Maefese 1 - MUKANDA WANZAMBI

¹ Ami Pawulu, kapostolu kaKristu Yesu mwaya muchima waNzambi, nidi nakuyisonekela mukanda, enu akwakujila mwekala kuEfwesesa, akwakushinshika amudi Kristu Yesu.

² Luwi lwikali nanenu nikuwunda kwakufuma kudi Nzambi, yowu Tata yetu, nikudi Mwanta Yesu Kristu.

³ Amukiswili Nzambi yaMwanta wetu Yesu Kristu, yowu Tata yindi, natukiswili nkisu jawuspiritu jejima mumawulu mudi Kristu;

⁴ chatutondeliyi mudi yena henohu chikuku champata yamunu mwishina chichidi kanda, kulonda tujili, tubuli hakutwinkela muloŋa kumesu indi, mukukeŋa.

⁵ Watukunjikilaŋahu dehi nindi twi kali anyana kambala mudi Yesu Kristu, mwatiyililiyi kuwaha kumuchima windi,

⁶ kulonda kuhameka kulema kwaluwi lwindi lwatutiyililiyi chamukunkulu mudi yena Wakeŋewa.

⁷ Mudi yena dimu tukweti kukuula kwanatukúuluwu namashi indi, yowu kutwanakena nyiloŋa yetu, mweseka maheta aluwi lwindi

⁸ lwatuvulishililiyi, nama ana ejima nikashinshi.

⁹ Hakutuleja nsaŋu yajindiliyi mumuchima windi, mwatiyihliyi kuwaha, mwafuukwiliyi mudi Kristu,

¹⁰ nichamba kawanina nyaka; kulonda yuma yamumawulu niyahamaseki yejima yakahwili mudi Kristu.

¹¹ Mudi yena nawa dimu mwatubalumwininuwu twi kali wuswana, Muloŋa twambwilaŋahu dehi mwatoŋweliyi yena wakoŋaŋa yuma yejima mwadilejaŋayi kumuchima windi;

¹² kulonda etu, twásambilili kukuhwelela Kristu, tuleteshi kuhameka kwakuhameka kulema kwindi.

¹³ Mudi yena ninenu nawa, mwatiyili mazu ansaŋu yalala, yoyu nsaŋu yawamwinu wenu yayiwahi, himwamwitiyili yena, ayifundili nawa naSpiritu Wajila wakukana.

¹⁴ Yena Spiritu diyi chikilu chawuswana wetu, nichamba kakúulawu iheta dambala dayena, kulonda kuhameka kulema kwindi.

¹⁵ Dichi ami nawa, chinatiyili nsaŋu yenu yakumukuhwelela Mwanta Yesu, nichimwakeŋa aŋa akwakujila ejima,

¹⁶ hinalekaŋa kuyisakilila chinayitenaŋa mukulomba kwamuku.

¹⁷ Nalombaŋa nami, Nzambi yaMwanta wetu Yesu Kristu, Tata wakulema, ayinki spiritu yama ana nichimwekeshu, kulonda musweji kumwiluka;

¹⁸ mesu amunyichima yenu atoni, kulonda mwiluki kuchiŋeja kwakutambika kwayitambikiliyi, nimaheta akulema kwawuswana windi wahetayi mudi akwakujila;

¹⁹ nichabadika kututohela Ŋovu jindi nankashi, etu twakuhwelelaŋa, mweseka Ŋovu jindi jasweja kutoha nankashi,

²⁰ jakoŋeliyi mudi Kristu hamusaŋwiliyi mudi afu, hakumushakamisha kuchikasa chindi chachidiilu mumawulu,

²¹ kwabadika nankashi kuyula kwejima, niwanta, niŋovu, nimawanta antúumba, nimajina ejima atenaŋawu, hiwowu amakonu hohuku, nianyaka yakenza nawa.

²² Wamwoywahishila dehi yuma yejima nakuyisha kwishina danyendu yindi; wamukunjika dehi kwikala namutu wahewulu dayuma yejima kuchipompelu;

²³ chipompelu diwu mujimba windi, kwinzala kwayena wenzeshaŋa yuma yejima mwejima.