स्तोत्रसंहिता 148 - पवित्रशास्त्र मराठी समकालीन आवृत्ती

स्तोत्र 148

¹ याहवेहचे स्तवन करा. आकाशमंडलातून त्यांचे स्तवन करा; ऊर्ध्वलोकी त्यांचे स्तवन करा.

² त्यांचे सर्व स्वर्गदूत, त्यांचे स्तवन करो; त्यांची सर्व स्वर्गीय सेना, त्यांचे स्तवन करो.

³ सूर्य आणि चंद्रमा त्यांचे स्तवन करा; सर्व चमकत्या तारकांनो, त्यांचे स्तवन करा.

⁴ हे सर्वोच्च आकाशांनो, आणि आकाशाच्याही वरील जलांनो, त्यांचे स्तवन करा.

⁵ त्यांची निर्मिती याहवेहचे स्तवन करो, कारण त्यांनी आज्ञा दिली आणि ती अस्तित्वात आली.

⁶ आणि त्यांनी त्यांची स्थापना सदासर्वकाळासाठी केली आहे— त्यांची राजाज्ञा कधीही रद्द केली जाणार नाही.

⁷ पृथ्वीवर याहवेहचेच स्तवन होवो, खोल महासागर व त्यातील समस्त विशालकाय प्राण्यांनो,

⁸ विजा व गारा, हिम व धुके, तसेच वादळी वारे, त्यांचे स्तवन करोत.

⁹ अहो पर्वतांनो व सर्व टेकड्यांनो, फळझाडे व समस्त गंधसरू,

¹⁰ हिंस्र पशू आणि सर्व गुरे, सूक्ष्म जीव व उडणारे पक्षी,

¹¹ पृथ्वीवरील राजे व सर्व राष्ट्रे, अहो अधिपती व त्यांच्या न्यायाधीशांनो,

¹² युवक व युवतींनो, वृद्ध व बालके.

¹³ तुम्ही सर्व याहवेहचे स्तवन करा, कारण केवळ त्यांच्याच नामाला महिमा मिळो; त्यांचे ऐश्वर्य पृथ्वी आणि आकाशाहून महान आहे.

¹⁴ त्यांनी त्यांच्या लोकांचे शिंग उभारले आहे, ते त्यांच्या सर्व नीतिमान भक्तांना, त्यांच्या अंतःकरणासमीप, त्यांना अत्यंत प्रिय अशा इस्राएली लोकांना स्तवन पात्र केले आहे. याहवेहचे स्तवन करा.