Obadia 1 - MUKANDA WANZAMBI

¹ Chimwenu chaObadiya. Mwanta Yehova nateni dehi Edomi, nindi, Tunatiyi dehi nsaŋu yakudi Yehova, muluwa anamutemeshi dehi munyuza nakwila nindi, Nyamukenu, tumunyamukilenu, tumwasi njita.

² Tiya, nakukeheshi dehi mukachi kanyuza, eyi anakudiwuli nankashi.

³ Eyi washakama munyaji yamwilola, washakama kwiwulu, wahoshaŋa mumuchima weyi, neyi, Wakanhulumuna kunu kwiwulu anshikiji heseki hinyi? wanta weyi wadinka kumuchima wunakudimbi kweyi.

⁴ Hela wukujindama hewulu neyi mbuulu, hela wakaala chaala cheyi hewulu hakachi katutumbwa, nakakuholojahu. Dimu mwanahoshiyi Yehova.

⁵ Eyi wakisika dehi! Neyi amakombi enza kudeyi, neyi akwakubuwa enza nawufuku, hiyadi kwiya iye-e nichiyadi kuwaninawuku? Neyi akwakukumuna nyikabu yavinyu enza kudeyi, hiyadi kushiyahu nyikabu yikwawuku?

⁶ Esawu o chamusandolawu dehi! O chamwekeshawu dehi yuma yindi yalema yadiŋi yakusweka!

⁷ Akwenu ejima watiyaŋeni nawu anakuhaŋi dehi ndo nikuŋinza. Akwenu wadiŋi nawu chamwena zo-o anakudimbi, anemiki mushindu hadeyi; adiilaŋa yakudya yeyi anakutili muhetu; eyi kushinshikamu nehi.

⁸ Yehova nindi, Ifuku odu nibuli kujilumuna akwamaana kulonda amani muEdomi? Niakwakashinshi nibuli kuyimanisha kumpidi yaEsawu?

⁹ Eyi Temani, ayilobu jeyi akatiya nyima ngwa, kulonda antu ejima adi kumpidi yaEsawu akayimanishi to-o nakuyŋahola.

¹⁰ Nsonyi jakakubuta wi-i nandombu jiwamuzuŋishili mana kweyi Yakoba, eyi akakufumishahu chahaya nyaka.

¹¹ Hefuku diwemeni hahalehi nayena, hefuku datutiluwu yuma yindi kudi enyi, deliluwu antu akwacheŋi hiyakwijila muyisu yakumpwembu jindi, dabalula balulawu Yerusalema nayinjikijilu yakusakula nachu, welili kweyi neyi wadibomba nawu.

¹² Bayi wutala ifuku damana kweyi mwifuku dakumonayi kukalaku, bayi wuzaŋajala nansaŋu yawanyana kaYuda mwifuku dakujilumukawuku; bayi wuhosha chakudinka wanta mwifuku dakumonawu yihuŋuku.

¹³ Bayi wiŋila muchisu champwembu yawantu ami mwifuku dakuhalwawuku; mwalala, bayi wutala makabi awu mwifuku dakuhalwawuku, bayi mukwata makasa hyuma yawu mwifuku dakuhalwawuku.

¹⁴ Bayi mwimana kumaakenu nakuyijikilila antu indi akupulukaku; antu indi akushalahu mwifuku dakumona yihuŋu bayi muyihanonaku.

¹⁵ Muloŋa ifuku daYehova didi kwakwihi, keŋa diwani nyuza yejima. Eyi akakukoŋa muwunakoŋi akwenu; yuma yiwuneli akakulubwilayi hanamutu weyeyi aweni.

¹⁶ Muloŋa chimunanwi enu hampidi yami yajila, dimu nawa mwakanwina nyuza yejima hefuku hefuku, mwalala akanwa, akatoboka, akekala neyi hiyadiŋi nikwokuku.

¹⁷ Ilaŋa kumpidi yaZiyona kwakekala akapuluka, yakekala yajila; niakwamutaŋa waYakoba akaheta mahetawu.

¹⁸ Akwamutaŋa waYakoba akekala kesi, akwamutaŋa waYosefu akekala mulaŋu wakesi, akwamutaŋa waEsawu akekala ntotu; wena akabidimaŋa mukachi kawu, akayilasha; kumutaŋa waEsawu hikwakashala nawa cheŋi antuku; muloŋa Yehova nachihoshi dehi.

¹⁹ Awa akukabeta kakuchidiilu akaheta mpidi yaEsawu, awa akunkulu akaheta aFwilistinu; akaheta nimpata yaEfweremi, nimpata yaSamariya; Benjamini wakaheta Gileyadi.

²⁰ Wukoli wanidi izaza dawanyana kaIsarela ekala mukachi kawaKenani, akaheta mpata yashika kuZarefwati; wukoli wamuYerusalema wudi kuSefwaradi wakaheta nyikala yakukabeta kakuchidiilu.

²¹ Akwakwamwina akakanduka mpidi yaZiyona kulonda akasompeshi mpidi yaEsawu; wanta wakekala waYehova.