Abakuk 3 - WẼNNAAM SEBRE 2014

A Habakuk pʋʋsgo

¹ Wẽnnaam no-rɛɛs a Habakuk pʋʋsgo, a yẽgengã wɛɛngẽ:

² Sẽn-Ka-Saabo, mam dag n wʋmame tɩ b gomd yãmb tʋʋm-kãsemsã yelle. Yãmb tʋʋm-kãsemsã kẽesa maam dabeem. Maan-y tʋʋm-kãens tõnd zamaanẽ wã. Kɩt-y tɩ tõnd zamaanẽ nebã bãng y tʋʋm-kãsemsã! La y sũ-yikrã pʋga, tẽeg-y y nimbãan-zoeerã yelle!

³ Wẽnnaam yii Teman n watẽ, Pʋ-Peelem-Soabã yii Paarã tãngã n watẽ. Bãmb vẽenemã sẽn yãgdã luda sa-gãongã, tɩ b waoogrã pid dũniyã gilli.

⁴ Bãmb yaa wa vẽenem sẽn yãgde. Vẽenem sẽn yãgd n yit bãmb nugẽ wã, la bãmb pãngã solga beenẽ.

⁵ Bã-longds n dengd bãmb taoore, tɩ yĩn-wɩngr pʋgd b poore.

⁶ Bãmb yalsame n mag tẽngã, bãmb gesame n kɩt tɩ ninsaalb pɛleng yɩke. Pĩnd zamaanẽ tãmsã miimame. Tɩ kʋdem-wẽndẽ zamaanẽ kunkubã sirgdẽ, zĩ-kãens rag n yaa bãmb so-tũudsi.

⁷ Mam neeme tɩ b menesa Kusan tẽng nebã fu-roto, la b zũndga Madiyã nebã rot suga.

⁸ Sẽn-Ka-Saabo, yaa ne kʋɩlsã la y yik y sũurã la? Rẽ yĩnga, yaa kʋɩlsã n kɩt tɩ y sũurã yik la? Yãmb sũurã sẽn puugã yaa ne ko-kãsengã la? Yãmb zombda y wiidi, yãmb zombda y tõogr saar-dãmba.

⁹ Yãmb rʋʋsa y tãpo, yãmb wẽenegã yaa pɛɛm sẽn yit y noorẽ. Yãmb kɩtdame tɩ kʋɩls pus tẽn-gãongã zug n bundẽ.

¹⁰ Tãmsã yãnda yãmb n digda, Sa-koom kiiga ne pãnga, tɩ b wʋmd bog-zulumsã sẽn kuglumdi, t'a koomã tãoosd n kuiis yĩngri.

¹¹ Yãmb pɛɛmã sẽn fɩɩnd n loogdẽ wã, tɩ y kãndã sẽn pɩndã fõt n loogdẽ wã, kɩtame tɩ wĩntoogã ne kiuugã pa b zĩigẽ n ka serg ye.

¹² Yãmb sũur puugame n saagd dũniyã, yãmb tabda bu-zẽmsã ne sũ-kãbre.

¹³ Yãmb yiime n na n fãag y nebã, Yãmb yi n na n fãaga y nin-tũusdgã. Yãmb sãamda nin-wẽng roog sugri, y sãamd-a-la zãng tɩ bũmb ka kell ye.

¹⁴ Yãmb wẽneg n deega bɛɛbã pɛɛm n kõs b nanambsã zutu. Nanambsã yaool n dag n fõta wa sobg n wat n na n sãam maam. B zoet n watame la b kaasd ne sũ-noogo, tɩ wẽnd wa b sẽn solg n paam nimbãan-ned n sãame.

¹⁵ Yãmb pãrga sor ko-kãsengã pʋg y wiidã yĩnga, y pãrg-a-la ko-pɛmã sẽn tar pãngã sʋka.

¹⁶ Mam sẽn wʋm bʋrgã, mam põaagã bendgame. Bʋrgã kɩtame tɩ m no-bɩmsã rigda, tɩ mam kõabã wãgda, tɩ m naoã gĩin maage. La m dag n yasa sɩɩ n gũudẽ, m dag n gũuda sũ-sãangã daare, m dag n gũuda daar ning tõnd sẽn na n tɩ zab ne sẽn zabd-b ne tõndã.

¹⁷ Bala, kankang ka ningd puud ye. Reezẽ tɩɩs ka womd biis ye. Oliiv tɩɩs ka womd ye, la pʋtã bõn-koaadl me ka womd ye. Rũm-bãooneg ka be wubrẽ ye. Rũm-bɛd ka be yãgrẽ ye.

¹⁸ La baa ne rẽ fãa, mam na n maana sũ-noog ne Sẽn-Ka-Saabo. Mam na n kɩdma ne Wẽnnaam sẽn yaa mam fãagdã.

¹⁹ Sẽn-Ka-Saab sẽn yaa mam Zu-soabã yaa mam pãnga. Bãmb kɩtdame tɩ mam naoã keng wa wals nao. La bãmb n sõngd-m tɩ m kẽnd kunkub zutu. Yaa yɩɩlã naab yɩɩlle. Yɩɩnda ne yʋʋm-teed sẽn tar susi.