Juda 1 - MUKANDA WANZAMBI

¹ Ami Yuda, nduŋu yaYesu Kristu, mana kwaYakoba, nidi nakusoneka mukanda wenwenu atambikewa, akeŋewa mudi Nzambi Tata, ambala anahembeluwu Yesu Kristu.

² Luwi lwikali nanenu, nikuwunda nikukeŋa kuyivulili.

³ Enu akwetu twakeŋa a, nakeŋa nami nidikwatishi kuyisonekela nsaŋu yawamwinu wetu wamawaninu, ilaŋa hinukutiya kumuchima nami chiŋa niyisonekeli mazu akuyikonkomwena, nami Iwilenu naŋovu kwitiya kwakukuhwelela kwenkeluwu akwakujila kamu hohu chahaya nyaka yejima.

⁴ Muloŋa kudi antu amakwawu anadikokelumu hambadi, wowu atoŋwelawu dehi chachikulu nawu akayihisha; hiyantu asekeshaŋa Nzambi, abalumunaŋa luwi lwaNzambi yetu lwikali kubajama, nakudikala Mwanta wetu Chinaweji, yowu Yesu Kristu.

⁵ Hela mweluka dehi yuma yejima chikupu, nakeŋi kuyanukisha nami, Mwanta, chapulwishiliyi muza mwituŋa daEjipitu, nkumininaku hakujilumuna antu abulili kukuhwelela.

⁶ Niaŋelu abulili kuhemba wanta wawu, hiyakufuma mwaawu mwashakaminaŋawu, nayihembi mumaleŋi ahaya nyaka mumwidima wiyila bwi, nayiswekeli kusompesha kwefuku odu deneni.

⁷ ASodoma naGomora, nanyi kala yanyeŋumukiluku, adumbilili muwuvumbi nakwila yuma yabula kuya mwayileŋeleluwu, chamwenuwu kubabesha kwakesi kahaya nyaka, anekali dehi akutalilahu.

⁸ Mwomumu niwenawa nawa atamishaŋa nyijimba yawu namwatoŋojokaŋawu, adiwulaŋa wanta, atenaŋa akwakulema chatama.

⁹ Hakwila mukulumpi wawaŋelu Mikeli, hafwiliyi ntadi nadiyabolu hansaŋu yamujimba waMosi, hatwesheli kumuhosha chatama nakumwinka muloŋaku; wakuminini dakwila nindi, Yehova akuhosholi.

¹⁰ Hakwila wena atenaŋa yuma yejima yabula kwilukawu chatama; hiyakuditokesha nayuma yamwaya chisemwa yeluka nianyama abulaŋa kutoŋojoka.

¹¹ O yihuŋu yakamonawu! Muloŋayili munjila yaKena; alundumukilili mwaluwili Balami nakulonda wufwetu; anoŋeleli muntadi yaKora.

¹² Wenawa himalola akadi kumwekana mumawŋienu akukeŋaŋana, hadyaloŋawu nanenu; hiyatubiŋa adidiishaŋa wenawu chakadi woma; himavu akadi meji alelokaŋa nampepela; hinyitondu yahanoŋa yakadi nyikabu, yafwa kayedi, yabwitika nikunyiji;

¹³ himankanda akukaluŋalwiji azuwa, atupukaŋa mafulolu ansonyi yawu aweni; hitutumbwa twahitahitaŋa, twanaswekeluwu mwidima wiyila bwi wahaya nyaka.

¹⁴ Wenawa diwu aprofweteleluwu kudi Enoki, wamu chitanu nachiyedi wakufumisha kudi Adama, nindi, Tiyenu, Yehova wenjili namakumi amakombakaji awantu indi ajila,

¹⁵ nakwila mudimu wakusompesha nakukonkolola ejima asekeshaŋa Nzambi, nanyidimu yawu yakusekesha Nzambi yakoŋeluwai chakusekesha Nzambi, nayuma yakala yejima yamuhosheluwu akwanshidi asekeshaŋa Nzambi.

¹⁶ Wenawa hiyakwakunyinyita, hiyakwakutoba, endaŋa mwaya kufwila kwawu kwatama. Tunwa twawu twahoshaŋa mazu atiyakana akudinka wanta; alemeshaŋa antu kumesu kulonda kudiilaku yuma.

¹⁷ Ilaŋa enu akwetu twakeŋa a, anukenu mazu ahosheluwu dehi apostolu aMwanta wetu Yesu Kristu,

¹⁸ ayilejeluwu nawu, Kunyaka yakukuminina kwakekala akwakuseha, akenda mwaya kufwila kwawu kwakusekesha Nzambi.

¹⁹ Wenawa diwu aambokaŋa, ekali yendu; hiyantu elaŋa mwaya mujimba hohu, hiyakweti Spirituku.

²⁰ Hakwila enu akwetu twakeŋa a, dituŋaenu mukukuhwelela kwenu kwabadika kujila, nakulomba mudi Spiritu Wajila.

²¹ Dihembenu kulonda mushakami mukukeŋa kwaNzambi, nakutalila luwi lwaMwanta wetu Yesu Kristu lwashika kuwumi wahaya nyaka.

²² Amu ajinokaŋa yitiyilenu luwi;

²³ amakwawu yihandishenu chakuyihukula mukesi; amakwawu yitiyilenu luwi nawoma, nakuhela niihina dakuvwala dinasampukili majilu achisemwa chaheseki.

²⁴ Kudi yena natweshi kuyihemba mubuli kudimbuka, natweshi kuyiimika kwamwekana lubanji lwakulema kwindi, namuzaŋalu wasweja, chakadi himwatamina;

²⁵ kudi Nzambi wumu hohu, yowu Chamwinu chetu, kwokudi Yesu Kristu Mwanta wetu, kwikali kulema, niwukeleŋi, niwanta, niŋovu; nihelili nyaka yichidi kanda, nikatataka, nihaya nyaka. Amena.