچون شوکورلره سبب اولسون.

¹⁶ بونا گؤره بئز یورولموروق؛ ظاهئری وارلیغیمیز پوزولسا دا، داخئلی وارلیق گوندن-گونه تزه‌لنئر.

¹⁷ چونکی کچئب-گدن یونگول موصئبتلرئمئز بئزئم اوچون اله بؤیوک و ابدی بئر شؤوکت حاصئل ادئر کی، هچ بئر شیله موقایئسه اولونا بئلمز.

¹⁸ چونکی بئز گؤرونن شیلره یوخ، گؤرونمه‌ین شیلره باخیریق. اونا گؤره کی، گؤرونن شیلر کچئب-گدن، آمّا گؤرونمه‌ین شیلر ابدی‌دئر.