Mark 6 - O Vatavata we Garaqa 1931 (Vanuatu)

¹ Naŋ ni me rowolue nan o vatine me niŋa naturvanuana; wa ira tiŋqoro anana we tatataga ineia.

² Wa o qoŋ mapsag me wesu, wa ni me qeteg vatvatogo alo ima siwo tuwale; wa we qoqo we roŋotag mamakei, we vet wa, O ike ŋaŋ mun i gene iloke ma avea? wa o sava o lolomaran me la veta ma munia, ape o vasasa ŋaŋ mulaŋ tamaike we ge mun napanena?

³ Gate iloke i karpenter, natun i Meri, wa ira tasina i James wa i Joses wa i Juda wa i Simon? wa ira tutuana gate toga iake amenina? Wa neira me tutuag ape neia.

⁴ Nava i Jesus me vet muneira wa si, Tete nom mataketake o prophet, nava alo tur vanuana, wa amaira sogona, wa alo tur imana.

⁵ Wa ni gate ge lai o vasasa si ta tuwale aia, nava ni me taŋov o tapai we mageregere mun napanena, wa me ge esura.

⁶ Wa ni me mamakei ape nor o nom qerqeret. Wa ni me taletale alo vutre vanua ŋaŋ we vatvatogo.

⁷ Naŋ ni we log ma suria ira numei nirua, wa we qeteg suware neira at pul ruarua, wa ni me la muneira o mana goro o vui gagavu ŋaŋ.

⁸ Wa ni me gatogorora si nipea la o sava ape matesala, nava o qat tigo ta tuwale; nipea o taŋa, wa nipea o bread, wa nipea o som ape rotig;

⁹ nava si a rot goro o malekai mun o vinkau, wa si nipea saru o siopa sarusaru nirua.

¹⁰ Naŋ ti vet muneira wa, Alo si kam qe kalo pata ilo ima avea, tur togatoga aia kamiu gai rowolue nan o vatine.

¹¹ Wa irasei ŋaŋ qe tete lav vasgot kamiu avea, wa tete roŋotag kamiu, alo kam we rowolue nan aia tur neneŋag savrag o wuwue tano alalaŋe raŋomiu mun vaglala mun neira. We nun nau we vava mun kamiu si te mataketake mun Sodom wa Gomora alo qoŋ veveg nan mun o vanua ilone.

¹² Naŋ neira me rowolue we toretore si o tanun ŋaŋ a nomleas.

¹³ Wa neira me vure lue o vui we tatas ŋaŋ we qoqo, wa me nonon ira mageregere we qoqo mun o lig oliv, wa me ge esura.

¹⁴ Naŋ i Herod i maranaga me roŋotag mona, ape nasasana me gao veta ti alo maea, wa ni me vava si, I John i Vasugroŋo me tavaraka veta nanra mate, wa o manigiu o ine o vasasa ŋaŋ we mana alo ineia.

¹⁵ Nan o tuaniu wa si, I Elia nake; wa o tuaniu si, O prophet nake, si tama isei nanra prophet ŋaŋ.

¹⁶ Nava i Herod me roŋotag mona, we vet wa si, I John iloke, nau me sal mot naqatuna ti; ni me tavaraka veta nanra mate.

¹⁷ Apen i Herod iloke me suware veta me taur varaget i John, wa me rotia alo ima rotrot, o manigiu i Herodias rasoan i Philip i tasina, ape ni me lagia ti.

¹⁸ Apen i John me vava mun i Herod si, Gate tira ape lea si ka lav rasoan i tasima.

¹⁹ Wa i Herodias me loloanua apena, wa we maros we ge mateia, nava gate lai.

²⁰ Apen i Herod me momogo i John, we gilala si neia o tanun taniniga wa we roŋo, wa ni me matagisgis goroa; wa ape ni me tiŋqoroa ni me gagapalag vagaqoqo apena, wa me tiŋtiŋqoro malakalaka ineia.

²¹ Pa o qoŋ we wia me wesu i Herod me ge o ganagana ape ni me wota ti alolona munra liwoa ŋaŋ amaia, tara liwoa goro tar, tara moai ŋaŋ ta Galilea.

²² Wa natun i Herodias iloke o tavine me mule pata ma me lakalaka, wa we taŋo mun i Herod tarasei we risa tuwale amaia; wa i maranaga ilone me vet mun o malamala wa, Ka paere munau ape gene tea ko ta maros lai, wa na te la at muniko.

²³ Wa ni me vava vagogonag munia si, O gene tea ko ta paere lai munau apena, na te la at muniko, ta niŋa ape nok o tavala marana.

²⁴ Naŋ iro gene me rowo pata, me vet mun ravevena wa, Si na paere o sava? Naŋ neia wa si, Naqatun i John i Vasugroŋo.

²⁵ Wa gaplot ni me kalo pata togtogoa sur i maranaga, me paere mona, we vet wa, Nau we maros si ka la rigrig ma alo tapera naqatun i John i Vasugroŋo.

²⁶ Naŋ nalolon i maranaga me wono ran apena; pa o manigiu o vavae ni me log vagogonag ti, wa o manigiu iragai we risa tuwale amaia, ni gate maros we gevtagia.

²⁷ Pa i maranaga me vatraŋ gaplot o soldier at, me vareg si a lav naqatuna ma.

²⁸ Wa i gene me mule at me sal mot naqatuna alo ima rotrot, wa me lav naqatuna ma alo tapera, wa me ukeg mun o malamala; wa o malamala me ukeg mun ravevena.

