Filemoni 1 - MUKANDA WANZAMBI

¹ Ami Pawulu, muntu wambala waKristu Yesu akasawu, nimana kwetu Timotewu, tudi nakukusonekela mukanda, eyi Fwilemoni twakeŋa a, mukwakukalakala hamu nanetu;

² nimuheletu Afwiya, niishidika netu Akipusa, niakwachipompelu chekala mwitala deyi.

³ Luwi lwikali nanenu nikuwunda kwakufuma kudi Nzambi, Tata yetu, nikudi Mwanta Yesu Kristu.

⁴ Chinakutenaŋa mukulomba kwami, namusakililaŋa Nzambi yami mafuku ejima;

⁵ muloŋa natiyaloŋa nsaŋu yakukeŋa kweyi, nichiwamukuhwelelaŋa Mwanta Yesu, nichiwasha muchima hadi akwakujila ejima.

⁶ Nami, kutiyaloŋana kunafumi kukukuhwelela kweyi kusweji Ŋovu, mukwiluka chikupu nenu yuma yetu yayiwahi yejima yidi mudetu yakudi Kristu.

⁷ Eyi mana kwami, natiyili kuwaha nankashi nakudikundeja nakukeŋa kweyi kuwankeŋa, nanichi chiwunatulishi nyichima yawakwakujila.

⁸ Dichi hela nabuli woma wakukuleja mudi Kristu mwatela,

⁹ ilaŋa hansaŋu yakukeŋa nalembi chakulemba, ami ipala Pawulu, katataka nawa nimuntu wambala waKristu Yesu akasawu.

¹⁰ Nakulembeleli nsaŋu yamwanami Onesimusa, inavwali munyonji yami.

¹¹ Hamwaka wadiŋi nindi chakuhalwa, ilaŋa katataka nekali dehi nkwashi wakukwasha nineyi ninami.

¹² Nakufuntishiliyi cheŋi muntu yomweni, diyi muchima wamami aweni.

¹³ Nakeŋaŋa nami nishakami nindi ami aweni, kulonda yena ahiŋi mudeyi ankalakelaŋa munu munyonji yakukoola nsaŋu yayiwahi munidi.

¹⁴ Ilaŋa hinakeŋi kwila chuma chakadi kwiluka munayi muchima weyuku; nalondi chiwukuŋila chachiwahi chifumi kumuchima weyeyi aweni, bayi chakukanjikijaku.

¹⁵ Kwiji dihu hafumini kwambuka naneyi mpinji yantesha, kulonda wikali nindi haya nyaka;

¹⁶ hinduŋu nawa cheŋuku, ilaŋa nabadiki nduŋu, nekali dehi mana kwetu wakeŋa ewa; eŋa, ami namukeŋi nankashi, hakwila eyi dinu chinabadiki, nimumujimba nimudi Mwanta.

¹⁷ Neyi wantoŋojokaŋa neyi nimukwenu twatiyaloŋana neyi, mutambuli neyi wunantambuli ami aweni.

¹⁸ Neyi yena nakukoŋi chatama hela chanti, indi kwiji neyi wukweti mukudi weyi, shaku kumukanda wami.

¹⁹ Ami Pawulu nasoneki nachikasa chamami aweni, nami nakakufuta; naleki kuhosha nami eyi aweni wukweti mukudi wami wawumi weyi waweni.

²⁰ Eŋa, mana kwami, nimonuhu kunkwasha kudeyi mudi Mwanta; ntulishi muchima mudi Kristu.

²¹ Chinakusonekeli mukandiwu neluki chalala nami wukwovwahilamu, neluki nami wukubadika kwila nimunahoshi.

²² Nloŋesheli nawa mwakushakama; muloŋa nakuhweleli nami akanfuntisha kudenu nakulomba kwenu.

²³ Epafwarasa, twekala nindi mukaleya mudi Kristu Yesu, nakwimwishi

²⁴ aMaku, naArisitaka, naDemasi niLuka akwakukalakala hamu nanami anakwimwishi.

²⁵ Luwi lwaMwanta Yesu Kristu lwikali naspiritu yenu.