Mark 5 - O Vatavata we Garaqa 1931 (Vanuatu)

¹ Naŋ neira me niŋa a tavala qilo, ilo vanuara ta Gerasa.

² Wa ni me vara kalo veta nan o aka, wa gate maul o tanun o vui gagavu amaia me vatatua we talo qaraŋ tamate ŋaŋ.

³ Pa non o tano togatoga alo qaraŋ tamate ŋaŋ; wa isei gate rot laia, si mun o ga talai.

⁴ Ape me rot vagaqoqo veta neia mun o ga talai ape raŋona wa ape panena, pa ni we kekerag mot o ga talai, wa me vara latelate o gae ape raŋona, wa isei gate vavaka si a ge mamaru neia.

⁵ Wa vagae alo qoŋ wa alo maran ni me togatoga alo tauwe ŋaŋ wa alo qaraŋ tamate ŋaŋ, we uloulo, we taratara kelua mun o vat.

⁶ Pa ni me ilo i Jesus aras, ti valago sur, ti vatieqau goroa,

⁷ ti awo mun o liŋai we poa, ti vet wa, O sava amen nau wa amaiko, Jesus, Natun God i Eleele? Na we log nasasan God ivunama si nipea ge rarakut inau.

⁸ O manigiu Jesus me vava veta munia si, Rowolue ma gai, vui gagavu, nan o tanun ilone.

⁹ Naŋ ti varusia wa, Isei nasasama? Wa ni me valuia, ti vet wa, Nasasak i Legion, ape kamam we qoqo.

¹⁰ Naŋ ti tias vagaqoqoa si nipea vatraŋ savragira nan o vanua.

¹¹ Pa o vavtig qoe liwoa aia ape taqaŋ tauwe, we susula.

¹² Wa o vui tatas nol me tiasia, we vet wa, Ka suware kamam at ilo qoe ŋaŋ, si kamam a mule pata ilololora.

¹³ Wa i Jesus me maukeg gaplot muneira. Wa o vui gagavu ŋaŋ me rowolue, we mule pata ilo qoe ŋaŋ; wa o vavtig qoe me tagora sasariaeae ape tutŋe tauwe ilo qilo; we tama tar vagarua; wa me maumauwora alo qilo.

¹⁴ Naŋ iragai me vaŋvaŋan o qoe ŋaŋ ti me totoa, wa me sororo alo laqlaqe vanua wa a tag taia. Naŋ neira we rowolue ma si a ilo o gene me ge ti si we savai.

¹⁵ Naŋ neira we mule ma sur i Jesus, we sagarag i gene o vui we tatas me gege ineia ti, pa we pute wa we saru o siopa, wa we lolomaran kel, i gene nan qa o Legion me toga ti amaia, wa neira we gogolo.

¹⁶ Wa iragai me ilo mora ti me gaganag mun neira apena, si me ge gasei amen i gene o vui we tatas me gege ineia ti, wa ape qoe ŋaŋ mulaŋ.

¹⁷ Wa neira me tias raka ineia sin toavtag nor o tiŋgoro vanua.

¹⁸ Naŋ ti vega vawo aka, wa i gene o vui we tatas me gege ineia ti we tiasia sin goara lai amaia.

¹⁹ Nava i Jesus gate mawui goroa, panava ti vet munia wa, Ka kel ilo imama sur ra sogoma, wa ka gaganag lue muneira o gene liwoa ŋaŋ i Lord me gapalag veta muniko, wa me magarosa goroko.

²⁰ Naŋ ti van at, ti toretore raka alo Dekapolis ape gene liwoa ŋaŋ i Jesus me gapalag ti munia. Wa o tanun ŋaŋ me mamakei nol apena.

²¹ Naŋ i Jesus me levegao veta mulaŋ vawo aka i tavala qilo siwo, wa o sul liwoa me gogorag tuwale ma suria, wa ni we toga a pan qilo.

