Yowanu 1 - MUKANDA WANZAMBI

¹ Hatachi hadiŋi Izu, Izu dadiŋi naNzambi. Izu dadiŋi Nzambi.

² Diyi wadiŋi naNzambi hamu, kufumisha kutachi.

³ Yuma yejima ayileŋeli kudi yena. Hikwekala chuma chaleŋeluwu chakubula yena kuchileŋaku.

⁴ Mudi yena mwadiŋi wumi, wumi owu wadiŋi chejeji chawantu.

⁵ Chejeji ochu chatoŋekaŋa mumwidima, mwidima hiwatwesheli kujima chejejuku.

⁶ Kwenjili iyala wumu atemesheluwu kudi Nzambi, ijina dindi Yowanu.

⁷ Yeniwu wenjili ekali chinsahu chachejeji ochu, kulonda ejima aketiyi chakushimunayi yena Yowanu.

⁸ Yena hadiŋi diyi chejejuku; wenjili kulonda akekali chinsahu chachejeji ochu.

⁹ Chejeji chalala chenzaŋa mumpata yamunu mwishina, chatoŋekaŋa mudi antu ejima.

¹⁰ Yena wadiŋi munu mwishina; mpata yamunu mwishina ayileŋeli kudi yena, akwampata yamunu mwishina hiyamwilukiluku.

¹¹ Wenjili kuyuma yindi yomweni, antu indi yomweni hiyamutambwiluku.

¹² Ilaŋa ejima amutambwili, wayinkeli Ŋovu yakwikala anyana kaNzambi, wowenawa akukuhwelela ijina dindi.

¹³ Wena chavwalikiluwu, hiyavwalikili kumashi hela mwatopwelaŋawu antu hela mwavwalikaŋawu antuku, avwalikili kudi Nzambi.

¹⁴ Izu dabalumukili kwikala muntu; washakamini mukachi ketu, hitukubanjila lubanji lwakulema kwindi, kulema kwaMwana kaTata wumu hohu, wasweja luwi ninsaŋu yalala.

¹⁵ Yowanu hakwikala chinsahu chakumushimuna, hakubidika nindi, Yeniwu diyi nateneni, nami kukunlondela wambadikami, muloŋa yena wadiŋi kwoku ami kanda nivwaliki.

¹⁶ Kukwinzala kwindi wejima wetu tunatambuluku, niluwi lwakulunjika haluwi.

¹⁷ Muloŋa nshimbi ajiheni kudi Mosi, hakwila luwi ninsaŋu yalala yenjili naYesu Kristu.

¹⁸ Hikwekala muntu wamonahu dehi Nzambuku, owu Mwana wumu hohu wekala muntulu yaTata, diyi namulumbululi chachiwahi.

¹⁹ Diwu wunsahu washimwini Yowanu, hatemesheluwu aYudeya atupristu nawaLevi afumi kuYerusalema ayi kudi yena, amwihuli nawu, Yeyinyi?

²⁰ Hakuyileja chalumbuluka chikupu nindi, Ami hiniKristuku.

²¹ Wena hiyakumwihula nawu, Indi dinu yeyinyi? Yeyi Elija tahindi? Yena nindi, Nehi. Nawu, Wuyenowu kaprofwetu tahindi? Yena hakwakula nindi, Nehi.

²² Dichi hiyakumwihula cheŋi nawu, Yeyinyi? Muloŋa tunakeŋi kutwala mazu kudi antu atutemesha. Eyi aweni waditenaŋa neyidi?

²³ Yena nindi, Yami mbila nabidikaŋa mwisaŋa nami, Ololenu njila yaYehova; mwomwahosheli kaprofwetu Isaya.

²⁴ Hadi owu atemesheluwu hadiŋi aFwarisi;

²⁵ hiyakumwihula nawu, Neyi eyi hiwuKristu hela Elija hela yenowu kaprofwetuku, ochu wapapatishilaŋadi?

²⁶ Yowanu hakwakula nindi, Ami naŋapatishaŋa mumeji; mukachi kenu munemani namutu mwabula kwiluka;

²⁷ yena wukunlondela, ami hinateli kumusubula nkwabiluku.

²⁸ Yumiyi ayilili muBetani kwishinadi daYodana, kwapapatishilaŋayi Yowanu.

