AHeberu 1 - MUKANDA WANZAMBI

¹ Nzambi wahoshelaŋa hashankulu nawankakulula kutunwa twawatuprofwetu nansaŋa jeŋi najeŋi, mweŋi namweŋi.

² Hamafuku anu akukuminina, nahoshi nanetu mudi Mwana akunjikiliyi kwikala nswana yayuma yejima, mudi yena dimu mwaleŋeleluwu matuŋa amakonu ejima.

³ Yena diyi kutoŋeka kwalubanji lwakulema kwaNzambi, diyi wamufwana chikupu mwekalilayi, diyi wakwatishaŋa yuma yejima nezu daŊovu jindi. Chaneliyi mudimu wakutookesha nshidi hakushakama kuchikasa chachidiilu chaMukeleŋi wekala mwiwulu;

⁴ anamwilishi dehi wakubadika aŋelu, nanochu chanaswaniyi ijina dakubadika dawu kuwaha.

⁵ Indi kaŋelwinyi keliliyi hela ifuku dimu nindi, Eyi wumwanami, nakuvwali lelu? Cheŋi nawa nindi, Ami nukwi kala Tata, yena wukwi kala Mwana?

⁶ Chakuletayi Wedi mumpata yawantu, hakuhosha cheŋi nindi, Aŋelu jaNzambi ejima adifukuli kudi yena.

⁷ Aŋelu hakuyitena nindi, Aŋelu jindi wayilishaŋa spiritu, akwakumukalakela wayilishaŋa nyizuzu yakesi;

⁸ hakwinza Mwana hakumutena nindi, Eyi Nzambi, itanda deyi dawanta dahaya nyaka nanyaka; nilukanu lwakuloŋa yowu lukanu lwawanta weyi.

⁹ Wunakeŋi kuloŋa, wunaheli kuluwa; dichi Nzambi, yowu Nzambi yeyi, nakuwayishi manji akuluŋa chakubadika akwenu.

¹⁰ Nindi, Eyi Yehova, hatachi waalili chikuku chakutuŋila iseki dawantu, nimawulu hinyidimu yakumakaseyi;

¹¹ wena akanoŋa, hakwila eyi saŋa wekalila; wejima wawu akafukuluka chikwehina dakuvwala;

¹² wakayivuŋa neyi kahuma, neyi chikwehina dakuvwala akabalumuka kwawu; ilaŋa eyi kweyi mwomweyi, ninyaka yeyi hiyamba kakumaku.

¹³ Indi kaŋelwinyi keliliyi hela ifuku dimu nindi, Shakamaku kuchikasa chami chachidiilu nichinakabalumuna akwankunyi neyi kwikala itanda dakunyendu yeyi?

¹⁴ Wejima wawu hiyaspiritu anatemeshuwu kukalakela hansaŋu yawantu akaswana wamwinu.