Kwidika 1 - MUKANDA WANZAMBI

¹ Tiyenu majina awanyana amayala aIsarela ayili muEjipitu, wowuama yala ejima ayili naYakoba, nawaŋodi jawu nawanyanawu;

² Rubeni, Simeyona, Levi, niYuda;

³ Isakari, Zebuluni niBenjamini;

⁴ Dani, niNafwatali; Gadi niAsheri.

⁵ Antu ejima afumini munkuma yaYakoba adiŋi makumi atanu nayedi, henohu Yosefu wadiŋi muEjipitu.

⁶ Yosefu wafwili, afwili niana kwindi ejima, ni akwawu ejima avwalikiluwu nawu.

⁷ Anyana kaIsarela asemunwini, avulili nankashi, aswejeli hama, abadikili nankashi Ŋovu; mwituŋa mwenzeli diwu hohu.

⁸ Mwanta mwiha, wabulili kumwiluka Yosefu, wadiili wanta wakuEjipitu.

⁹ Yena wahosheli nawantu indi, nindi, Tiyenu dinu, awa antu anyana kaIsarela anatubadiki dehi nikuvula niŋovu,

¹⁰ tuyi kwatilenu maana, akenza kuvula, chakamba kela neyi kwakamba kenza njita, akamba kadibomba nawayilumbu jetu, akamba katwasa, hiyakadinyamukila mwituŋa.

¹¹ Dichi ayishilili atupita kulonda kuyi kabisha nayiteli yawu. Anamutuŋilili Fwaro nyikala yamaneni yakuswekela yuma, owu Pitomi, owu Rayamesesa.

¹² Chaswejeluwu kuyi kabisha hiyakusweja nikuvula, hiyakwambokanyi kala nanyi kala. Atiyili chikela chawanyana kaIsarela.

¹³ AEjipitu ayi kalakesheli anyana kaIsarela naŋovu,

¹⁴ ayi mwesheli kalulananyi dimu yakala, niyakucha aka maseki, niyamatafwali, nanyidimu yejima yamumaha yeŋi nayepi; nyidimu yawu yejima yayi kalakesheluwu ayi kalakeshelina Ŋovu hohu.

¹⁵ Mwanta wakuEjipitu wahosheli nawankoŋu awaHeberu, wumu ijina dindi Shifwira, mukwawu ijina dindi Puwa.

¹⁶ Wayilili nindi, Chimu kuyi kalakela ambanda awaHeberu mudimu wawukoŋu, chimu kuyi mona anachiŋami dehi, neyi kukuvwalika mwana weyala mukumujaha, neyi himwana wamumbanda wukuhanda.

¹⁷ Ilaŋa nkoŋuamutiyili Nzambi woma, hiyelili mwayilejeliyi mwanta wawaEjipituku, ayihandishili anyana amayala.

¹⁸ Mwanta wakuEjipitu wayitambikili ankoŋu, wayilili nindi, Chimuneli chumichi, chimunahandishi anyana amayala, munalondidi?

¹⁹ Ankoŋu amwilili Fwaro, nawu, Ambanda awaHeberu hiyadi neyi ambanda awaEjipituku, wena asweja Ŋovu, elaŋa nitoŋu wuchidi kanda ashikuku mwaka avwala dehi.

²⁰ Nzambi wayilili ankoŋu chachiwahi; antu asemunwini, aswejeli Ŋovu.

²¹ Nzambi wayituŋashili owu ankoŋu nyikala nano chucha mutiyiluwu woma.

²² Fwaro wayiliosheli antu indi ejima, nindi, Anyana amayala ejima akuvwalika chiŋa muyinatila mukaloŋa, anyana awambanda ejima mukuyihandisha.