Zefania 1 - MUKANDA WANZAMBI

¹ Izu daYehova denjili kudi Zefwaniya mwana kaKushi, Kushi mwana kaGedaliya, Gedaliya mwana kaAmariya, Amariya mwana kaHezekiya, hamafuku aYosiya mwana kaAmoni, mwanta wawaYuda.

² Yehova nindi, Nakanoŋesha chikupu yuma yejima yakafumi hewulu deseki.

³ Yehova nindi, Nakanoŋesha niantu nianyama; nakanoŋesha tujila twahaluzwizu, nianshi amukaluŋalwiji, niyuma yadimbwishaŋa ntu niantu atama kumu. Nakafumisha antu hanu hewulu deseki.

⁴ Nakolola chikasa chami hadi aYuda, nihadi antu ejima ashakama muYerusalema. Kwenakunu nakafumishaku antu aBayali anashaluku, niijina dawaKemari hamu nayikombeji yawu;

⁵ ninawa apeshaŋa yileŋaleŋa yamwiwulu hamawulu amatala; ninawa aŋeshaŋa chakwila iku asanyika Yehova, iku asanyika Malikami;

⁶ ninawa anafunti hanyima analeki kulonda Yehova; ninawa anabuli kukeŋakeŋa Yehova hela kwihwila kudi yena.

⁷ Mwenaku kumesu aMwanta Yehova zo. Muloŋa ifuku daYehova didi kwakwihi. Yehova naloŋesha dehi chimuna, najiliki dehi enyi anatambikiyi.

⁸ Hefuku dakuya chimuna chaYehova nakababesha atulamba, nianyana kamwanta, niantu ejima avwalavwala yuma yakumatuŋa acheŋi.

⁹ Hefuku odu nakababesha antu ejima akilukaŋa muchisu, enzeshaŋa matala awanyanta jawu namadombu nakudimbana.

¹⁰ Yehova nindi, Hefuku odu kuchisu chakumpwembu chanshi kwakatiyakana nyiteti, kuchibalu chamukala chamuchiyedi kwakatiyakana kukaloka, nichivumu chacheni kumapidi.

¹¹ Enu mwashakama kuMakiteshi, kalokenu, muloŋa akwakulandujola ejima jinayikumi dehi; ejima asendelaŋa yiteli yasiliva anayifumishuku dehi.

¹² Henohu nakaboloŋonza muYerusalema namanoŋu, nakababesha antu anatentami hanchiba jawu, elaŋa munyichima yawu nawu, Yehova hakela hela yayiwahuku, hakela hela yatamaku.

¹³ Mahetawu akekala yuma yakupupapupa, matalawu akekala mahembi. Matala akatuŋa, ilaŋa hiyakashakama mwoku; matempa anyivinyu kutumba akatumba, ilaŋa hiyakanwamu vinyuku.

¹⁴ Ifuku daYehova deneni didi kwakwihi, didi kwakwihi, didi nakunyakala nankashi, dodizu defuku daYehova; chilobu hakudililaku madilu alula.

¹⁵ Ifuku odu hiifuku dandombu, hiifuku dayihuŋu nakukabakana, hiifuku dakukisaŋana nakwila kwamahembi, ifuku damwidima nakwiyila, ifuku damavu namwidima wakushishita,

¹⁶ ifuku dampùŋa dakwimba pu-u, dakwimbila nyikala yadihata muyipaka, dakwimbila tuposhi twatulehi tudi hampwembu.

¹⁷ Nakamwesha antu kukala, akenda nakupapata nanochu chanamuvulumunuwu Yehova. Mashi awu akamwaŋala neyi lunkuŋu, nimbiji yawu yakamwaŋala neyi tuji.

¹⁸ Hela siliva yawu, hela wuru wawu hiwakatwesha kuyipulwisha mwifuku dandombu yaYehovaku; ituŋa dejima dakanoŋa nakesi kamukawu windi. Muloŋa yena wakakumisha, eŋa, kukumisha kwakukasumwisha antu ejima ashakama mwituŋa.