Mark 2 - O Vatavata we Garaqa 1931 (Vanuatu)

¹ Naŋ me paso o tuan qoŋ ni me mule pata mulaŋ i Kapernaum; wa me sororo si neia alo ima veta.

² Wa gaplot o tanun we qoqo me vug tuwale, o manigiu si gate maea ilo, si ape mateima wa tagai; wa ni me gagaganag o vavae muneira.

³ Naŋ irasei we mule ma suria we tak ma o mawea, o tanun pul vat we sasasa ineia.

⁴ Wa neira gate peteŋ laia ape sul, wa neira me sese wora o noota alo masaoi ineia aia, wa me waka paso, qara varoro siwo o tanoepa i mawea we risa avunana.

⁵ Naŋ i Jesus we ilo nor o nomtup ti vava mun i mawea wa, Natuk, me nomvitag muniko napugama ŋaŋ.

⁶ Pa o tuan vatvatogo we putepute aia, wa we lealeasag roroŋo alo toqara wa si,

⁷ Ape sava i gene we vava tamaike? we vava nawono: isei we nomvitag lai o pugai ŋaŋ, nava i tuwale, i God nane?

⁸ Wa gaplot i Jesus we lolomaran alo atana apena, si neira we leasag tamaike alo lolora; naŋ ti vet muneira wa, Ape sava kamiu we leasag tamaine alo toqamiu?

⁹ Avea we togawora, si we vava mun i mawea si, Me nomvitag napugama ŋaŋ; si we vava si, Tavaraka, wa taur kalo natanoepama, wa mule atalia.

¹⁰ Nava si kamiu a ilo vaglala si amen i Nat tanun o mana apena si a nomvitag pugai ŋaŋ vawo tano; naŋ ti vet mun i mawea wa,

¹¹ Nau we vava muniko, Tavaraka, wa taur kalo natanoepama, wa ka kel sage ilo imama.

¹² Wa ni me tavaraka gaplot, wa me taur kalo natanoepana, wa me rowolue alo nagora nol. O manigiu si neira we mamakei nol, wa we log ronoga God, we vava wa si, Kamam gate ilo tuai tea we tamaike.

¹³ Naŋ ni me rowolue mulaŋ pan qilo; wa o sul nol we vug suria, wa ni we vatvatogo neira.

¹⁴ Wa alo ni we mule tal ni me ilo i Levi natun Alpheus we pute ape tano lele som; naŋ ti vava munia wa, Tataga inau. Naŋ ti tavaraka, ti tataga ineia.

¹⁵ Naŋ me ge tamaike, ni we pute siwo ape ganagana alo iman i gene iloke, wa ira rowoagtalsom wa ira ganganor we qoqo me pute tuwale siwo amen Jesus tara tiŋqoro anana; ape neira we qoqo wa me tataga ineia ma ti.

¹⁶ Naŋ ira vatvatogo tara Pharise me iloa we ganagana tuwale amaira rowoagtalsom tara ganganor, wa me vava munra tiŋqoro anana wa si, O sava nake, si ni we ganagana wa we imaima tuwale amaira rowoagtalsom tara ganganor?

¹⁷ Pa i Jesus me roŋotag, me vava muneira wa, Irasei we esuesu gate maros ran i gismana, nava irasei we gopagopa. Na gate mule ma si na log ira taniniga, nava ira ganganor ape nomleas.

¹⁸ Naŋ ira tiŋqoro anan John wa anara Pharise me togatoga we garagara mamasa; wa neira we mule ma we vava munia wa, Ape sava ira tiŋqoro anan John wa anara Pharise we garagara mamasa, nava ira tiŋqoro anama gate garagara mamasa mora?

¹⁹ Wa i Jesus me vava muneira wa, Ira nanat ima wosolagia, alo masaoi i lag amaira, was we garagara mamasa lai? Tagai; alo masaoi i lag qale amaira neira tete garagara mamasa lai.

²⁰ Nava o qoŋ ŋaŋ te rasu ma aŋaisa, te lareag i lag nan neira alolora, wa neira te qara garagara mamasa mora alo qoŋ nane ilone.

²¹ Wa isei gate susur o masarei gate wurvag taurmate tiqa sin wono o siopa me tuai veta nia; pa si ta tamaine o wonowono ilone we garaqa te ge raka nan o siopa we tuai, wa te qeteg masare we tatas nan amoa apena.

²² Wa mulaŋ, isei gate vaniŋ o wine we garaqa ilo wetov vinqoe ŋaŋ we tuai; pa si ta tamaine, o wine we garaqa te sis wora o vinqoe, wa o wine te sale lue, wa o wetov ŋaŋ te tagea ran apena. Nava te vaniŋ ran o wine garaqa ilo wetov vinqoe we garaqa.

²³ Naŋ me ge alo ni we taletale alo tuqei ŋaŋ alo qoŋ mapsag, si ra tiŋqoro anana we mulemule we qeteg tawotawo o wutui ŋaŋ.

²⁴ Nava ira Pharise me vava munia wa, Ilo, ape sava neira we ge tamaike alo qoŋ mapsag, wa gate tira ape lea?

²⁵ Naŋ neia muneira wa, Pa kamiu gate vasogo tiqa si David me ge mona o sava, alo ni me maros ran, wa me maliŋsala, ineia tarasei amaia?

²⁶ Si ni me kalo pata qa ilo iman God alo qoŋin i Abiathar i moe oloolo, wa me gana o bread we mapmap lue, gate tira ape lea si a gana nava nagara oloolo magesera; wa si ni me tirag mulaŋ munragai amaia?

²⁷ Wa ni me vava muneira si, O qoŋ mapsag me qeteg raka o manigiu o tanun, wa gate o tanun o manigiu o qoŋ mapsag.

²⁸ Wa o manigiu o ine i Nat tanun we lord goro mulaŋ o qoŋ mapsag.