Mark 7 - O Vatavata we Garaqa 1931 (Vanuatu)

¹ Naŋ ira Pharise me gogorag ma suria, tara tuan vatvatogo, me mule ma ti a Jerusalem.

² Wa neira me ilo ti o tuan tiŋqoro anana we ganagana o sinaga mun o panei purepurei, was gate savsavula, wa neira me golgol apena.

³ O manigiu ira Pharise ŋaŋ, wa ira ta Judea nol, ta tete savsavula galomtag tete ganagana, we kokor goro naliŋara tupura me gaganag tapare ma;

⁴ wa alo we kel ma nan o sare wolwol ta tete sugsug, neira gate ganagana; wa o gene ŋaŋ we sea we qoqo neira me taur usurag ma si a kokor mora, o liŋe vasvasug o lasa ŋaŋ nane, wa o wumeto ŋaŋ, wa o tano pei ŋaŋ o bras, wa o tanoepa ŋaŋ.

⁵ Naŋ alo ine ira Pharise tara vatvatogo me varusia wa si, Ape sava ira tiŋqoro anama gate mulemule tataga naliŋara tupunina me gaganag tapare ma, nava neira we ganagana o sinaga wa mun o panei gate savsavula?

⁶ Pa ni me valuira ti vet wa si, We wia ras i Isaia me gaganag o liŋe prophet apen ikamiu ira sokoi goro kamiu, tama me rave si, O sul iloke we log mava inau mun naŋusura, Nava natoqara we toga aras ran nan nau.

⁷ Pa neira we momogo matila inau, We vatvatogo ape vavae vatraŋ mora tanun was nor o lea vatogoa.

⁸ Kamiu we toavtag o lea vatraŋ amon God, wa we taur goro o liŋai amor o tanun me gaganag tapare ma, o liŋe vasvasug o wumeto ŋaŋ wa o lasa ŋaŋ nane; wa kamiu we ge mulaŋ o gene ŋaŋ we sea we sasarita ape ike ŋaŋ we qoqo.

⁹ Naŋ ni me vet muneira wa, Kamiu we gevtag mantag o lea vatraŋ mon God, si kamiu a matagisgis goro naliŋamiu iloke me gaganag tapare ma.

¹⁰ Apen i Moses me vava mona si, Ka nom mava i tamama tana ravevema; wa, Isei qe vava tatas i tamana si ravevena ni tagea mun o matea apena.

¹¹ Panava ikamiu we vava wa, Si o tanun ta vava mun i tamana si ravevena si, Korban (wa si o sogov) o gene ilone amenau me piriŋ laiko ti nia;

¹² kamiu gate ukegia mulaŋ sin ge o sava mun i tamana si ravevena.

¹³ Wa we ge vanameag o vavae mon God mun naliŋamiu ilone kamiu me taur tapare ma, wa we la tapare at; wa kamiu we ge mulaŋ we sasarita ape ike ŋaŋ we qoqo.

¹⁴ Naŋ ni me suware ma suria o sul nol, ti vava muneira wa, Tur tiŋqoro nol inau ma, wa tur lolomaran.

¹⁵ Itagai ran we toga a varea nan o tanun, wa te mule pata ilo lolona, wa te qara mana lai si a ge lepa ineia. Nava o gene ŋaŋ we rowolue nania, o ine ŋaŋ nane we ge o tanun sin lepa.

¹⁶ Isei naqorona apena sin roŋotag, ni roŋotag nia.

¹⁷ Naŋ ni me kalo pata veta ilele ima nan o sul, wa ira tiŋqoro anana we varusia ape vavae tenegag iloke.

¹⁸ Naŋ ti vava muneira wa, Sa si kamiu mulaŋ o qure tamaike? wa kamiu gate nonom vaglala si o savasava talo vareai ma qe mule pata lai ilo tanun gate mana si a ge lepa ineia?

¹⁹ O manigiu si gate mule pata lai ilo lolona, nava ilo toqana, wa te rowolue at ilo wora; ti ge wenewene o gene ganagana ŋaŋ.

²⁰ Naŋ ti vava si, O gene we rowolue at nan o tanun, o ine nane we ge lepa o tanun.

²¹ Ape nan alo lolona, nan o tine toqe tanun ŋaŋ te rowolue at o nonomia malkeke ŋaŋ, o val sale pakapaka ŋaŋ, o vus nawono,

²² o palpal, o ararike, o matev wasmata, o matai malkeke, o vava nawono, o nom rekereke, o liŋe qaqae.

²³ O malagene ŋaŋ iloke we rowolue nol nan alo lolona, wa we ge lepa o tanun.

²⁴ Naŋ ni me tavaraka nan o vatine me sirig sage ilo tiŋgoro vanua a Tur wa a Sidon. Wa ni me kalo pata ilele ima, wa gate maros si sei a gilala apena; pa ni gate liŋarag lai tea.

²⁵ Pa gate maul, o tuara tavine me roŋotag ape ineia, o vui gagavu we ge natuna o malamala, wa ni me niŋa we rowo taqa ape raŋona.

²⁶ Pa o tavine ilone o ta Grik, o qeteg vanua ta Surophenikia; wa ni me paere munia ni vure savrag o vui we tatas nan i natuna.

²⁷ Nava i Jesus me vet munia wa, Ukeg ira reremera si neira toqo amoa; ape gate wia we la o sinaga nagara reremera wa we savrag mun gara kurut.

²⁸ Pa ni me valuia we vava munia wa, Tagai wa, Lord; ape o kurut ŋaŋ alalaŋe tano ganagana we gana o vain sinaga gara reremera.

²⁹ Naŋ ti vava munia wa, Ape vavae iloke ka mule at; o vui we tatas ilone me rowolue veta nan natuma.

³⁰ Wa o tavine me toa kel ilo imana, wa me ilo suar i natuna we risa alo tanoepana, wa o vui we tatas ilone me rowolue veta.

³¹ Naŋ ni me rowolue mulaŋ nan o tiŋgoro vanua a Tur wa a Sidon, wa me niŋa siwo i pan qilo ta Galilea, we mule raveaglue o tiŋgoro vanua Dekapolis.

³² Wa neira we lav ma suria o qorowono o poŋa, wa we paere munia sin taŋovia mun napanena.

³³ Naŋ ni me lav asaua nan o sul ilo pupuel, ti gis napisuna ilo qorona; wa ti anus, ti taŋo vano ape garameana nia:

³⁴ ti ate laŋ kalo ivunana, ti masorsor, ti vava munia si, Ephphatha, wa si, Ka waka.

³⁵ Wa gaplot non o tano roŋroŋotag ŋaŋ me waka raka; wa nagagarameana me tatavaul, wa ni me vava laqa.

³⁶ Naŋ ni me gatogoro maremare nan neira wa sororo munsei; panava alo ni we gatogoro gagarakae ineira, neira me sororo aneane nan amoa apena.

³⁷ Wa neira me mamakei aneane raka sage, we vet si, Ni me gagapalag mantag o gene ŋaŋ; wa ni we ge ira qorowono si a roŋotag, wa ira luto si a vava.