۱تسالونئکلی‌لره 3 - موقدس کتاب

¹ بونا گؤره ده، تاب گتئرمه‌یه داها قادئر اولماییب، آتنده تک قالماغا راضی اولدوق

² و قارداشیمیز و مسئحئن ائنجئلئنده همکاریمیز و تارینین خئدمتکاری تئموتاعوسو یانینیزا گؤندَ‌ردئک کی، ائمانینیزدا سئزه قووّت ورئب، سئزی تشوئق اتسئن

³ اِله کی، هچ کس بو موصئبتلردن پرئشان اولماسین؛ چونکی سئز اؤزونوز بئلئرسئنئز کی، بئز بونون اوچون تعیئن اولونموشوق.

⁴ چونکی یانینیزدا اولدوغوموز زامان دا سئزه ائره‌لئدن دمئشدئک کی، باشیمیزا موصئبتلر گله‌جک؛ و بئلئرسئنئز کی، بله ده اولدو.

⁵ بونون اوچون من ده، آرتیق دؤزه بئلمه‌دئیئم زامان، یانینیزا آدام گؤندَ‌ردئم کی، ائمانینیزدان خبردار اولوم، مبادا وسوسه‌یه سالان سئزی وسوسه‌یه سالسین و چکدئیئمئز زحمت هدر اولسون.

⁶ آمّا ائندی تئموتاعوس سئزئن یانینیزدان قاییدیب، سئزئن ائمان و محبّتئنئزدن بئزه خوش خبرلر گتئرئب و بوندان دا کی، بئزی دائم محبّتله یادا سالیرسینیز و بئز سئزه حسرت چکدئیئمئز کئمی، سئز ده بئزه اِله حسرت چکئرسئنئز.

⁷ بو سببدن، ای قارداشلار، بوتون پرئشانلیق و موصئبتئمئزده، ائمانینیزین واسئطه‌‌سی‌ائله سئزئن حاقّینیزدا تسلّی تاپدیق.

⁸ چونکی ائندی سئز اگر ربده ثابئت دوراسینیز، بئز یاشایاریق.

⁹ چونکی سئزئن حاقّینیزدا تارینین حوضوروندا بوتون او شادلیغیمیز اوچون، تاریدان نجه تشکّور اده بئلرئک؟!

¹⁰ نجه کی، گجه-گوندوز خالئص اورَکله دوعا ادئرئک کی، اوزونوزو گؤرک و ائمانینیزین اسکئکلرئنی دولدوراق.

¹¹ قوی ائندی آتامیز تاری اؤزو، و ربّئمئز عئسا یولوموزو سئزئن طرفئنئزه سالسین.

¹² و بئزئم سئزه اولان محبّتئمئز کئمی، قوی رب سئزئن محبّتئنئزی بئربئرئنئزه و بوتون ائنسانلارا آرتیریب، محبّتده سئزی باغلاسین.

¹³ اِله کی، ربّئمئز عئسا بوتون موقدّسلری ائله گلدئیئنده، آتامیز تارینین حوضوروندا، اورَکلرئنئزی موقدّسلئکده قوصورسوز مؤحکم اتسئن.