Mark 3 - O Vatavata we Garaqa 1931 (Vanuatu)

¹ Naŋ ni me mule pata mulaŋ ilo ima siwo tuwale, wa o tanun aia o rurus me ge napanena.

² Wa neira me matagisgis goroa ni te ge esua alo qoŋ mapsag si tagai, si neira a tila ineia apena.

³ Naŋ ni we vet mun i gene o rurus me ge napanena si, Tavaraka ma gai ilo vatitnai.

⁴ Naŋ ni we varusira wa si, We tira ape lea si a ge wia alo qoŋ mapsag, si a ge tatas? si a vaesu o atai, si a ge mate? Pa neira me naenae roroŋo.

⁵ Wa ni we tatalai kelkel ivunara mun o lologagara, me vivtigia gina ape toqara we wasvat, ti vet mun i gene wa si, Sigag lue napanema ma. Naŋ ti sigag lue ma, wa napanena me rip kel munia tama o tavaliu.

⁶ Naŋ ira Pharise me rowolue, wa gaplot me nit sara tuwale naliŋara amaira Herod ape neia, neira te ge tagea laia gasavai.

⁷ Wa i Jesus me sirig kel siwo, tara tiŋqoro anana amaia, i pan qilo; wa o sul liwoa nan o Galilea we tataga ineia,

⁸ wa nan o Judea, wa nan o Jerusalem, wa nan o Idumea, wa a tavala Jordan rowo; wa ira ta tag ta Tur wa ta Sidon o sul liwoa me roŋotag paso mora ape savasava ni me ge ti, we mule ma suria.

⁹ Naŋ ni me vet munra tiŋqoro anana si o nati aka a tataga rivtagia, o manigiu o sul, nan wa qisaŋia.

¹⁰ Ape ni me vaesura ti we qoqo, o manigiu si neira a rowo ivunana si a taŋo lai vano ape neia, irasei ŋaŋ o gopae we gege aneanera.

¹¹ Wa o vui gagavu ŋaŋ, alo we iloa, me rowo taqa goroa we awoawo we vava wa si, Iniko Natun God.

¹² Wa ni me ŋorov goro aneanera nan wa gaganag luea.

¹³ Naŋ ni me vara kalo vawo tauwe, we logira ma suria ni we marosira; wa neira me kalo suria.

¹⁴ Wa ni me vonog ira pul saŋavul tuwale o numei nirua, si neira goara amaia, wa sin suware luera at si a toretore,

¹⁵ wa si neira a taur mora o mana si a vaesu o val gopae ŋaŋ, wa si a vure savrag o vui we tatas ŋaŋ.

¹⁶ Wa ni me tiu navaruesasana mun Simon si Peter.

¹⁷ Wa James natun i Sebede wa i John tasin i James, wa ni me tiu munrara navaruesasanrara si Boanerges, wa si, Ira nat manu nuŋnuŋ.

¹⁸ Wa i Andrew, wa i Philip, wa i Bartholomew, wa i Mathew, wa i Thomas, wa i James natun i Alpheus, wa i Thadeus, wa i Simon i Kananites,

¹⁹ wa i Judas Iskariot; ineia mulaŋ gina me maniriŋia. Naŋ neira me mule pata ilele ima.

²⁰ Wa o sul we vug tuwale mulaŋ o manigiu si neira tete gana vires lai o sinaga apena.

²¹ Naŋ ira sogona me roŋotag mora wa me rowolue si a taur varagetia; ape neira me vet si, Ni me lelera veta.

²² Pa ira vatvatogo me siwo ma ti a Jerusalem me vava mora si, I Beelsebub amaia; wa si, Mun i moai goro o vui we tatas ŋaŋ ni we vure lue o vui we tatas ŋaŋ.

²³ Naŋ ni me log tuwale neira ma suria, me vava tenegag muneira wa si, I Satan te vure lue lai i Satan ga savai?

²⁴ Pa si qe vilewora o marana, o tavaliu nan o tavaliu, o marana ilone tete tira lai;

²⁵ wa si qe vilewora o ima, o tavaliu nan o tavaliu, o ima ilone tete tira lai.

²⁶ Wa si i Satan qe tavaraka goro ineia kel, wa qe vilewora, ni tete tira lai, nava naulusina apena veta.

²⁷ Pa isei tete kalo pata lai ilo iman i vavakae wa we saŋrag napulana ŋaŋ, sin qe tete rot amoa i vavakae ilone; pa paso nan ni te sese lai naimana.

²⁸ We nun nau we vava mun kamiu, Si te nomvitag o val pugai ŋaŋ munra nat tanun, wa val vavae ŋaŋ neira te vava nawono lai nia;

²⁹ nava isei ta vava nawono goro o Vui we Roŋo, ni tete taur mona lai o nomvitag pugai ti tuai ti tuai, nava we tira ape te veveg galava ineia ape ganganor.

³⁰ Wa o manigiu neira me vava si o vui gagavu amaia.

³¹ Naŋ alo ine ira tatasina wa i ravevena me mule ma suria, wa we tira avarea, we vatraŋ rasei at suria, we suwarea ma.

³² Pa o sul me putepute wawaliogia; wa neira me vet munia wa, Ilo, i ravevema tara tatasima a varea veta, we sikesikeko.

³³ Wa ti valuira, ti vava si, Pa isei i ravevek wa ira tatasik?

³⁴ Naŋ ti ate kelkel ivunaragai we putepute waliogia, ti vet wa, Ilo, i ravevek nake, wa ira tatasik.

³⁵ O manigiu si isei qe gagapalag o maros anon God, ineia i tasik wa i tutuak wa i ravevek.