Jakobo 1 - MUKANDA WANZAMBI

¹ Ami Yakoba, nduŋu yaNzambi niyaMwanta Yesu Kristu, nidi nakuyisonekela mukanda, enu akwanyichidi ikumi nayiyedi munaŋa-lapani; nayimwishi.

² Enu ana kwami, tiyenu kuwaha nankashi chimukushika mukweseka kweŋi nakweŋi;

³ muloŋa muneluki kutompa kwatompaŋawu kukuhwelela kwenu kukuleta kutatakena.

⁴ Kutatakena kukalakali mudimu walala chikupu, kulonda mwikali alala chikupu, mulumbuluki, mubuli chuma chimukukaankila hela chimu.

⁵ Mwinenu nabuli maana, alombi kudi Nzambi, wahanaŋa kudi antu ejima makasa ayedi, hahosholaŋaku; akumwinkawu.

⁶ Ilaŋa dinu alombi nakukuhwelela chakadi ntadi; muloŋa watadikaŋa wudi neyi dinkanda dahakaluŋalwiji dahuŋumukaŋa nampepela nakubwankaŋila.

⁷ Muntu owu bayi atoŋojoka nindi wukutambula chuma kudi Mwantaku.

⁸ Muntu wanyichima yiyedi wajilajilaŋa mwelaŋayi mwejima.

⁹ Mana kwetu wakadi kulema atiyi kuwaha chanamulemeshuwu;

¹⁰ nimukwakuheta atiyi kuwaha chanamuzozeshuwu; muloŋa wakahita neyi wuluya wamumatahu.

¹¹ Muloŋa chashikaŋa itaŋwa mwiwulu nankanza yayeni, hiyikúumisha matahu, niwuluya hiwukuhuluka, nilubanji lwawu hilukukisika; dichi chakalepukayi mukwakuheta mwendelaŋayi.

¹² Muntu watatakenaŋa chamonaŋayi kweseka, nakooleki; muloŋa neyi anamutompi dehi wakatambula chibaaba chawumi, chakaniniyi Mwanta kuyinka antu amukeŋa.

¹³ Muntu anesekuwu, bayi ela nindi, Anaŋeseki kudi Nzambuku; muloŋa Nzambi hiyamwesekaŋa nayuma yatamaku, hela yena yomweni hesekaŋa muntuku.

¹⁴ Antu ejima ayesekaŋa nachayikokolaŋawu nakuyidimbeka nakufwila kwawu aweni kwatama.

¹⁵ Dichi kufwila kwatama chikukubaaba ivumu hikukuvwala nshidi; nshidi chiyikukula hiyikuvwala kufwa.

¹⁶ Enu ana kwetu nakeŋa, bayi mudidimbaku.

¹⁷ Yuma yayiwahi yahanaŋawu yejima, niyamukunkulu yalala yejima, yasulukaŋa kwiwulu kudi Tata yayejeji; kudi yena hikwekala kubalumuka, hela mwevulu wakushetumukaku.

¹⁸ Watuvweli namazu ansaŋu yalala mwomwafuukwiliyi yomwenindi, nindi twi kali neyi nyikabu yatachi yahayuma yindi yaleŋeliyi.

¹⁹ Tiyenu enu ana kwami nakeŋa. Antu ejima anyakali kutiya, alabi kuhosha, alabi kuzuwa.

²⁰ Muloŋa kuzuwa kwawantu hikwakoŋaŋa kuloŋa kwaNzambuku.

²¹ Dichi fumishenu majilu ejima ninkunyi yakusumpoka; tambulenu mazu anatumbuwu mudenu nakwovwaha, anatweshi kwamwina wumi wenu hesekaŋa muntu kwila chatamaku.

²² Ikalenu akwakwila mwaya mazu, bayi akwakukumina dakutiya hohu nakudidimba enu awenuku.

²³ Muloŋa muntu wakuminaŋa dakutiya mazu, kwilamu nehi, wudi neyi muntu namoni mesu asemukayi nachu muchibanjilu;

²⁴ chanadimoniyi hakufumahu, navulameni dehi chekalayi.

²⁵ Ilaŋa muntu wukutala mulushimbi lwawaana walala chikupu hakukakelamu, hanekali mukwakutiya wavulamenaŋaku, neli mukwakwilamu, yenowu muntu wakakooleka mwakwililayi.

²⁶ Muntu wadimonaŋa nindi nahembaŋa yijila, iku kufumba idimi dindi nehi, wudi nakudidimba mumuchima, yijila yayeniwu muntu yamukunkulwayi.

²⁷ Yŋila yamonaŋayi Nzambi Tata yetu nindi yalala yayiwahi, yoyakuhempula anshona abula atata jawu, niambanda anfwila hamonaŋawu lukadi, nakudihemba abuli kusampukila kuyuma yampata yamunu mwishina.