Malilo 1 - MUKANDA WANZAMBI

¹ Mukala wadiŋi wenzala antu to-o, o chiwashala dehi kanka wawu! O chiwela dehi neyi ntuluwa wamumbanda. Wadiŋi muneni mukachi kanyuza, wadiŋi mwanta wamumbanda mukachi kamawuloŋu, lelu wabalumuka dehi chilolu!

² Wakonkamaŋa kwanakudila hohu, hamakidi indi kwampweji jamadilu hohu; hadi ejima adikeŋelaŋayi nawu hihashala wakumukundeja niwumuku; amabwambu jindi ejima anamukwatili dehi makasu, abalumuka dehi ayilumbu jindi.

³ Yuda amutwala dehi muwukoli nakulumbalumba; nawani nyidimu yakala, naketukili dehi mukachi kanyuza, hamonaŋa nikunookaku. Akwakumuhaŋa amulamakesha dehi hanyiŋana.

⁴ Njila jakuZiyona jabunda dehi, himwenzaŋa nawa antu akwinza kuyawija yakushiikaku; kuyisu yampwembu jindi kwabalumuka dehi kwayihembi, atupristu twindi hiyakudishishimona, ajiki indi amona yihuŋu, yomwenindi namoni kalula.

⁵ Akwankunyi nindi abalumuka dehi anyanta jindi, ayilumbu jindi hiyakuluŋa; muloŋa Yehova wamumwesha dehi yihuŋu nanochu chasweja nviloŋa yindi kuvula. Anyanindi anyanya ayitwala dehi muwukoli, ayitwampaku dehi kudi akwankunyi nawu.

⁶ Wutotombu wamwana kaZiyona wamumbanda wamufuma dehi wejima. Atulamba twindi abalumuka dehi neyi ankayi anabuli yakudya, nawu atemuki akwakuvihaŋa niŋovu nehi.

⁷ Hanu hamafuku ayihuŋu yindi yakulumbwaŋila Yerusalema washala kwakwanakana yuma yindi yamutiyishilaŋa kuwaha hamafuku ahashankulu, henahana antu indi aholokeleli mumakasa awakwankunyi nawu, hamweni niwakumukwashaku. Akwankunyi nindi chamumwenuwu hiyakumusehaseha chanasheshekiyi dehi.

⁸ Yerusalema navulumuni dehi nshidi yasweja; dichi wabalumuka dehi neyi chuma chamajilu. Antu ejima amulemeshelaŋa hiyakumudiwula nanochu chanamonuwu dehi wusonyi windi. Mwalala hakudishishimona, hakufutalelaku.

⁹ Kujisanya jindi kwazondeli. Haanukilaŋa kwamba kakuminayuku; dichi chanakunkumukiliyi chakuhayama hohu; hakweti niwakumukundejaku. Eyi Yehova, tala yihuŋu yami; muloŋa chilumbu naditoheshi dehi.

¹⁰ Mukwankunyi nindi nololi dehi chikasa kulonda akwati hyuma yindi yejima yamutiyishaŋa kuwaha. Muloŋa yena namoni dehi akwanyuza hiyakwijila mumalalindi, wowu wayilejeli neyi bayi akeŋila muchipompelu cheyuku.

¹¹ Antu indi ejima hiyakudishishimona hiyakukeŋakeŋa yakudya; yuma yawu yayitiyishilaŋa kuwaha hiyakuyihana kulonda alandi nachu yakudya yakudi hizumwisha nachu. Eyi Yehova talaku wutali, muloŋa ami neli dehi wakadi kulema.

¹² Enu ejima mudi nakuhita munjila, munachimoni nenu hichuma chamukunkulwayi, tahindi? Talenu mutali neyi kwekala yihuŋu yidi neyi yihuŋu yananmweshuwu ami, yananmweshiyi Yehova mwifuku dakuzuwa kwindi kwasweja.

¹³ Yena natemeshi mumafwahami kesi kakufuma mwiwulu, kanayifuŋununi. Nantanjikili wanda wakufwa nyendu yami, nanfuntishi dehi munyima. Nankonki, nanzeyeshi mwaana wejima.

¹⁴ Mpanda yanyiloŋa yami anayikasi nachikasa chindi. Yumiyi yinadijiŋajiŋi, yinashi ki nikunshiŋu yami; yena nazeyeshi dehi Ŋovu jami. Mwanta naŋushi dehi mumakasa anawa nakaŋanya kudikaŋa nawu.

¹⁵ Mwanta napepeleshi dehi antu ami akwaŋovu adi mukachi kami. Nantambikili dehi chawija chakushiika kulonda achiki anyikwenzi jami. Mwanta nadatoli dehi mwana kaYuda wamujiki, neyi chadatolaŋawu muwukamwinu wavinyu.

¹⁶ Yuma yinukudila yoyeniyi. O mumesu ami! O mumesu ami! Chimukuwulumuka mpweji jamadilu! muloŋa mukwakukundeja wuteji kunhizumwisha wudi kwakulehi nanami. Anyanami anayikonki dehi, muloŋa chilumbu nasweji dehi Ŋovu.

¹⁷ Ziyona hakwolola makasa kudi akwawu, hanamoni wakumukundejaku. Yehova nalejani dehi chakutena Yakoba, nindi antu amunyeŋumuka akekali akwankunyi nindi. Yerusalema nekali dehi neyi chuma chamajilu mukachi kawu.

¹⁸ Yehova waloŋa, muloŋa ami nadikaŋi dehi nezu dindi. Enu nyuza yawantu yejima, tiyenu mwani, mutali yihuŋu yinukumonami. Yaŋadima yami ninyikwenzi yami anayi dehi muwukoli.

¹⁹ Natambikili ankeŋelaŋa, komana andimbilaŋa. Atupristu twami niakulumpi jami afwilili mumukala, iku adi nakukeŋakeŋa yakudya yakudi hizumwisha nachu.

²⁰ Eyi Yehova, talaku, muloŋa ami namoni kukala, natiyi muchima mwivumu bwi; natiyi muchima mwivumu futu; muloŋa ami nadikaŋi nankashi. Hanzi mpoku yakabali hiyikukonka antu, mwitala mudi neyi kufwa.

²¹ Anantiyi dehi nawu hinukudishishimona, hikudi wakunkundejaku. Yatama yinukumonami anayitiyi dehi kudi ayilumbu jami, chiwunachikoŋi anatiyi kuwaha. Ifuku wateneni hiwabidikili wakadileta, niwena akekala neyi chinidami.

²² Kutama kwawu kwejima kwinzi kumesu eyi, kulonda wakayikoŋi neyi chiwunankoŋami nanyiloŋa yami yejima; kudishishimona kwami kunasweji, nimuchima wami wunazeyi dehi.