²⁹ Chikunachi, hakumona Yesu wudi nakwinza kudi yena, nindi, Talenu Mwana kaMukoku waNzambi, mukwakufumisha nshidi yawantu ampata yamunu mwishina.

³⁰ Diyi iwu nateneni nami, Kukunlondela iyala wambadikami, muloŋa yena wadiŋi kwoku ami kanda nivwaliki.

³¹ Hela ami, hinamwilukiluku. Chinenjili nakupapatisha mumeji, nalondeli nami nakamumwekeshi kudi aIsarela.

³² Yowanu hakushimuna wunsahu nindi, Namweni Spiritu nakusuluka mwiwulu neyi katela, hakushakama hadi yena.

³³ Hela ami, hinamwilukiluku; ilaŋa owu wantemesheli nakupapatisha mumeji, diyi wanlejeli nindi, Muntu iwakamona Spiritu hakusuluka nakushakama hadi yena, diyi wapapatishaŋa mudi Spiritu Wajila.

³⁴ Ami namoni namesu, hinukwikala chinsahu nami, Diyi Mwana kaNzambi.

³⁵ Chikunachi nawa cheŋi, Yowanu hakwimana niatumbanji twindi ayedi hamu.

³⁶ Hakushinshika Yesu chakwendayi nindi, Talenu Mwana kaMukoku waNzambi.

³⁷ Awa atumbanji twindi ayedi hiyakumutiya chakuhoshayi, niwena hiyakumulondela Yesu.

³⁸ Yesu hakushetumuka, hakuyimona chadiŋi nakumulondelawu, hakuyila nindi, Mukukeŋadi? Wena hiyakumwakula nawu, Eyi Rabi; chaya mukwila nawu Nkuluŋaŋa; washakama kudihi?

³⁹ Yena hakuyila nindi, Inzenu mutali. Dichi ayili, amweni kwashakaminaŋayi; ifuku odu hiyakushakama nindi; kwela dehi melela.

⁴⁰ Wenawa ayedi atiyili chahosheliyi Yowanu amulondeli Yesu, wumu wadiŋi Anderi, mana kwaShimona Petulu.

⁴¹ Diyi wásambilili kuwana mana kwindi yomweni, Shimona, hakumuleja nindi, Tunawani dehi Mesiya; chaya mukwila nawu Kristu.

⁴² Yena hakumuleta kudi Yesu. Yesu hakumutala swi-i, nindi, Eyi wuShimona, mwana kaYowanu, akakutumba nawu Kefasi; chaya mukwila nawu Petulu.

⁴³ Chikunachi cheŋi, hakwila nindi, Tukuya muŊaliliya. Awana niFwilipu. Yesu hakumwila nindi, Nlondi.

⁴⁴ Fwilipu wadiŋi muntu wakuBeteseda, mukala waAnderi naPetulu.

⁴⁵ Fwilipu hakuwana Nataneli, hakumwila nindi, Tunawani muntu atenenuwu kudi Mosi munshimbi, nikudi atuprofwetu, diyi Yesu wakuNazareta, mwana kaYosefu.

⁴⁶ Nataneli hakumwila nindi, Chuma chachiwahi chitweshi kufuma muNazareta? Fwilipu hakumwila nindi, Inzaku wutali.

⁴⁷ Yesu hakumona Nataneli wudi nakwinza kudi yena, hakumutena nindi, Talenu kaIsarela kakeni wakadi makasu.

⁴⁸ Nataneli hakumwila nindi, Wunaŋiluki ŋahi? Yesu hakumwakula nindi, Chiwadiŋi mwishina dachikuyu, Fwilipu kanda akutambiki, nakumona.

⁴⁹ Nataneli hakumwakula nindi, Eyi Rabi, yeyi Mwana kaNzambi, yeyi Mwanta waIsarela.

⁵⁰ Yesu hakumwakula nindi, Wunetiyi nanochu chinakwili nami nakumona mwishina dachikuyu, tahindi? Wamba kamona yacheŋi yakubadika yeniyi.

⁵¹ Hakumwila nindi, Chalala chalala, nukuyileja nami, mwamba kamona iwulu hidikwenzuluka, niaŋelu aNzambi hiyakukandama nakusuluka hadi Mwana kamuntu.