Mark 4 - O Vatavata we Garaqa 1931 (Vanuatu)

¹ Mulaŋ, ni me qeteg vatvatogo a pan qilo; wa o sul liwoa we gogorag tuwale suria; o manigiu si ni vega kalo vawo aka, ti pute alo qilo: pa o sul nol we tira a pan qilo alo tanomasa.

² Naŋ ni me vatvatogo vagaqoqo ineira mun o vavae tenegag ŋaŋ; wa alo non o vatvatogo ni me vava muneira wa,

³ Ragai, tur roŋotag; Ilo, i gene we savur o sivui me rowolue sage sin savur.

⁴ Naŋ me ge alo ni we savsavur si o tuan sivui me masu a pan matesala, wa o manu ŋaŋ ta vunana me rowo ma me gana qet ilone.

⁵ Pa o tuaniu me masu avune warevat, alo masaoi o tano gate purat apena; wa me sug raka gaplot ape gate tano we roro apena;

⁶ nava alo loa me rowo kalo raka me saqo gina, wa o manigiu o gariu tagai apena me kor qet.

⁷ Wa o tuaniu mulaŋ me masu ilo vatitne molmol ŋaŋ; wa o molmol ŋaŋ me sug raka wa me gis goro ilone, wa gate ukeg o woai apena.

⁸ Wa o tuaniu mulaŋ me masu ilo tano we wia; wa me ukeukeg o woai ŋaŋ we kalokalo sage we poapoa taso; wa me uwa saŋavul tol iloke, wa iloke saŋavul laveatea, wa iloke melnol.

⁹ Naŋ ni me vava muneira si, Isei naqorona apena sin roŋotag, ni roŋotag nia.

¹⁰ Wa alo ni me toga veta alo pupuel, iragai ŋaŋ amaia tara numei nirua me varusia ape vavae tenegag ilone.

¹¹ Naŋ ni me vet muneira wa, Me ukeg veta ma mun kamiu si a gilala o gene we vagis tape marana non God; nava munragai ŋaŋ we ta avarea we ge o gene ŋaŋ alo vavae tenegag ŋaŋ;

¹² si neira a sagarag alo we sagsagarag, nava nipea ilo vaglala; wa a roŋotag alo we roŋroŋotag, nava nipea roŋotag vaglala; nan neira wa vile ris, wa nan wa nomvitag napugara mun neira.

¹³ Naŋ ti vet muneira wa, Kamiu gate lolomaran o vavae tenegag iloke? wa kam te gilala o val vavae tenegag ŋaŋ gasavai?

¹⁴ I gene we savsavur we savur o vavae nane.

¹⁵ Wa iloke ŋaŋ iragai a pan matesala, ti savsavur o vavae aia; wa alo si neira qe roŋotag, wa rigrig i Satan we mule ma, ti wosag kalo o vavae me savur siwo ti alo toqara.

¹⁶ Wa iloke ŋaŋ we sasarita apena we savsavur neira siwo ivune warevat, iragai ŋaŋ nane alo si neira qe roŋotag o vavae we taur gaplot mun o qaraqara;

¹⁷ pa o gariu tagtagai alololora, pa we toga galean gese; wa paso nan, alo we ganawono raka wa we koskos gap ape vavae, neira te tutuag gaplot apena.

¹⁸ Wa we sea ŋaŋ iloke we savur neira ilo vatitne molmol ŋaŋ, iragai nake me roŋotag veta mora o vavae,

¹⁹ wa o nonomia teqateqa ŋaŋ tape marama iloke, wa o galeva tape tarvaleŋaleŋa, wa o tortoron ŋaŋ ape savasava ŋaŋ mulaŋ we vugvug ilolora, we gis goro o vavae, wa ti qeteg wegowego apena.

²⁰ Wa iloke mulaŋ iragai me savur neira ti avune tano we wia, irasei ŋaŋ we roŋotag o vavae wa we taur mora; wa we uwa o woai ŋaŋ, iloke saŋavul tol, wa iloke saŋavul laveatea, wa iloke melnol.

²¹ Naŋ ni me vava muneira wa, Sa si we mulevag ma o pul si a map alalaŋe wumeto, si alalaŋe tanoepa? pa gate si a map kalo vawo tanopul?

²² Ape itagai tea we toga pata, nava was te ŋaŋalue aŋaisa; wa itagai me liŋarag ti, nava was te rowolue ilo maea.

²³ Isei naqorona apena sin roŋotag, ni roŋotag nia.

²⁴ Naŋ ni me vava muneira wa, Ilo goro kamiu we roŋotag o sava. O manigiu o qat towotowo kamiu we towotowo nia, te towo kel mun kamiu mun o ine; wa te tuan sage mulaŋ mun kamiu we roŋroŋotag momiu.

²⁵ Ape i gene qe taur mona, te vasoal ma munia; nava i gene gate taur mona, te lareag nania o gene mulaŋ ilone ni we taur.

²⁶ Naŋ ni me vava si, O marana non God we tamaike, tama si alo isei qe savrag o sivui ivune tano,

²⁷ wa we matmatur wa we tatavaraka o qoŋ wa o maran, wa o sivui ti totou sage, ti toletole, wa ni gate gilala si gasei.

²⁸ Ape o tano ti uwauwa matapuna o woai ŋaŋ; o ŋoliu amoa, paso nan o wutui, paso nan o sinaga matua alo wutui.

²⁹ Pa me ukeg paso veta o woai, ni qara vatraŋ gaplot at o gasal, ape me wesu veta ma o gorogoro.

³⁰ Naŋ ni me vava si, Nina te ge o marana non God sin sasarita ape sava? wa nina te tenegag apena mun o vavae tenegag tama avea?

³¹ We tama o wo mustard; wa ilone, alo te savur ivawo tano, we mantagai nan o sivui ŋaŋ we toga avawo tano;

³² pa me savur paso, ti totou sage ti qeteg poapoa nan o val gene riv ŋaŋ talo tuqei, wa we ge o waŋarai liwoa ŋaŋ, si o manu ŋaŋ tavunana a anig lai alo malumalu tapena.

³³ Wa ni me gaganag o vavae muneira alo vavae tenegag ŋaŋ tamaike we qoqo, tama neira we gilala we roŋotag;

³⁴ pa si o vavae tenegag ta tagai, ni gate gaganag muneira; wa ni me gaganag ulul o gene ŋaŋ munra tiŋqoro anana we asau.

³⁵ Naŋ alo qoŋ nane ilone, pa me malurav veta ma, ni we vet muneira si, Nina levegao tavala qilo.

³⁶ Wa me ukeg paso o sul, neira me lavia ivawo aka amaira, tama ni we toga veta; wa o tuan nati aka mulaŋ amaia.

³⁷ Naŋ o laŋ liwoa ti siwo ma, wa o rep me rowo kalo ma ilo aka, o manigiu si me uravag veta o pei.

³⁸ Pa ineia ape kereaka we matur ape qat uluŋa; wa neira we vavaŋovia, we vet munia wa, Vatogo, ko gate nonom apena si nina we mate nake?

³⁹ Naŋ ni me tavaraka me ŋorov goro o laŋ, wa we vet mun o pei wa, Toga roroŋo, naenae; wa o laŋ me sawu mot, wa me taro popo apena.

⁴⁰ Naŋ ti vet muneira wa, Ape sava kamiu o matev gogogolo tamaike? wasi tagai tiqa o nomtup amen kamiu?

⁴¹ Pa neira me gogogolo aneane, we varvava wa si, Isei gai iloke, ape o laŋ wa o qilo we roŋotagia gegese?