²² Wa ilo, i tuara nanra liwoa goro ima siwo tuwale we mule ma, nasasana i Jairus, wa we iloa, ti rowo taqa ape raŋona;

²³ wa we tias vagaqoqo ineia, ti vet wa si, Natuk o malamala te qale nosa ti; pa si ka mule wa we taŋovia mun napanema sin maremare kel, wa ni te esu.

²⁴ Naŋ ti mule tuwale amaia, wa o sul liwoa we tatataga ineia, wa we vapipiŋia.

²⁵ Pa o tuara tavine o nara laqelaqe me ge neia o tau saŋavul tuwale o numei nirua veta.

²⁶ Wa ni me roŋo vivtig vagaqoqo amaira gismana we qoqo, wa me vile qet nania pulan o savasava, wa gate piriŋ ilo tea, nava me tatas ran nan amoa apena.

²⁷ Pa ni me roŋotag apen i Jesus, wa we mule ma alo sul ape kulana, ti taŋo vano ape non o siopa;

²⁸ ape ni me vet si, Na ta taŋo vano lai tea ape non o siopa, wa te ge esu kel nau apena.

²⁹ Wa gaplot o matevuravura tape narana me sisim, wa ni me roŋotag alo tarapena si me ge esua nan o gopae ilone we tatas.

³⁰ Naŋ gaplot i Jesus me gilala veta alo ineia kel si o mana me rowolue nania, wa ni me kilau ris alo sul ti vet wa, Isei nane me taŋo vano ape nok siopa?

³¹ Naŋ ira tiŋqoro anana me vet munia wa, Ko we ilo o sul we vapipiŋiko, wa ko we vava lai si, Isei me taŋo vano ape nau?

³² Naŋ ni me ate kelkel sin ilo iro gene me ge tamaine.

³³ Pa o tavine ilone we gogogolo wa we sigeragia, we gilala o sava me ge ti alo ineia, wa we mule ma we rowo taqa goroa, wa we gaganag lue munia o nun nol.

³⁴ Naŋ ni me vet munia wa, Natuk, nom o nomtup me vaesuko; mule tamata at, wa ka toga wasawasa nan nom o gopae we tatas ilone.

³⁵ Pa alo ni te qale vava ti, irasei we van ma alo iman i gene we liwoa goro ima siwo tuwale, we gaganag si, Natuma me mate veta; ape sava ko te qale anumag i Vatogo?

³⁶ Nava i Jesus me roŋotag mona o vavae me gaganag ti, wa ti vava gaplot mun i liwoa goro ima siwo tuwale wa, Nipea gogolo, ka nomtup mamasa.

³⁷ Wa ni gate ukeg isei si a tataga amaia, nava i Peter tana i James, ratol John tasin i James.

³⁸ Wa ni we va niŋa naiman i liwoa goro ima siwo tuwale, wa we sagarag o sul we wulano, we taŋtaŋ wa we uloulo we qoqo.

³⁹ Naŋ ti kalo pata, ti vava muneira wa, Ape sava kamiu we wulano wa we taŋtaŋ? O malamala gate mate, nava we maturu.

⁴⁰ Pa neira we marmaraesagia; nava ni me vure savrag qet neira, ti lav i taman o malamala ilone tana ravevena, wa ragetol ilone amaia, wa ti kalo pata ilo masaoi o malamala ilone we risa aia.

⁴¹ Naŋ ti taur goro napanen o malamala ilone, ti vava munia wa, Talitha kumi; pa we vava leas si, Malamala, na we vava muniko, Tavaraka.

⁴² Wa gaplot o malamala me tira raka, wa me alial kelkel, ape natauna me saŋavul tuwale o numei nirua veta. Naŋ neira me mamakei aneane apena.

⁴³ Pa ni me gatogoro vagaqoqo neira nan sei wa gilala ape gene iloke: wa ni me vet si a la vano munia sin gana.