²⁹ Naŋ ira tiŋqoro ŋaŋ anana me roŋotag mora, me mule at, wa we taur kalo natamatena, wa me saloa alo qaraŋ tamate.

³⁰ Naŋ ira sala we gogorag ma sur i Jesus, wa we gaganag kel munia o gene nol, o savasava ŋaŋ neira me gagapalag, wa o savasava neira me vatvatogo apena.

³¹ Naŋ ni me vet muneira wa, Pa ikamiu, tur mule asau ma ilo masao vanua vanameag, wa tur mapmapsag galtag kamiu. O manigiu si o sul we mulemule ma wa we totoa kel we qoqo, wa neira gate toga mamasa ilo si a ganagana.

³² Wa neira me toa vano ilo masao vanua vanameag vawo aka we asau.

³³ Pa o sul ŋaŋ me ilora we toa, wa we qoqo me gilala si ineia; wa neira we valago tuwale ilo vatine nan val laqlaqe vanua ŋaŋ mun o raŋoi, wa me valago sal neira, wa me vug tuwale suria.

³⁴ Naŋ i Jesus me rowo kalo, we ilo o sul liwoa wa we lolomagarosa ineira, ape neira tama o sheep o altag goro tagai; wa ni me qeteg vatvatogo vagaqoqo neira.

³⁵ Wa o masao qoŋ me qoqo veta, wa ira tiŋqoro anana we mule ma suria we vava munia wa si, O vatike o vanua vanameag, wa o masao qoŋ me qoqo veta;

³⁶ si ka ukegira, si neira a mule siwo ilo utag ŋaŋ wa ilo vutre vanua ŋaŋ we toga wawaliog, wa si a tuvag o sinaga nagara; o manigiu itagai amaira si neira a gana.

³⁷ Pa ni me valui gorora we vet wa si, Ikamiu wa, tur la muneira si a gana. Naŋ neira we vava munia wa, Pa si kamam a mule momam wa we tuvag o sinaga mun o pene melnol vagarua, wa we la muneira si a gana?

³⁸ Pa ni me varusira wa si, Nivisa o bread amen kamiu? Tur mule at, tur ilo momiu. Naŋ me lolomaran paso mora apena, we vet si, Tavelima, wa o iga nirua.

³⁹ Naŋ ni me vareg muneira si neira a pute nol siwo, o vavtigiu o vavtigiu, alo valis we qaro.

⁴⁰ Wa neira me pute mora siwo, o garatigiu o garatigiu, melmelnol wa saŋsaŋavul tavelima.

⁴¹ Naŋ ni me taur o bread ilone tavelima, wa o iga nirua, ti ate laŋ kalo ivunana, ti wievavae; wa ni me tuqe wora o bread wa me tirag munra tiŋqoro anana, si neira a sogo muneira; wa ni me tirag wora mulaŋ o iga nirua ilone muneira nol.

⁴² Wa neira me ganagana nol, wa me toqo qet.

⁴³ Wa neira me sau kalo o garate sinaga me tuqe ti, o gete saŋavul tuwale o numei nirua we ura, wa o iga mulaŋ.

⁴⁴ Pa iragai me gana mora o bread tama tar vaga tavelima, o rereata.

⁴⁵ Naŋ rigrig ni me vasosov ira tiŋqoro anana si a vega vawo aka, wa a levegao moaia tavala qilo i Bethsaida, wa ineia te ukeg mona o sul.

⁴⁶ Wa me vava vatulag paso muneira, ni me toa kalo ivune tauwe sin tataro.

⁴⁷ Naŋ me ravrav, wa o aka alo tine qilo veta, pa ineia magesena alo tano.

⁴⁸ Wa ni me ilo ragai we vivtigira alo we suasua; ape o laŋ we sawu taniniga gorora. Naŋ tama alo masao mamamata o vavatiu talo qoŋ ni we susurut ma sur neira, we so naraŋona avune pei; wa ni me maros we mule sal neira.

⁴⁹ Wa neira me iloa we mulemule avune pei, wa me nonom si o roŋo, wa we awoawo raka.

⁵⁰ Ape neira nol me iloa, wa natoqara we matikotiko apena. Pa rigrig ni me vava muneira, ti vet muneira si, Tur sov naapemiu, inau ran, turpea gogogolo.

⁵¹ Naŋ ni me vega kalo surira vawo aka, wa o laŋ me sawu mot; wa namalara me rowo aneane raka sage apena, wa neira we mamakei.

⁵² Ape neira gate lolomaran tea ape bread ŋaŋ; o manigiu natoqara me wasvat.

⁵³ Naŋ me levegao siwo paso, neira me niŋa ilo vanua Genesaret, wa me tul o vat.

⁵⁴ Wa neira me rowo kalo nan o aka, wa rigrig o sul we gilala si neia,

⁵⁵ wa we valago tal a tag ta vanua ilone nol, we qeteg sasa raka ira gopae ŋaŋ alo tano epara ilo masaoi neira we roŋotag si ineia aia.

⁵⁶ Wa ni ta mule pata ivea, si o vutre vanua ŋaŋ, si a tag tavea, pa neira te mapmap ira mageregere alo sarewolwol ŋaŋ, wa we tiasia si neira a taŋo lai vano si ape non o golgolo siopa; wa irasei ŋaŋ te taŋo lai vano ape neia te esu ti apena.